చెయ్యాలనుకునే పనుల లిస్టు పెరుగుతూ మీకు టెన్షన్‌ తెచ్చిపెడుతోందా. అయితే కొన్ని కిటుకులు పాటిస్తే చాలు పనులన్నీ చకచకా అయిపోయి మీ టెన్షన్‌ని దూరం చేస్తాయి. దీనికోసం ముందుగా మనం చెయ్యాలనుకున్న పనుల జాబితా మన బుర్రలో కాకుండా పేపరుపై పెట్టి వరుసగా రాసుకోండి. అందులో ఇంటికి సంభందించిన పనులన్నీ ఒక వైపు, బయటకెళ్ళి చెయ్యాల్సినవి మరో వైపు, ఇంట్లో వాళ్ళ సహాయంతో చేసేవి ఇంకోవైపు చక్కగా డివైడ్‌ చేసి పెట్టుకోండి. ఇలా డివైడ్‌ చేసుకోవటం వల్ల మనం చెయ్యాల్సిన పనులపట్ల ఓ అవగాహన ఏర్పడుతుంది. ఇంట్లో చెయ్యాల్సిన పనులలో దేనికి ఎక్కువ ప్రాధాన్యం ఇవ్వాలనుకుంటున్నారో దాని మీద ముందుగా దష్టి పెట్టండి. ఇలా మన ప్రాధాన్యానికి అనుగుణంగా పనుల లిస్టులో కాస్త మార్పులు చేర్పులు చేసుకోవటం వల్ల పనులు తొందరగా అయిపోయిన ఫీలింగ్‌ కలుగుతుంది. అన్ని పనులని ఒకేసారి తలచుకోవటం వల్ల వచ్చే అలజడి తగ్గి మనకు తెలియకుండానే పనులు చకచకా అయిపోతాయి.
ఇక బయట చెయ్యాల్సిన పనుల లిస్టులో కూడా ఆ పనుల కోసం వెళ్ళాల్సిన ప్లేస్‌ పేరు పక్కన రాసుకోండి. ఎక్కువగా ఏ ప్లేస్‌కి వెళితే చాలా పనులు పూర్తి చెయ్యచ్చో మనకి క్లియర్‌గా అర్ధమవుతుంది. దానికి తగ్గట్టుగా వెళితే మన లిస్టులో పనులూ తగ్గుతాయి. మీకున్న పనులకి ఇంట్లో వాళ్ళ సాయం కూడా తోడయితే ఇంకా హాయి కదా. మొహమాటం పక్కన పెట్టి కాస్త ఆప్యాయంగా అడిగి చూడండి. చేసే పనులు ఎన్ని ఉండి ఉక్కిరి బిక్కిరి చేస్తున్నా ఓ ప్రణాళిక ఏర్పాటు చేసుకుని దానికి అనుగుణంగా వెళితే పనులన్నీ ప్రశాంతంగా చేసుకోవచ్చు.
