ఎన్ని విజయాలు సాధించినా మహిళల పట్ల చిన్నచూపు ఎక్కువ. అటువంటి రంగంలో గ్లోబల్‌ స్కిన్‌ అండ్‌ పర్సనల్‌ కేర్‌ R&D లీడర్‌గా చంద్రిక కస్తూరి ఇన్నోవేషన్‌ ద్వారా బహుళ ఐకానిక్‌ బ్యూటీ బ్రాండ్‌లలో అన్ని విధాల వృద్ధిని అందించడానికి బాధ్యత వహిస్తుంది. R&D లో అద్భుతమైన ఆవిష్కరణలను తీసుకొస్తుంది. దానికోసం బలమైన టీంలను నడిపిస్తుంది. మార్కెట్‌ పోటీని తట్టుకునేలా తన సంస్థను ఎలా బలోపేతం చేస్తుందో హర్‌స్టోరీకి ఆమె ఇచ్చిన ఇంటర్వ్యూ విశేషాలు మానవి పాఠకుల కోసం...
మీరు పుట్టి పెరిగింది ఎక్కడా?
        పుట్టింది యుఎస్‌లో. పెరిగింది మాత్రం ఇండియాలో. మా నాన్న బెంగుళూరులోని ఇండియన్‌ ఇన్‌స్టిట్యూట్‌ ఆఫ్‌ సైన్స్‌లో కెమిస్ట్రీలో పిహెచ్‌డి చేసిన ప్రొఫెసర్‌. నాన్న ప్రోత్సాహంతోనే బెంగుళూరు విశ్వవిద్యాలయం మౌంట్‌ కార్మెల్‌ కాలేజ్‌ నుండి ఫిజిక్స్‌, కెమిస్ట్రీ, మ్యాథమెటిక్స్‌లో బ్యాచిలర్‌ ఆఫ్‌ సైన్స్‌తో నా క్లాస్‌లో టాప్‌ గ్రాడ్యుయేట్‌ అయ్యాను.
మిమ్మల్ని ఈ రంగం వైపు ఆకర్షించింది ఏమిటి?
        మా నాన్నగారి కెరీర్‌, ఆయనకు సైన్స్‌ పట్ల ఉన్న మక్కువ చూస్తూ పెరిగాను. నా ఆసక్తిని ప్రేరేపించిన బలమైన ప్రభావం అదే కావచ్చు. నాన్న ప్రయోగాలను ప్రోత్సహిస్తారు. అయితే ఈ రంగంలో అమ్మాయిల పట్ల వివక్ష ఎక్కువ. ఇది అమ్మాయిల కోసం కాదని అందరూ చెప్తుంటారు. ఇది కచ్చితంగా నాలోనూ ప్రతిధ్వనిస్తుంది. నేనూ అలాంటి వివక్షను అనుభవించాను. అయినప్పటికీ నా ఆసక్తులను కొనసాగించమని నన్ను మా నాన్న ఎప్పుడూ ప్రోత్సహించే వారు. అలాంటి బలమైన రోల్‌ మోడల్‌ నాకు మద్దతుగా ఉండటం నాకు అన్ని విధాలుగా కలిసొచ్చిందని నేను భావిస్తున్నాను. నాన్న సపోర్ట్‌తో పాటు నేను చదువుకున్న పాఠశాల వాతావరణం కూడా ఆహ్లాదకరంగా, ఆనందదాయకంగా ఉండేది. అలాంటి మంచి పాఠశాలల్లో నేను చదువుకున్నాను. అక్కడ నాకు స్ఫూర్తిగా నిలిచిన ఉపాధ్యాయులు కూడా ఉన్నారు. నా విజయంలో వారికి కూడా కచ్చితంగా భాగస్వామ్యం ఉందని చెప్పాలి. సైన్స్‌ పట్ల నా ఆసక్తిని పెంచడంలో ముఖ్యమైన పాత్ర పోషించిన వారిలో కొంతమంది ఉపాధ్యాయులు ఈ రోజు వరకు నాకు గుర్తున్నారు.
మీ కెరీర్‌ ప్రయాణంలో మమ్మల్ని తీసుకెళ్లండి?
