కెప్టెన్‌ ఆరోహి పండిట్‌... ఉన్నత శిఖరాలకు అధిరోహించాలని తపించే మహిళలకు ఆకాశం సైతం పరిమితులు విధించలేదని రుజువు చేసింది. దేశానికే కాదు ప్రపంచానికే ఈ విషయాన్ని సగర్వంగా చాటి చెప్పింది. లైట్‌ స్పోర్ట్స్‌ ఎయిర్‌ క్రాప్ట్‌లో అట్లాంటిక్‌ మహాసముద్రాన్ని ఒంటరిగా దాటిన మొట్టమొదటి మహిళగా చరిత్ర సృష్టించింది. ఆమె సాధించిన మరెన్నో రికార్డుల గురించి చదువుకుందాం...
       2021 అక్టోబర్‌ 15న 23 ఏండ్ల పైలెట్‌ కెప్టెన్‌ ఆరోహి పండిట్‌... భారతదేశంలోని మొట్టమొదటి పౌర విమానాశ్రయమైన జుహులో 330 కిలోల బరువున్న పిపిస్ట్రెల్‌ సైనస్‌ అయిన మహి వీటీ ఎన్‌బిఎఫ్‌ తన విమానాన్ని ల్యాండ్‌ చేసింది. ఆరోహి ఫైలెట్‌గా నడిపిన ఈ విమానం ఎంతో చారిత్రాత్మకమైనది. 1932 నాటి భారతదేశంలో మొట్టమొదటి వాణిజ్య విమానాన్ని తిరిగి జేఆర్‌డి టాటా ద్వారా నడిపింది. భారత్‌-పాకిస్తాన్‌ యుద్ధంలో 72 గంటల్లో భుజ్‌ రన్‌వేని పునర్నిర్మించిన మాధాపార్‌ మహిళలకు నివాళి అర్పించింది.
ఏదీ అంత సులభం కాదు
       జీపీఎస్‌, ఆటోపైలట్‌, కంప్యూటరైజ్డ్‌ పరికరాలు లేకుండా ఆరోహి ఈ విమానం నావిగేట్‌ చేయాల్సి వచ్చింది. ఎల్లప్పుడూ ఇది సముద్ర మట్టానికి 7,000 అడుగుల ఎత్తులో ఎగురుతుంది. 500 నాటికల్‌ మైళ్ల దూరానికి ఎగురుతూ ఐదు గంటల పాటు 60 లీటర్ల కంటే తక్కువ పెట్రోల్‌తో కచ్‌ నుండి ముంబైకి అదే మార్గంలో నడుస్తోంది. ఆరోహి గుజరాత్‌లోని మాధాపర్‌ గ్రామంలోని 1971 ఇండో-పాక్‌ యుద్ధ మహిళల నుండి ప్రత్యేక లేఖను కూడా తీసుకువెళ్లారు. మహారాష్ట్ర, ముంబైలోని సబర్బన్‌ గ్రామాల యువతులకు ఆర్‌జేడీ టాటా తన విమానంలో తీసుకెళ్లిన 25 కిలోల మెయిల్స్‌ను గుర్తుచేసుకున్నారు.
చారిత్రాత్మక క్షణం
       ఆరోహి తను సృష్టించిన చారిత్రాత్మక ఘనత గురించి మాట్లాడుతూ ''నేను ఈ ప్రాజెక్ట్‌ను మూడు నాలుగు నెలల కిందట అప్పటిగించినపుడు దీని గురించి నేను చాలా ఉత్సాహంగా ఉన్నాను. రోజు ఉదయం 6 గంటలకు ప్రారంభమైంది. అక్కడ మాదాపూర్‌ మహిళలను చూసినప్పుడు నా హృదయం కలచివేసింది. నాకు శుభాకాంక్షలు తెలుపడానికి వచ్చిన అందమైన అమ్మమ్మలు వారు'' అన్నది. ఫ్లైట్‌కు టెక్నాలజీ లేకపోవడం ఓ పెద్ద సవాలుగా అనిపించిందని ఆరోహి అంటున్నది. ఇది నాకు మళ్ళీ పైలెట్‌ ట్రైనింగ్‌లా అనిపించింది. మ్యాప్‌లు, చార్ట్‌లు, విజువల్‌ రిఫరెన్స్‌లను ఉపయోగించి శిక్షణ ఇవ్వడం లాంటిదే ఈ ప్రయాణం.
