కుటుంబ బాధ్యతను నిర్వహించే క్రమంలో మహిళలు తమ కోసం తాము సమయాన్ని కేటాయించుకోలేకపోతున్నారు. చాలా సార్లు జిమ్‌ లేదా యోగా క్లాస్‌లలో చేరడానికి సమయం ఉండదు. కానీ ఆరోగ్యంగా, యవ్వనంగా ఉండటానికి తప్పనిసరిగా కొంత వ్యాయామం చేయాలి. వ్యాయామం చేయడానికి ప్రతిరోజూ 15 నిమిషాలు మీ కోసం కచ్చితంగా తీసుకోండి. మీకు కావాలంటే ఇంట్లో ఉంటూనే మీ ఫిట్‌నెస్‌ లక్ష్యాలను నెరవేర్చుకోవచ్చు. కేవలం 15 నిమిషాల్లో చేయగలిగే చాలా సులభమైన వ్యాయామాలు ఎన్నో ఉన్నాయి. వాటిలో కొన్ని ఈరోజు మీకోసం. ఇలా చేయడం వల్ల ఫిట్‌గా ఉండటమే కాకుండా బరువు కూడా అదుపులో ఉంటుంది.
రన్నింగ్‌: ఎక్కువసేపు ఫిట్‌గా ఉండటానికి మీ దినచర్యలో కచ్చితంగా 15 నిమిషాల నడక లేదా పరుగును చేర్చుకోండి. మీకు కావాలంటే ఇంట్లో లేదా తోటలో లేదా సమీపంలోని పార్కుకు వెళ్లడం ద్వారా రన్నింగ్‌ చేయవచ్చు. ఇది మీకు స్వచ్ఛమైన గాలిని అందిస్తుంది. దీనివల్ల మీ రక్త ప్రసరణ బాగా జరుగుతుంది. ఈ విధంగా మీరు క్రమంగా మీ బరువును తగ్గించుకోవచ్చు.
పుష్‌ అప్స్‌: ఇది ఇంట్లోనే చేయగలిగే సులభమైన, చాలా ప్రభావవంతమైన వ్యాయామం. ప్రతిరోజూ 15 నిమిషాలు మాత్రమే పుష్‌ అప్స్‌ చేయాలి. దీని కోసం నేలపై ఒక చాప వేసి కూర్చోండి. ఇప్పుడు మీ పాదాలను టేబుల్‌ లేదా బెడ్‌ కింద ట్రాప్‌ చేయడం ద్వారా పుష్‌ అప్స్‌ చేయండి. ఇది మీ కండరాలను బలపరుస్తుంది. బరువును సమతుల్యం చేయడంలో కూడా సహాయపడుతుంది.
సైడ్‌ లెగ్‌ ఎక్సర్‌సైజ్‌: కాళ్లు స్లిమ్‌గా చేయడానికి ఈ వ్యాయామం చేయండి. ఇంట్లో సైడ్‌ లెగ్‌ వ్యాయామాలు సులభంగా చేయవచ్చు. చాప మీద కూర్చుని ఈ వ్యాయామం చేయండి. ఇది మీ తొడల మీద పేరుకుపోయిన కొవ్వును తగ్గించి కాళ్ళు అందంగా అయ్యేలా చేస్తుంది.
బ్రిడ్జ్‌ ఎక్సర్‌సైజ్‌: ఇంట్లో పనిచేసే సమయంలో మహిళలు తరచుగా వెన్నునొప్పితో బాధపడుతుంటారు. కాబట్టి ఇది మంచి వ్యాయామం. ఇది బరువు తగ్గడానికి కూడా సహాయపడుతుంది. వెన్నునొప్పికి ఉపశమనం ఇస్తుంది. నేలపై పడుకుని, ఆపై నడుమును పైకి ఎత్తి బ్రిడ్జ్‌ పొజిషన్‌కు రావాలి. మీ చేతులను పక్కన ఉంచి, తుంటిని కొద్దిగా పైకి లేపండి. మీ కాలు నిటారుగా చాచి, ఆపై పైకి చాచి కిందికి తీసుకురండి. మరో కాలుతో కూడా ఇలాగే చేయండి.