          ఒహియో స్టేట్‌ యూనివర్శిటీలో పీహెచ్‌డీ పూర్తి చేసిన తర్వాత 1993లో P&Gలో చేరాను. నా సుదీర్ఘ కెరీర్‌లో R&D లోని విభాగాల్లో, అనేక రకాల బ్రాండ్‌లు, వర్గాలలో సంక్లిష్టతను పెంచే పాత్రలను పోషించడం అనేది నాకు దొరికిన మంచి అవకాశం. ఇందులో కెమిస్ట్రీ ఆధారిత వ్యాపారాలపై పని చేయడం, మరింత సూత్రీకరణ ఆధారిత వ్యాపారాలు అలాగే కాగితం ఆధారిత వ్యాపారం, మెకానికల్‌, అప్‌స్ట్రీమ్‌ టెక్నాలజీ నుండి ఉత్పత్తి అభివృద్ధి, ప్యాకేజింగ్‌ వరకు విభిన్న పాత్రలలో పని చేశాను. అంతిమంగా P&G విభిన్నమైన సైంటిఫిక్‌ సవాళ్లను అందించింది. శాస్త్రీయ విమర్శనాత్మక ఆలోచనను ప్రభావితం చేసే సామర్థ్యాన్ని కలిగి ఉండటం వలన నేను వీటిలో పని చేయగలిగాను. మార్కెట్‌లో గెలవడానికి వీలు కల్పించే ఆవిష్కరణల సృష్టి మార్పును తెచ్చిపెట్టింది.
ప్రస్తుతం మీ బాధ్యతల గురించి మాకు చెప్పండి?
        గ్లోబల్‌ P&G బ్యూటీ R&D సంస్థ చర్మం, వ్యక్తిగత సంరక్షణ ఆవిష్కరణలపై దృష్టి సారించింది. ఇది ఓల్డ్‌ స్పైస్‌ వంటి బ్రాండ్‌ల కోసం ఉత్పత్తి, ప్యాకేజింగ్‌ అభివృద్ధిని కలిగి ఉంటుంది. బ్రాండ్‌ విజయానికి శాస్త్రీయ విశ్వసనీయత, లోతైన చర్మ అవగాహన చాలా కీలకం. సురక్షితమైన, ప్రభావవంతమైన పదార్థాలను ఎంచుకోవడానికి మేము ప్రాధాన్యం ఇస్తాము. ఉత్తమ ఉత్పత్తిని అందించడానికి చర్మవ్యాధి నిపుణులతో కలిసి పని చేస్తాము. మహిళలు వారి చర్మం, పరివర్తన లక్ష్యాలను చేరుకోవడానికి వీలు కల్పిస్తాము.
ఏవైనా ఆసక్తికరమైన అనుభవాలు ఉన్నాయా?
        నేను ప్రపంచవ్యాప్తంగా 600 మంది వ్యక్తులతో కూడిన సంస్థకు నాయకత్వం వహిస్తున్నాను. దాదాపు 50 శాతం మంది ఆసియాలో, 50 శాతం మంది యుఎస్‌లో ఉన్నారు. సహజంగానే విభిన్న శైలులు, సాంస్కృతిక, విద్యా నేపథ్యాలు కలిగిన వ్యక్తులను నేను పర్యవేక్షిస్తానని దీని అర్థం. వైవిధ్యం గొప్ప బలం అని నేను ప్రాథమికంగా నమ్ముతున్నాను. వ్యాపారాన్ని ప్రారంభించడానికి దీన్ని ఎలా ఉత్తమంగా ఉపయోగించుకోవాలో నేను నిరంతరం చూస్తున్నాను. వైవిధ్యం కొత్త ఆలోచనలను, సమస్యలను చేరుకోవడానికి కొత్త మార్గాలను చూపిస్తుంది.
మహమ్మారిలో ఎదురైన సవాళ్లను ఎలా ఎదుర్కొన్నారు?
