- ఆఫ్ఘన్‌లో పెను విషాదం
- వెయ్యి మందికి పైగా మృతి.. మరింత పెరిగే అవకాశం
- భూకంపంతో భారీగా ఆస్థి, ప్రాణ నష్టం
- రిక్టర్‌ స్కేలుపై తీవ్రత 6.1 గా నమోదు
- దాదాపు 1500 మందికి గాయాలు
- కొనసాగుతున్న సహాయక చర్యలు
ఆఫ్ఘనిస్థాన్‌ భూకంపంతో వణికింది. బుధవారం తెల్లవారుజామున రెండు గంటల ప్రాంతంలో చోటు చేసుకున్న ప్రకృతి వైపరిత్యం ఆ దేశంలోని తూర్పు ప్రావిన్సులైన పక్తికా, ఖోస్ట్‌ లలో తీవ్ర ఆస్థి, ప్రాణ నష్టాన్ని మిగిల్చింది. దీంతో వందలాది మంది ప్రజలు నిద్రలోనే ప్రాణాలు కోల్పోయారు. అనేక మంది క్షతగాత్రులయ్యారు. భూకంపం ధాటికి ఇనేక ఇండ్లు నేలమట్టమయ్యాయి. శిధిలాల్లో వందలాది సంఖ్యలో మృతులు, క్షతగాత్రులు చిక్కుకుపోయి ఉన్న దృశ్యాలు కంటతడి పెట్టిస్తున్నాయి. మారుమూల కొండ ప్రాంతంలోని భూకంపం సంభవించటంతో సమాచార సేకరణ సంక్లిష్టంగా మారింది. మృతుల సంఖ్య మరింతగా పెరిగే అవకాశం కనిపిస్తున్నదని అక్కడి అధికారులు చెప్పారు. అక్కడి తాలిబన్‌ ప్రభుత్వం సహాయక చర్యలను ప్రారంభించి కొనసాగిస్తున్నది.
కాబూల్‌ : ఆఫ్ఘనిస్థాన్‌పై ప్రకృతి ప్రకోపం చూపించింది. ఆ దేశంలోని తూర్పు ప్రావిన్సులైన పక్తికా, ఖోస్ట్‌లలో భూకంపం సంభవించింది. దీని తీవ్రత రిక్టర్‌ స్కేలుపై 6.1గా నమోదైంది. భూకంపం ధాటికి వెయ్యి మందికి పైగా మరణించారు. దాదాపు 1500 మంది వరకు గాయాలపాలయ్యారు. మృతుల సంఖ్య ఇంకా పెరిగే అవకాశమున్నదని ఆ దేశ సమాచార సాంస్కృతిక విభాగం అధిపతి మహమ్మద్‌ అమీన్‌ హుజైఫా తెలిపారు.
భూకంప తీవ్రత పక్తికా ప్రావిన్సులో అధికంగా కనిపించింది. ఈ ప్రావిన్సులోనే అధిక మరణాలు నమోదయ్యాయని అక్కడి అధికారులు తెలిపారు. ఇక్కడ 255 మంది వరకు మృతి చెందగా.. 200 మందికి పైగా గాయాలపాలైనట్టు తాలిబన్‌ ప్రభుత్వంలోని అంతర్‌ మంత్రిత్వ శాఖ అధికారి సలాహుద్దీన్‌ అయూబ్‌ వెల్లడించారు. పక్తికా ప్రావిన్సులోని నాలుగు జిల్లాల్లో భూకంప ప్రభావం ఎక్కువగా ఉన్నదని అధికారులు తెలిపారు. బర్మల్‌, జిరుక్‌, నాకా, గ్యాన్‌ జిల్లాల్లో శిథిలాల కింద చిక్కుకున్న ప్రజలను బయటకు తీయడానికి భద్రతా దళాల హెలికాప్టర్లు ఆ ప్రాంతానికి చేరుకున్నాయని ఆఫ్ఘనిస్థాన్‌ స్టేట్‌ న్యూస్‌ ఏజెన్సీ రిపోర్టర్‌ అబ్దుల్‌ వాహిద్‌ ర్యాన్‌ ట్వీట్‌ చేశారు. నంగర్‌హర్‌ ప్రావిన్సులో 25 మరణాలు నమోదైనట్టు అధికారులు వివరించారు. ''కొన్ని గ్రామాలు మారుమూల పర్వత ప్రాంతాల్లో ఉన్నందున మృతుల సంఖ్య పెరిగే అవకాశం ఉన్నది. వారి సమాచార సేకరణకు కొంత సమయం పడుతుంది. అధికారులు సహాయక చర్యలను ప్రారంభించారు. క్షతగాత్రులను చేరుకోవటానికి, మెడికల్‌ సప్లరు, ఆహారం చేరవేయడానికి హెలికాప్టర్లు రంగంలోకి దిగాయి'' అని అయూబ్‌ తెలిపారు.
