బతుకమ్మ అంటే..
బతుకును నేర్పిన ఉద్యమం
దొరల పెత్తనాన్ని
దునిమాడిన జానపదం
నీళ్లులేని తెలంగాణలో
క'న్నీటి' చెలిమె బతుకమ్మ
కాయ కష్టంలో
ఆత్మీయ చెలిమి బతుకమ్మ
పని పాటల జమిలి
బ్రతుకు పాటల బలిమి
చైతన్యపు కలిమి బతుకమ్మ
బతుకమ్మ అంటే..
తనను తాను తవ్వి పోసుకున్న పాట
తనకు తానై ఉవ్విళ్ళూరిన పాట
తనువెళ్ల పల్లవించిన పాట
ఒక తలపోత..ఒక వల పోత
విజయ గాధల పూల పోత
పరిపరి విధాల పరివ్యాప్తమైన
పల్లె పాట పడతుల ఆట
బ్రతుకు పోరును పరిచిన
సామూహిక జీవన బాట
చిమ్మని చీకట్లలో
పూల వెలుగు బతుకమ్మ
కమ్మని ఆటళ్లలో
స్వేచ్ఛా పులుగు బతుకమ్మ
చైతన్యపు చప్పట్లలో
సంప్రదాయ తెలుగు బతుకమ్మ
ప్రకృతి పులకింతలతో
పురివిప్పుకునే
విజయగాధల ఆస్తీ
సంస్కృతికి తొలి కిస్తీ
ఆడపడుచుల దోస్తీ
ఉద్యమాల ఊపిరి
ఊయల పాటల ఝరి బతుకమ్మ
కోలాటాల సవ్వడిలో
సమైక్య సాధనా గీతిక
సమిష్టి భావనా పతాక
తెలంగాణ అస్తిత్వ ప్రతీక
ప్రకృతి ఒడిలో పూదోట
వేల పాటల ఊట
ఆడపడుచుల సయ్యాట
కోటి గొంతుల బావుట బతుకమ్మ..!
డా.కటుకోఝ్వల రమేష్‌,
సెల్‌:9949083327