చలికాలంలో పోషక విలువలున్న ఆహారాలు ఎక్కువగా తీసుకోవడం చాలా ముఖ్యం. అందులో జింక్‌ ఒకటి. రోగనిరోధక శక్తిని పెంచడంలో ముఖ్యమైన పాత్ర పోషిస్తుంది. సాధారణంగా చాలా మంది విటమిన్లు, ఐరన్‌, కాల్షియం ముఖ్యమైన పోషకాలు అని అనుకుంటారు. కానీ శరీరానికి వివిధ ఖనిజాలు కూడా అవసరం. ముఖ్యంగా మినరల్‌ లోపం వల్ల వ్యాధులు వచ్చే ప్రమాదం ఎక్కువ. వాటిలో ముఖ్యమైనది జింక్‌. దీన్ని సరిగ్గా తీసుకుంటే చాలా ప్రతికూల పరిస్థితులను తట్టుకోగలదు. జింక్‌ ఒక ముఖ్యమైన పోషకం అయినప్పటికీ ప్రపంచ జనాభాలో మూడింట ఒక వంతు మంది ఈ పోషకాహార లోపంతో బాధపడుతున్నారు. దీని ప్రాముఖ్యం తెలియకపోవడమే ఇందుకు కారణమని వైద్యులు చెబుతున్నారు. శీతాకాలంలో రోగనిరోధక శక్తిని పెంచడంలో సహాయపడే జింక్‌ అధికంగా ఉండే ఆహారపదార్థాల గురించి తెలుసుకుందాం...
మాంసాహారం: షెల్ఫిష్‌లో 50 గ్రా జింక్‌ కలిగి ఉంటుంది. వీటిని గుల్లలు అని కూడా పిలుస్తారు. ఇతర ఆహారాల కంటే ఎక్కువ జింక్‌ ఇందులో ఉంటుంది. దీన్ని తీసుకుంటే జింక్‌ మాత్రమే కాకుండా ఒమేగా -3 కొవ్వు ఆమ్లాలను కూడా పొందువచ్చు.
రెడ్‌ మీట్‌: 100 గ్రాముల మటన్‌లో 8 మిల్లీగ్రాముల జింక్‌ ఉంటుంది. రెడ్‌ మీట్‌ జింక్‌, విటమిన్‌ బి12, ప్రొటీన్ల పోషక పదార్ధాలలో లభిస్తుంది.
చికెన్‌, గుడ్లు: 85 గ్రాముల చికెన్‌లో 4 మిల్లీగ్రాముల జింక్‌ ఉంటుంది. చికెన్‌, గుడ్లలో ప్రోటీన్‌, జింక్‌ అధికంగా ఉంటుంది. ఇది కండరాల పెరుగుదలకు, బరువు తగ్గడానికి సహాయపడుతుంది.
శాఖాహార ఆహారంలో: చిక్కుళ్ళు 164 గ్రాములు, చిక్‌పీస్‌లో 5 మిల్లీగ్రాముల జింక్‌ ఉంటుంది. చిక్పీస్‌, బీన్స్‌, రాజ్మా, చిక్కుళ్ళు జింక్‌ను అందిస్తాయి. ఇవి తక్కువ కేలరీలు, తక్కువ కొవ్వు కలిగిన పప్పులు.
జీడిపప్పు: జీడిపప్పులో కొవ్వు, కేలరీలు అధికంగా ఉంటాయి. కాబట్టి దీన్ని తినకూడదని చాలా మంది అనుకుంటారు. కానీ జీడిపప్పు ఒక పోషక శక్తిగా చెప్పవచ్చు. జీడిపప్పులో జింక్‌, కాపర్‌, విటమిన్‌ కె, విటమిన్‌ ఎ, ఫోలేట్‌ పుష్కలంగా ఉన్నాయి. రోజుకు నాలుగైదు జీడిపప్పులు తినడం వల్ల మీ రక్తపోటు స్థిరంగా ఉంటుంది. మీ శరీరానికి అవసరమైన జింక్‌ను అందిస్తుంది.