ఇది కొంచెం కష్టం
       ''ఇది 36 డిగ్రీల సెల్సియస్‌ వద్ద ఇంజిన్‌ వేడెక్కుతుందని తెలిసి నేను భయపడ్డాను. మరొక సవాలు ఎయిర్‌ ట్రాఫిక్‌. కానీ నా విమానం సమయానికి ల్యాండ్‌ అయ్యేలా ఏర్పాట్లు చేసిన ఏటీసీకి నేను కృతజ్ఞతలు తెలుపుతున్నాను. ఇది కొంచెం కష్టం. కానీ చివరికి చేయగలిగాను'' అని ఆరోహి చెప్పింది. జుహూ వద్దకు చేరుకున్నప్పుడు ఆరోహికి అక్కడి వారు సాంప్రదాయ నీటి వందనంతో స్వాగతం పలికారు. గులాబీ రంగు దుస్తులు ధరించిన భారతీయ మహిళా పైలట్‌ అసోసియేషన్‌ (ఐడబ్ల్యూపిఏ) పైలట్లు ఆమెను ఆహ్వానించారు. ఆమె తన స్నేహితుడు, తోటి పైలట్‌ కీథైర్‌ మిస్క్విట్టాకు మాదాపూర్‌ తల్లుల ఉత్తరాలు అందజేసింది.
మాదాపూర్‌ తల్లుల లేఖ
       ''ఆకాశాన్ని చేరుకోవడానికి మీరు మీ రన్‌వేని నిర్మించడం ద్వారా ప్రారంభించాలి. సరళంగా, నిజాయితీగా, కష్టపడి సమయం వృధా చేయకుండా మీ లోపల, మీ చుట్టూ ఉన్న వనరులను ఉపయోగించి మీ ప్రయత్నాన్ని కొనసాగించడండి. మీరు నిర్మించే రన్‌వేపై ప్రయాణించండి. కానీ మీరు దానిని ఉపయోగించే లక్షల మంది జీవితాలను మారుస్తారు. మీరు తప్పక చేరుకోవాల్సిన నిజమైన ఆకాశం అదే'' అంటూ మాదాపూర్‌ మహిళలు తమ లేఖలో రాశారు.
నా జెండా కోసం నేను చేస్తాను
       ఆర్‌జేడి టాటాకు, మాదాపూర్‌ మహిళలకు చాలా సారూప్యతలు ఉన్నాయని ఆరోహి అంటుంది. ''ఇద్దరూ ఓ స్ఫూర్తిగా నిలిచారు. నాకు నచ్చిన విషయం ఏమిటంటే వారిద్దరూ దేశం కోసం పనిచేశారు. నా మనసులో ఓ విషయం ఉంది. నేను ఏమి చేసినా నా జెండా కోసం నేను చేస్తాను. ఫ్లైట్‌ అంతా వారి గురించే ఉంది. నా గురించి ఏమీ లేదు. ఇది అచంచలమైన భారతీయ స్ఫూర్తికి నివాళి'' అని ఆరోహి చెబుతుంది.
అడ్డంకులు, రికార్డులు బద్దలు కొడుతూ
       రికార్డులు సృష్టించే విషయంలో ఈ 23 ఏండ్ల యువతికి పరిమితి లేవు. 2019లో ఆరోహి లైట్‌ స్పోర్ట్స్‌ ఎయిర్‌క్రాఫ్ట్‌లో అట్లాంటిక్‌ మహాసముద్రం, పసిఫిక్‌ మహాసముద్రాలను ఒంటరిగా దాటిన మొదటి మహిళగా చరిత్ర సృష్టించింది. పసిఫిక్‌ మహాసముద్రం, బేరింగ్‌ సముద్రం మీదుగా అలస్కాలోని ఉనలక్లీట్‌ నగరం నుండి ఎగురుతూ ఆమె నోమ్‌ (అల) వద్ద ఆగిపోయిన తర్వాత రష్యా తూర్పు ప్రాంతమైన చుకోట్కాలోని అనాడిర్‌ విమానాశ్రయంలో దిగింది. జూలై 30, 2018న కీథైర్‌తో పాటు ఎల్‌ఎస్‌ఏ భూమిని ప్రదక్షిణ చేసిన ప్రపంచంలోని మొట్టమొదటి మహిళా బృందమైన ''మహి''ని కూడా ఆమె ప్రారంభించింది.
