అందరికీ ఎంతో ప్రత్యేకమైన పండుగ దీపావళి. నోరూరించే పిండి వంటలు, మిరుమిట్లుగొలిపే దీపాలు వెలుగులు, హోరెత్తించే టపాసుల శబ్దాలు ఇలా ఎంతో సంబరంగా జరుపుకునే దీపావళి అంటే అందరికి ఎంతో ఇష్టం. ఈ పండుగలో మిఠాయిలకు ఎంతో ప్రత్యేకత ఉంది. ఈ పండుగలో తెలుగువారి పిండి వంటలకు కూడా ఓ ప్రత్యేకత ఉంది. నోరూరించే తెలుగు వంటకాల్లోని కొన్ని తయారీ విధానం ఈరోజు తెలుసుకుందాం...
తీపి భూచక్రాలు
కావాల్సిన పదార్థాలు: మైదా- కప్పు, చక్కెర- ఒకటిన్నర కప్పు, పాలు- కప్పు, కుంకుమ పువ్వు- చిటికెడు, డ్రైఫ్రూట్స్‌- కొద్దిగా, నూనె లేదా నెయ్యి- వేయించడానికి తగినంత.
తయారీ విధానం: ముందుగా మైదా పిండి తీసుకుని చిటికెడు ఉప్పు, కొద్దిగా బొంబాయి రవ్వ వేసి కలపాలి. తర్వాత కొద్దిగా నీళ్లు పోసి చపాతీ పిండి ముద్దలా చేయాలి. దీన్ని అర గంటసేపు నానబెట్టుకోవాలి. చపాతీ పిండిని పూరీలా వత్తి రోలింగ్‌ చేయాలి. మధ్యలో కొద్దిగా నూనె లేదా నెయ్యి వేసి కొద్దిగా పిండి వేసి, తర్వాత దీన్ని చాకుతో చిన్న చిన్న భాగాలు చేసి భూచక్రాల ఆకారంలో వత్తుకోవాలి. తర్వాత నెయ్యి లేదా నూనెలో ఎరుపు రంగు వచ్చేవరకు వేయించాలి. దీనికి రెండు గంటల ముందు పాలలో పంచదార, కుంకుమ పువ్వు వేసి ఓ పక్కన ఉంచుకోవాలి. పాలను వేడిచేసి వేయించిన భూచక్రాలను అందులో వేయాలి. చివరిగా డ్రైఫ్రూట్స్‌ వేసి అలకరించుకోవాలి. ఈ వంటకాన్ని పిల్లలు ఎంతో ఇష్టంగా తింటారు.మెత్తగా కాజాల్లా ఉండే ఇవి నోట్లో వేసుకోగానే కరిగిపోతాయి
మురుకులు
కావల్సిన పదార్థాలు: శనగపిండి - రెండు కప్పులు, నూనె - మూడు కప్పులు, బియ్యం పిండి - నాలుగు కప్పులు, జీలకర్ర పొడి - నాలుగు టీస్పూన్లు, ఉప్పు - తగినంత, ఎర్రకారం - తగినంత, తెల్ల నువ్వులు - కప్పు, ఇంగువ - 1/4 టీస్పూను.
తయారీ విధానం: ముందుగా కొద్దిగా నూనె పోసి శనగపిండిని వేయించాలి. ఇందులో బియ్యం పిండి, జీలకర్ర, తగినంత ఉప్పు, కారం, నువ్వుల పప్పు, ఇంగువని వేసి కలపాలి. ఇందులో కొద్దిగా నీళ్లు కలిపి గట్టి ముద్దగా చేసుకోవాలి. మురుకులను ఒత్తే ప్రెస్‌తో మురుకులను కాగుతున్న నూనెలో వేసుకుని గోధుమ రంగు వచ్చేలా, కర కరలాడేలా డీప్‌ ఫ్రై చేయాలి.
మైదా గవ్వలు
కావాల్సిన పదార్థాలు: మైదా పిండి - కిలో, చక్కెర - కిలో, ఉప్పు - తగినంత, బొంబాయి రవ్వ - కేజీ, పాలు - రెండు గ్లాసులు, నూనె - అర కిలో.
