మనం సంపూర్ణ ఆరోగ్యంగా ఉంటేనే ఏ పనైనా మనసు పెట్టి చేయగలుగుతాం. మరి అలాంటి ఆరోగ్యం మన సొంతం కావాలంటే ఏం చేయాలో చూద్దాం...
తినడానికీ ఓ పద్ధతుంది.. కూర్చొనే తినాలి.. అది కూడా స్పూన్స్‌తో కాకుండా చేతులతో తినడం అలవాటు చేసుకోవాలి. ఆహారాన్ని ఆదరాబాదరాగా మింగడం కాకుండా బాగా నమలాలి.
తినేటప్పుడు గ్యాడ్జెట్స్‌ చూడడం, ఇతర విషయాలపై పరధ్యానం తగదు.
రోజువారీ ఆహారంలో భాగంగా గుప్పెడు నట్స్‌ తీసుకోవడం మంచిది. ఉదాహరణకు.. ఉదయం పూట బాదంపప్పులు, వాల్‌నట్స్‌, మధ్యాహ్నం పల్లీలు, జీడిపప్పులు తీసుకోవచ్చు.
ఆయా సీజన్లలో లభించే ఆకుపచ్చ కాయగూరలు ఆరోగ్యానికి చాలా మంచివి. ఈ వర్షాకాలంలో పొట్లకాయ, బెండకాయ, గోంగూర.. వంటివి తినాలి.
రాగులు, జొన్నలు.. వంటి చిరుధాన్యాలను కూడా రోజువారీ ఆహారంలో భాగం చేసుకోవాలి.
ఇంట్లో తోడు పెట్టుకున్న పెరుగునే తీసుకోండి. అల్పాహారం, మధ్యాహ్న భోజనం, రాత్రి భోజనంలో కచ్చితంగా టీస్పూన్‌ నెయ్యి తీసుకోవడం మాత్రం మరవద్దు.
రోజూ అరగంట వ్యాయామం మనల్ని ఆ రోజంతా ఉత్సాహంగా ఉండేలా చేస్తుంది.
ఎప్పుడు పడితే అప్పుడు పడుకోవడం, నిద్ర లేవడం కాకుండా.. దానికంటూ ఒక కచ్చితమైన సమయం పెట్టుకొని రోజూ అదే ఫాలో అవ్వండి.
అవసరం లేకున్నా మొబైల్‌తో కాలక్షేపం చేయడం, టీవీ చూడడం.. వంటివి తగ్గించుకుంటే మంచిది.
