కొత్త సంవత్సరంతో కొత్త సవాళ్లు వస్తాయి. కొత్త అవకాశాలు కూడా ఉంటాయి. అయితే మానసిక ఆరోగ్యాన్ని జాగ్రత్తగా చూసుకోవడం ప్రతి ఒక్కరికీ కొత్త సంవత్సర తీర్మానం కావాలి. మహమ్మారి సంవత్సరం అయిన 2021 మానసిక ఆరోగ్యం ప్రాముఖ్యతను మరింతగా నేర్పింది. అందుకే 2022లో మన ఆరోగ్యాన్ని జాగ్రత్తగా చూసుకునేందుకు ఇప్పటి నుండే ప్రణాళిక రూపొందించుకుందాం. అవేంటో తెలుసుకుందాం.
- ఆరోగ్యంగా ఉండటానికి 6-8 గంటల నిద్ర సరిపోతుంది. కానీ నిద్ర నాణ్యత కూడా ముఖ్యం. నిద్ర నాణ్యతను మెరుగుపరచడానికి నిద్రవేళకు 2 గంటల ముందు స్క్రీన్‌ సమయాన్ని నివారించండి. నిద్రవేళకు 30-40 నిమిషాల ముందు మీ సొంత పనులకు సమయాన్ని కేటాయించండి. కొందరు వ్యక్తులు తమ జుట్టు, చర్మాన్ని జాగ్రత్తగా చూసుకుంటూ ఆనందిస్తారు. కొందరు ఇష్టమైన పుస్తకాన్ని చదవాలనుకుంటున్నారు, కొందరు సంగీతాన్ని వింటారు మరికొందరు ధ్యానం చేస్తారు. ఇలా ఏదైనా మీకు నచ్చింది చేయడండి. హాయిగా నిద్రపడుతుంది.
మహమ్మారి జాగ్రత్తలను దృష్టిలో ఉంచుకుని రోజూ స్నేహితులు, కుటుంబ సభ్యులతో ఆన్‌లైన్‌లో లేదా వ్యక్తిగతంగా కమ్యూనికేట్‌ చేయండి. ఇతరులు చెప్పేది జాగ్రత్తగా వింటూనే మీ భావోద్వేగాలు, భావాలు, ఆలోచనలను వారితో పంచుకోండి.
కొత్త నైపుణ్యాలను పెంపొందించుకోండి. మీ సామర్థ్యాలను మరింతగా అభివృద్ధి చేసుకోండి. మీకు ఎంతో ఇష్టమైన పనిని చేయడం వల్ల ఒత్తిడి, అసంతృప్తి స్థాయి తగ్గుతుంది. మీ మానసిక స్థితి మెరుగుపడుతుంది. దీర్ఘకాలంలో మీ మొత్తం మానసిక శ్రేయసు కూడా పెరుగుతుంది.
వాస్తవిక, సాధ్యమయ్యే, సాధించగల లక్ష్యాలను మాత్రమే పెట్టుకోండి. దీర్ఘకాలిక లక్ష్యాలను సాధించడంలో మీకు సహాయపడే విధంగా మీ స్వల్పకాలిక లక్ష్యాలను రూపొందించండి. ఉత్పాదకతపై దృష్టి పెట్టండి కానీ ఎక్కువ పని చేయడం ద్వారా లేదా మీ హద్దులు దాటడంలో మునిగిపోకండి. అవసరమైనప్పుడు విరామం తీసుకోండి. విరామంలో ఉన్నప్పుడు మీకు సంతోషాన్ని కలిగించే పనులు చేయండి.
మనస్ఫూర్తిగా జీవించడం ద్వారా మనల్ని మనం శక్తివంతం చేసుకోవచ్చు. మంచి మానసిక ఆరోగ్యం అంటే మనం ఎప్పుడూ సంతోషకరమైన ఆలోచనలు మాత్రమే కలిగి ఉంటామని కాదు. విచారకరమైన లేదా కలత కలిగించే విషయాలు జీవితంలో భాగం. సమస్యలు కూడా జీవితంలో భాగమే. మంచి మానసిక ఆరోగ్యం అంటే పరిస్థితిని వాస్తవికంగా చూడటం, ఆరోగ్యకరమైన ఆలోచన సాధన.
మనమందరం విశ్రాంతి తీసుకోవడానికి సమయాన్ని వెచ్చించాలి. ఇది ఒత్తిడిని నిర్వహించడంలో, మన జీవితాలను ఆనందించడంలో పెద్ద భాగం. ఉరుకుల పరుగుల జీవితంలోని వేగాన్ని కాస్త తగ్గించుకోవడానికి సమయం తీసుకోనప్పుడు, మనం ఏమీ చేయలేనంత ఒత్తిడి పెరుగుతుంది. విశ్రాంతి తీసుకున్నప్పుడు సమస్యలు పరిష్కారాలను స్పష్టంగా చూడటం సులభం. కష్టమైన భావాలను నిర్వహించడం సులభం. యోగా, ధ్యానం, శారీరక వ్యాయామం ద్వారా దీన్ని సాధించవచ్చు..
