Authorization
Mon Jan 19, 2015 06:51 pm
కోవిడ్ -19 మహమ్మారి విజృంభణతో ప్రజల జీవితంలో మాస్క్ ఒక ముఖ్య భాగమైపోయింది. ఫేస్ మాస్క్ లేనిదే బయటికి రాలేని పరిస్థితులు నెలకొన్నాయి. అయితే ముఖానికి వేసుకునే మాస్కులు కరోనా నుంచి రక్షణకు ఉపయోగపడుతున్నప్పటికీ వీటి అతి వినియోగం చెవిపై ఒత్తిడి, నొప్పికి దారి తీస్తుందని చాలా మంది నుంచి ఫిర్యాదులు వస్తున్నాయి. ఈ సమస్యకు చక్కటి పరిష్కారం చూపింది పశ్చిమ బెంగాల్లోని పూర్బా బర్ధమాన్ జిల్లాకు చెందిన దిగంటికా బోస్ అనే 17 ఏళ్ల అమ్మాయి. మేమరిలోని విద్యాసాగర్ స్మృతి విద్యామందిర్లో ఇంటర్ చదువుతున్న దిగంటికా బోస్.. ఫేస్ మాస్క్తో ఇబ్బందులు పడుతున్న వారందరికీ పరిష్కారం చూపడానికి వినూత్నమైన 'ఇయర్ ప్రెజర్ రిడక్షన్ టూల్'ను రూపొందించింది.
ఇబ్బంది లేకుండా...
ఆమె చేసిన కృషికి గాను డాక్టర్ ఎ.పి.జె అబ్దుల్ కలాం ఇగేటెడ్ మైండ్ చిల్డ్రన్ క్రియేటివిటీ అండ్ ఇన్నోవేషన్ అవార్డ్ - 2020ను అందుకుంది. ఈ ఇన్నోవేషన్ పై దిగంటికా బోస్ మాట్లాడుతూ.. ''డాక్టర్లు, హెల్త్ వర్కర్లతో పాటు ఇతర అత్యవసర సిబ్బంది నోరు, ముక్కును ఎక్కువ సేపు ఫేస్ మాస్కుతో కప్పబడి ఉంచాల్సి వస్తుంది. ఇలా ఎక్కువ సేపు ఫేస్ మాస్క్ను వాడటం వల్ల చెవుల్లో ఒత్తిడి, నొప్పి తలెత్తుతుంది. ఈ సమస్యను పరిష్కరించడానికి, ప్లాస్టిక్ వంటి సౌకర్యవంతమైన బోర్డు సహాయంతో ఇయర్ ప్రెజర్ రెడెక్షన్ టూల్ను రూపొందించాను'' అంటుంది.
ఐదు ప్రత్యేక పరిశోధనలు
ఇన్నోవేషన్ అవార్డ్లో భాగంగా నిర్వహించిన వార్షిక పోటీల్లో గెలిచిన తొమ్మిది మంది పిల్లలలో ఒకరైన దిగంటికా, ఈ గౌరవాన్ని అందుకోవడంతో చాలా సంతోషంగా ఉందని అంటుంది. ''ఈ నూతన హెడ్ బ్యాండ్ చెవి పట్టీలను కలుపుతూ, వ్యక్తి తల వెనుక భాగంలో చుట్టడానికి వీలుగా ఉంటుంది'' అని ఆమె తెలిపింది. దీనితో చెవులపై ఎటువంటి ఒత్తిడి ఉండదని, ప్రజలు ఇకపై చెవిపోటు వంటి అసౌకర్యాన్ని ఎదుర్కోరని అన్నది. అయితే, దిగంటిగా బోస్ 'ఇయర్ ప్రెజర్ టూల్'ను మాత్రమే కాకుండా ఇదివరకే కోవిడ్ - 19కు సంబంధించిన ఐదు ప్రత్యేక పరిశోధనలు, నమూనాలను తయారు చేసింది.
గర్వంగా ఉంది
దీనిలో భాగంగానే దిగంటికా ఏప్రిల్లో 'ఎయిర్ ప్రొవైడింగ్ అండ్ వైరస్ డిస్ట్రాయింగ్ మాస్క్'ను కూడా తయారుచేసింది. దీనికి నేషనల్ ఇన్నోవేషన్ ఫౌండేషన్ (ఎన్ఐఎఫ్), సైన్స్ అండ్ టెక్నాలజీ మంత్రిత్వ శాఖ నుండి గుర్తింపు లభించింది. దిగంటికా ఇన్నోవేషన్పై ఆమె తండ్రి సుదీప్తా బోస్ మాట్లాడుతూ.. ''నా కుమార్తె ఎప్పుడూ కొత్త కొత్త ఇన్నోవేషన్స్ చేయడానికి ఇష్టపడుతుంది. ఇన్నోవేషన్ అవార్డు పొందిన తన కుమార్తెను చూసి గర్వపడుతున్నాను''అని ఆయన అన్నారు.