        మహమ్మారి సమయంలో ప్రధాన సవాళ్లలో ఒకటి 'వర్క్‌ ఫ్రమ్‌ హోమ్‌'. పని, ఇంటి జీవితాన్ని సమతుల్యం చేయడం. నా టీమ్‌లో సగం మంది యుఎస్‌ వెలుపల ఉన్నందున చాలా రోజులు ఇలాగే గడిచిపోయింది. అయితే అత్యంత ప్రభావవంతంగా, సమర్ధవంతంగా ఉండాలంటే సరిహద్దులను నిర్వచించడం చాలా ముఖ్యం కాబట్టి నేను ఒత్తిడిని తగ్గించడానికి ప్రయత్నించాను. దానికి తగినట్టుగా సమయం కేటాయించుకుని పనిచేశాను. R&Dకి ప్రధానమైన శాస్త్రీయ ప్రయోగశాల పనిని ఎలా కొనసాగించాలనేది మరొక సవాలు. ప్రజలు ల్యాబ్‌లలోకి రావడానికి, సురక్షితంగా ఉండటానికి సరైన ప్రోటోకాల్‌లను ఏర్పాటు చేయగలిగాము. రొటేటింగ్‌, సీక్వెన్సింగ్‌ పనిని చేయగలిగాము. సరైన ప్రాధాన్యతలను సెట్‌ చేయడం, సర్దుబాటు చేయడం వంటి వాటిపై దృష్టి సారించాము. అంటే ఆఫీసులో కాకుండా ఇంట్లో వారి ఫలితాలను విశ్లేషించమని ప్రజలను అడగడం.
STEM పాత్రల్లోకి ఎక్కువ మందిని ఆకర్షించడానికి ఏమి చేయాలి?
        దీనికి రోల్‌ మోడల్స్‌ చాలా ముఖ్యం. మీలాంటి వ్యక్తి విజయం సాధించడాన్ని మీరు చూస్తే, అదే విజయాన్ని మీరు కోరుకునే అవకాశం ఉందని నేను నమ్ముతున్నాను. వాస్తవానికి ఇది సాధ్యమేనని చూపించడానికి వారు రెండింటినీ ఎలా బ్యాలెన్స్‌ చేయగలుగుతున్నారో ప్రదర్శించగల రోల్‌ మోడల్‌ను కలిగి ఉండటం చాలా అవసరం. కుటుంబ జీవితం, పనిని బ్యాలెన్స్‌ చేయడం విషయానికి వస్తే వ్యక్తిగత కారణాల వల్ల వారు విరామం తీసుకున్నప్పటికీ విజయం సాధించగలరని వారికి చూపించడం కూడా ముఖ్యమని నేను నమ్ముతున్నాను. నా బృందంలో ఇప్పుడు వారానికి నాలుగు రోజులు పని చేయడానికి ఎంపిక చేసుకున్న వ్యక్తి ఉన్నారు. అయినప్పటికీ ఇది వారి విజయానికి దూరంగా ఉండకూడదనే వాస్తవం గురించి నేను చాలా ఉద్దేశపూర్వకంగా ఉన్నాను.
మీ అతిపెద్ద విజయాలు, సవాళ్లు ఏమిటి?
        నేను R&D  లో ఉండటం వల్ల ఎప్పుడూ ప్రశాతంగా ఉండలేకపోయానని చెబుతాను. అది సైన్స్‌, అందానికి సంబంధించినది కాబట్టి ఎప్పుడూ ఏదో తప్పు జరుగుతుంది. నా అతిపెద్ద విజయాలు మార్కెట్‌లో పురోగతి ఆవిష్కరణలను అందించడం. దీనికి గొప్ప ఉదాహరణ Olayలో మా ఇటీవలి ఆవిష్కరణ. కొత్త Olay కొల్లాజెన్‌ పెప్టైడ్‌ 24 కలెక్షన్‌. ఈ శ్రేణి శాస్త్రీయంగా అధునాతన జీవ లభ్యత కొల్లాజెన్‌ పెప్టైడ్‌ ద్వారా శక్తిని పొందుతుంది. ఇది ప్రత్యేకంగా సవరించబడింది. తద్వారా ఇది చర్మం ద్వారా సులభంగా గ్రహించబడుతుంది. అంటే రోజంతా చర్మాన్ని ప్రకాశవంతంగా, ఉత్సాహంగా ఉండేలా చూస్తుంది.
మీ సంస్థను నిర్మించడంలో మీరు ఎలాంటి సవాళ్లను ఎదుర్కొన్నారు. ముఖ్యంగా కార్పొరేట్‌ అమెరికాలో మైనారిటీలో ఉండే భారతీయ సంతతికి చెందిన మహిళగా?