తయారీ విధానం: ముందుగా మైదాపిండి, బొంబాయి రవ్వని జల్లెడ పట్టి అందులో సరిపడా ఉప్పు వేసి తర్వాత పాలు పోయాలి. దీన్ని గట్టిగా పూరీల పిండిలా కలుపుకుని పక్కన పెట్టాలి. గంటన్నర దాటిన తరువాత ఈ పిండిని గవ్వల చెక్క మీద పెట్టి ఉండలుగా చేసి బొటన వేలితో వత్తాలి. గవ్వలను సిద్ధం చేసుకున్న తర్వాత స్టౌవ్‌ వెలిగించి కళాయి నూనె వేసి కాగనివ్వాలి. తర్వాత ముందుగా సిద్ధం చేసుకున్న గవ్వలను వేసి బాగా వేయించాలి. గవ్వలు వేయించాక చక్కెరలో ఓ గ్లాసు నీళ్లువేసి ముదురు పాకం పట్టి అందులో ఆ గవ్వలను వేసి బాగా కలపాలి. అంతే రుచికరమైన గవ్వలు తయారైపోతాయి.
మైసూర్‌ పాక్‌
కావల్సిన పదార్థాలు: శనగపిండి - రెండు గ్లాసులు, డాల్డా/ నెయ్యి - రెండు గ్లాసులు, చక్కెర - రెండు గ్లాసులు.
తయారీ విధానం: శనగపిండిని జల్లెడ పట్టాలి. స్టౌవ్‌ మీద కళాయి పెట్టి దాంట్లో కొద్దిగా డాల్డా/నెయ్యి వేసి అడుగంటకుండా దోరగా వేయించుకోవాలి. గిన్నెలో కొద్ది నీరు, చక్కెరను వేసి పాకం వచ్చేంత వరకు పొయ్యి మీద ఉంచాలి. పాకం తయారైన తర్వాత దాంట్లో శనగపిండి వేసి గట్టి పడే వరకు ఉండలు కట్టకుండా బాగా కలుపుతూ ఉండాలి. వేడి చేసి పెట్టుకున్న డాల్డా/నెయ్యి శనగపిండిలో పోయాలి. మాడిపోకుండా కలుపుతూ ఉండాలి. ఇప్పుడు పిండి గుల్లలుగా తయారవుతుంది. తరువాత మరోసారి డాల్డా/నెయ్యి వేసి కలుపుకుని ఒక నలు చదరంగా ఉండే ట్రేలో ఈ మిశ్రమాన్ని పోసి చాకుతో ముక్కలుగా కోసుకుని పది నిమిషాల వరకు ఆరబెట్టుకోవాలి. దీంతో రుచికరమైన మైసూర్‌పాక్‌ సిద్ధం.
చిమ్మిలి పూర్ణాలు
కావాల్సిన పదార్థాలు: నువ్వులు- కప్పు, బియ్యపు పిండి- కప్పు, బెల్లం- కప్పు, మైదా- టీస్పూన్‌, ఉప్పు- చిటికెడు.
తయారీ విధానం: ముందుగా బియ్యపు పిండిలో మైదా, చిటికెడు ఉప్పువేసి నీళ్లుపోస్తూ చిక్కగా కలుపుకోవాలి. దీన్ని పావుగంటసేపు నాననివ్వాలి. తర్వాత స్టౌ వెలిగించి కళాయి పెట్టి అందులో నువ్వులు వేయించాలి. చల్లారాక మిక్సీ పట్టాలి. తర్వాత ఇందులో బెల్లం వేసి మరోసారి మిక్సీ పట్టి గిన్నెలో వేయాలి. తర్వాత చిమ్మిలిని చిన్న చిన్న ఉండలుగా చుట్టుకుని, బాణలిలో నూనె వేసి కొద్దిగా వేడెక్కిన తర్వాత ముందుగా సిద్దం చేసుకున్న పూర్ణం పిండిలో ముంచి వేయించాలి. అంతే ఎంతో రుచికరమైన చిమ్మిలి పూర్ణాలు తయారవుతాయి.