చాలా మంది పీరియడ్స్‌ రావడాన్ని యుక్తవయసు ప్రారంభం అని పొరబడుతుంటారు. కానీ రొమ్ము, ప్రైవేట్‌ పార్ట్‌ దగ్గర వెంట్రుకలు అభివృద్ధి చెందడం యుక్తవయసు మొదటి సంకేతం. గతంలో 8 ఏండ్ల వయసులోపు యుక్తవయసు సంకేతాలు కనిపించడం అసాధా రణంగా పరిగణించబడేది. కానీ నేటి కాలంలో 15 శాతం మంది అమ్మాయిలు ఏడేండ్లకే మెచూర్‌ అవుతున్నారు. 10 శాతం మంది అమ్మాయిలకు ప్రైవేట్‌ పార్ట్‌లో వెంట్రుకలు రావడం ప్రారంభమవుతాయి. 8 ఏండ్ల వయసులో 25 శాతం మంది బాలికల రొమ్ము పరిమాణం పెరగడం ప్రారంభమవుతుంది.
పరిశోధనల ప్రకారం: మౌంట్‌ సినారు హాస్పిటల్‌, యూనివర్శిటీ ఆఫ్‌ సిన్సినాటి మెడికల్‌ సెంటర్‌ నిర్వహించిన ఒక అధ్యయనంలో యుక్తవయసు ప్రారంభమైనప్పుడు ఊబకాయం వచ్చే ప్రమాదం గణనీయంగా పెరుగుతుందని కనుగొన్నారు. కొవ్వు చాలా చురుకైన హార్మోన్‌ గ్రంథి, కొవ్వు కణాలు ఇతర హార్మోన్లను ఈస్ట్రోజెన్‌గా మారుస్తాయి. బాలికలలో ఎక్కువ కొవ్వు కణజాలం కారణంగా, యుక్తవయసు ప్రారంభమయ్యే అవకాశం గణనీయంగా పెరుగుతుంది. అయితే దీనిపై పరిశోధకులు మాట్లాడుతూ యుక్తవయసు తొందరగా రావడానికి ఊబకాయం ప్రధాన కారణమా లేక దాని వెనుక మరేదైనా కారణం ఉందా అనేది తమకు తెలియదని అంటున్నారు.
ఒత్తిడి కారణంగా: దీనికి సంబంధించి అనేక పరిశోధనలు జరిగాయి. ఇందులో ఒత్తిడి, యుక్తవయసు ప్రారంభానికి మధ్య సంబంధం కనుగొన్నారు. గృహ హింసతో, ఇంట్లో తండ్రి లేకుండా పెరిగే అమ్మాయిలకు ఇతర అమ్మాయిల కంటే ముందుగా పీరియడ్స్‌ వచ్చే అవకాశం ఉందని పరిశోధకులు భావిస్తున్నారు. ఒత్తిడితో ఎక్కువ సమయం గడిపినప్పుడు మెదడు వీలైనంత త్వరగా పునరుత్పత్తిని ప్రారంభిస్తుంది. పునరుత్పత్తికి ప్రేరేపించే హార్మోన్లు మెదడులో అభివృద్ధి చెందుతాయి. ఈ హార్మోన్లు ప్రారంభ యుక్తవయసుకు కారణమవుతాయి. ఎక్కువ స్క్రీన్‌ని ఉపయోగించడం, తక్కువ నిద్రపోవడం యుక్తవయసుపై ఏదైనా ప్రభావం చూపుతుందా అనే పరిశోధనలు కూడా జరుగుతున్నాయి.
బహిరంగంగా మాట్లాడండి: అమ్మాయి యుక్త వయసులో ఉంటే ఆమె శరీరంలోని మార్పుల గురించి సులభమైన భాషలో చెప్పడం చాలా ముఖ్యం. ఈ దశలో ప్రతి ఒక్కరూ ఈ విషయాలన్నింటినీ ఎదుర్కోవలసి ఉంటుందని వారు అర్థం చేసుకోవడం చాలా ముఖ్యం. అయితే ఇదిసాధారణం కాబట్టి భయపడాల్సిన అవసరం లేదు. శరీరంలో జరుగుతున్న మార్పుల గురించి వారికి మంచిగా అనిపించేలా మాత్రమే చెప్పండి.
వయసును బట్టి: యుక్తవయసు ప్రారంభమైనప్పటికీ ఆమెను పెద్దవారిలా చూడకుండా జాగ్రత్త వహించండి. వయసు ప్రకారం ఆమెను ట్రీట్‌ చేయడం చాలా ముఖ్యం. చాలా మంది తల్లిదండ్రులు అమ్మాయిలను బట్టల విషయంలో వేధిస్తారు. ఇది వారికి అసౌకర్యంగా ఉంటుంది. వారి విశ్వాసం కూడా బలహీనపడటానికి కారణమవుతుంది. వయసు ప్రకారం దుస్తులు ధరించాలి కానీ పరిమాణం ప్రకారం కాదు. ముఖ్యం. అలాగే తన వయసులో ఉన్న అమ్మాయిలు చూడటానికి ఇష్టపడే వాటిని చూడనివ్వండి. ఆమె మానసిక, శారీరక ఆరోగ్యంపై దృష్టి కేంద్రీకరించండి. యుక్తవయసు ప్రారంభంతో బిడ్డ పరిపక్వత చెందడం ప్రారంభిస్తుంది. కాబట్టి మీరిద్దరూ కలిసి చేయగలిగే కొన్ని కార్యకలాపాలను గుర్తించండి. గరిష్ట సమయాన్ని కలిసి గడపండి.