           అత్యంత ముఖ్యమైన విషయం ఏమిటంటే సాంస్కృతిక కోడ్‌లను అర్థం చేసుకోవడం. అలాగే ప్రభావం, ప్రామాణికమైనదిగా భావించే విధంగా తెలివిగా వాటిని స్వీకరించడం. అధికారం/పెద్దలను గౌరవించే సంస్కృతిలో పెరిగిన నాకు పురుషాధిక్యత, ప్రధానంగా కాకేసియన్‌ సంస్థలో నన్ను నేను నిరూపించుకోవడం అతిపెద్ద సవాళ్లలో ఒకటి. ఈ సాంస్కృతిక కోడ్‌లను అర్థం చేసుకోవడం, గమనించడం వల్ల నేను గౌరవప్రదమైన రీతిలో మాట్లాడగలిగాను. నేనూ అదే గౌరవాన్ని పొందగలిగాను. అలాగే ప్రభావవంతంగా ఎలా ఉండాలో, కష్టసమయంలో బెదిరిపోకుండా ఎలా ఉండాలో నేర్చుకున్నాను.
STEMలో నాయకత్వ స్థానాల్లో చాలా తక్కువ మంది మహిళలు ఉన్నారని మీరు ఎందుకు అనుకుంటున్నారు?
           దీనికి రెండు కారణాలు ఉన్నాయని నేను నమ్ముతున్నాను. రోల్‌ మోడల్స్‌ లేకపోవడం, సంస్థాగత మద్దతు. మహిళలు తమను స్ఫూర్తిగా తీసుకుని, విజయం సాధించగల ఇతర మహిళలను చూడకపోతే వారు విజయం సాధిస్తారని ఎలా నమ్ముతారు? ఎక్కువ మంది మహిళలు అగ్రస్థానానికి నావిగేట్‌ చేస్తున్నప్పుడు మరింత పురోగతి వస్తుంది. ఇది ఒక ఉత్తేజకరమైన అవకాశం. దీనికి సమయం పడుతుంది. కానీ అది ఉద్దేశపూర్వకంగా ఉండాలి. రెండవది, సరైన వ్యవస్థలు, విధానాలను అమలు చేయడంతో సంస్థలు లింగ సమానత్వాన్ని చురుకుగా చేయడం. కెరీర్‌లో మహిళలకు మద్దతు ఇవ్వడం చాలా ముఖ్యం. P&Gలో మేము మెరుగైన వేతనంతో కూడిన పేరెంటల్‌ లీవ్‌, 'ఫ్లెక్స్‌ ఎట్‌ వర్క్‌' పాలసీ వంటి కుటుంబ సభ్యులను కలుపుకొని పాలసీలను ప్రవేశపెట్టాము. సీనియర్‌ పాత్రల కోసం స్లేట్‌లలో మహిళలకు మెరుగైన ప్రాతినిధ్యం కల్పించడం గురించి కూడా మేము అనుకూలంగా ఉన్నాము. వాస్తవానికి ఉద్యోగం కోసం ఎవరు సరైన ఫిట్‌గా ఉంటారో నిర్ణయం తీసుకోవాల్సి ఉంటుంది. అయితే పరిగణించబడిన ఎంపికలలో మరింత సమతుల్య ప్రాతినిధ్యాన్ని నిర్ధారించడం ఒక ముఖ్యమైన ముందడుగు. ఈక్విటీ, సమానత్వం మధ్య వ్యత్యాసం ఉంది. మహిళలకు అవకాశాలు కల్పించడం అనేది చాలా ముఖ్యం.
ప్రతి సంస్థకు సమాన అవకాశాల ఆలోచన ఎందుకు ఉండాలి?
           ఉత్తమ పరిష్కారాలను పొందడానికి నైపుణ్యాలు, ఆలోచన ప్రక్రియల వైవిధ్యం అవసరం. ఏకరూపమైన సంస్థ ఎప్పటికీ పురోగతి సాధించదు. ఇది ఏ సంస్థకైనా వర్తిస్తుంది. కానీ సైన్స్‌లో ముఖ్యంగా క్లిష్టమైనది. ఎందుకంటే మేము ఎల్లప్పుడూ సమస్యను కొత్త ఆలోచనలతో విభిన్న మార్గాలతో యథాతథ స్థితిని సవాలు చేయాలని చూస్తున్నాము. నేటి డైనమిక్‌, ఎప్పటికప్పుడు మారుతున్న ప్రపంచంలో ఆలోచనలు ఎక్కడి నుండైనా రావచ్చు. అలా రావాలి కూడా. సంస్థలు స్త్రీలు, పురుషులు సమానంగా ఉన్నప్పుడు మాత్రమే ఎక్కువ ఆలోచనలు, అర్ధవంతమైన ప్రభావాన్ని చూపే అవకాశం ఉంటుందని నా నమ్మకం.