సోలోగా కొనసాగించింది
       ఇద్దరూ భారతదేశంలోని పంజాబ్‌, రాజస్థాన్‌, గుజరాత్‌, పాకిస్తాన్‌, ఇరాన్‌, టర్కీ, సెర్బియా, స్లోవేనియా, జర్మనీ, ఫ్రాన్స్‌, బ్రిటన్‌ మీదుగా ప్రయాణించారు. చిన్న కాక్‌పిట్‌ బ్రిటన్‌ నుండి ట్రాన్స్‌-ఓసియానిక్‌ విమానాలకు ఇతర సామగ్రిని కల్పించలేనందున ఆరోహి యాత్రను సోలోగా కొనసాగించింది. అయితే రికార్డులను బద్దలు కొట్టడానికి తాను ఎగరడం ప్రారంభించలేదని నవ్వుతూ చెబుతుంది.
అస్సలు ఊహించలేదు
       ''ఎస్‌ఎస్‌ఏలో ప్రపంచాన్ని చుట్టుముట్టే ఈ ఛాలెంజ్‌ని స్వీకరించడానికి డబ్ల్యూఇ ఎక్స్‌యిడిషన్‌ ఇద్దరు యువతుల కోసం వెతుకుతున్నప్పుడు నేను ఫ్లయింగ్‌ స్కూల్‌ నుండి బయటకు వచ్చాను. అర్హత సాధించడానికి నేను కఠినమైన శారీరక, మానసిక పరీక్షలకు సిద్ధమయ్యాను. ఈ ట్రిప్‌లో నేను నాలుగు రికార్డులు సాధిస్తానని అస్సలు ఊహించలేదు. ఎగరడమంటే నాకు చాలా ఇష్టం. అలాగే ఏదైనా సాధించాలనే కోరిక బాగా ఉండేది'' అని ఆరోహి అన్నది.
సెకన్లు మాత్రమే ఉంటాయి
       గాలిలో ఉన్నప్పుడు అద్భుతమైన శక్తిని, స్వేచ్ఛను పొందిన అనుభూతి కలుగుతుందని ఆరోహి అంటున్నది. ''మీరు దీని గురించి ఎక్కువగా ఊహించుకోవాల్సిన పనిలేదు. ఓ మెషిన్‌ లాగా పని చేస్తాము. ఏ పరిస్థితికి అయినా స్పందించడానికి సెకన్లు మాత్రమే అందుబాటులో ఉన్నాయి. నేను రికార్డును బద్దలు కొడతానని భావించి ఫ్లైట్‌లోకి వెళ్లను. నేను దానిని రెగ్యులర్‌ ఫ్లైట్‌ లాగా పరిగణిస్తాను. శారీరకంగా ఆరోగ్యంగా, ప్రశాంతంగా, సంతోషంగా కాక్‌పిట్‌ లోపలికి అడుగుపెట్టడానికి ఆరోగ్యంగా ఉన్నాను అని నేను నిర్ధారించుకుంటాను'' అని ఆమె జతచేస్తుంది.
పైలెట్‌ కావాలని
       ఆరోహి ఎనిమిది సంవత్సరాల వయసులో ఉన్నప్పుడు ఎగరడంపై ప్రేమను పెంచుకుంది. ఆమె తండ్రి టూరిజం వ్యాపారంలో ఉన్నారు. దాంతో ఆమె తరచుగా దేశవ్యాప్తంగా పర్యటనలకు వెళ్లేది. ఒకసారి ఆమె యూనిఫాంలో ఉన్న ఒక మహిళా పైలట్‌ను చూసింది. తను కూడా ఆమెలా అవ్వాలని నిర్ణయించుకుంది. ''ఆ రోజు నుండి నా తల్లిదండ్రులు నాకు ఆర్థికంగా, మానసికంగా మద్దతు ఇచ్చారు. నా విజయానికి వారే కారణం'' అని ఆమె చెప్పింది.
దృఢంగా ఉండండి
''ఎవరూ పైలట్‌గా జన్మించలేదు. మనం కష్టపడి పనిచేయాలి. చదవడం, నేర్చుకోవడం కొనసాగించాలి. నేను విమాన పైలెట్‌గా చేరినప్పుడు నా కుటుంబం నుండి ఈ వృత్తిలో చేరిన మొదటి వ్యక్తిని నేనే. శారీరకంగా, మానసికంగా దృఢంగా ఉండండి. మీ చుట్టూ ఉన్న సమాచార సంపదను సద్వినియోగం చేసుకోండి. అప్పుడు అందరూ ఏదైనా సాధించగలరు'' అంటుంది ఆరోహి.
- సలీమ