ఆఫ్ఘన్‌ ప్రధాని అత్యవసరం సమావేశం
భూకంపం ఇక్కడి ప్రాంతంలో అనేక ఇండ్లను నేలమట్టం చేశాయని తాలిబన్‌ ప్రభుత్వ ఉప అధికార ప్రతినిధి బిలాల్‌ కరీమీ చెప్పారు. విపత్తు తదుపరి తీవ్రతను తగ్గించటం కోసం ప్రభావిత ప్రాంతాలకు బృందాలను పంపాలని సహాయక ఏజెన్సీలను కోరినట్టు వివరించారు. పక్తికా, ఖోస్ట్‌ ప్రాంతాలలో సహాయక చర్యలపై సమన్వయం కోసం ఆఫ్ఘనిస్థాన్‌ ప్రధాని మొహమ్మద్‌ హస్సన్‌ అఖుంద్‌ ఆ దేశ రాజధాని కాబూల్‌లో అత్యవసర సమావేశాన్ని ఏర్పాటు చేశారు.
పాక్‌, భారత్‌లలోనూ ప్రకంపనలు
ఆఫ్ఘనిస్థాన్‌కు ఆగేయాన ఖోస్ట్‌ నగరానికి 44 కిలోమీటర్ల దూరంలో భూకంపం కేంద్రం ఉన్నట్టు యూఎస్‌ జియోలాజికల్‌ సర్వే వెల్లడించింది. ఇది భూమి ఉపరితలం నుంచి 51 కిలోమీటర్ల లోతు ఉన్నట్టు వివరించింది. ఆఫ్ఘన్‌కు పొరుగుదేశం పాకిస్థాన్‌లోని పంజాబ్‌ ప్రావిన్సు, భారత్‌లోని కొన్ని ప్రాంతాలలోనూ ప్రకంపనలు సంభవించినట్టు తెలుస్తున్నది. అయితే, ఇక్కడ ఎలాంటి ఆస్థి, ప్రాణ నష్టాలు మాత్రం జరగలేదు. ఆఫ్ఘన్‌లో భూకంప మృతుల సంఖ్య పెరిగుతుండటంపై పాకిస్థాన్‌ ప్రధాని షహబాజ్‌ షరీఫ్‌ తీవ్ర విచారం వ్యక్తం చేశారు. ఈ మేరకు ఆయన ట్వీట్‌ చేశారు.
ప్రపంచదేశాల సహకారాన్ని కోరిన ఆఫ్ఘన్‌
ఆఫ్ఘన్‌ను గతేడాది తాలిబన్‌ తమ ఆధీనంలోకి తీసుకొని అక్కడ ప్రభుత్వాన్ని ఏర్పాటు చేసిన విషయం తెలిసిందే. తాలిబన్‌ ప్రభుత్వ ఏర్పాటు అనంతరం అనే అంతర్జాతీయ సహాయక ఏజెన్సీలు ఆఫ్ఘనిస్థాన్‌ విడిచి వెళ్లాయి. దీంతో సహాయక చర్యలు మరింత సంక్లిష్టంగా మారే అవకాశం కనిపిస్తున్నది. కాగా, తమకు అంతర్జాతీయ సమాజం సహకారం కావాలని ఆఫ్ఘనిస్థాన్‌ విపత్తు నిర్వహణ మంత్రిత్వ శాఖ ప్రపంచ దేశాలను కోరింది.
