ఐశ్వర్య డోంగ్రే... తిరువనంతపురం నుండి కొచ్చికి లైవ్‌ హార్ట్‌ ఎయిర్‌లిఫ్ట్‌ను పర్యవేక్షించడంలో ప్రసిద్ధి చెందారు. ఇప్పుడు ఆమె త్రిసూర్‌ రూరల్‌ సూపరింటెండెంట్‌ ఆఫ్‌ పోలీస్‌. మాదకద్రవ్యాల అక్రమ రవాణాపై పోరాడుతున్నారు. అలాగే మహిళల, పిల్లల భద్రత కోసం ఎన్నో కార్యక్రమాలను ప్రవేశపెడుతున్నారు. సమాజంలో మనం కోరుకున్న మార్పు చూడాలనుకుంటే ఆ మార్పు ముందు మనలో రావాలి అంటున్న ఆమె పరిచయం నేటి మానవిలో...
          సమయం సాయంత్రం 5 కావొస్తుంది. త్రిసూర్‌ రూరల్‌ పోలీసు సూపరింటెండెంట్‌ కార్యాలయం కార్యకలాపాలతో సందడి చేస్తోంది. ఐశ్వర్య డోంగ్రే అప్పుడు మధ్యాహ్న భోజనానికి బయలుదేరారు. ఆమె పని ప్రతి రోజు ఉదయం 7 గంటలకు ప్రారంభమై ఇలాగే ఆలస్యంగా ముగుస్తుంది. సమయానికి భోజనం చేయడం అనేది ఆమె ఆఫీసుకు సెలవు పెట్టినప్పుడు మాత్రమే జరుగుతుంది. ఆమె సహాయకురాలు సంగీత, ఐశ్వర్య చుట్టూ తిరుగుతూ ఆ రోజు పెండింగ్‌లో ఉన్న పనుల గురించి ఆమెకు గుర్తు చేస్తుంది. ఐశ్వర్య మలయాళంలో అనర్గళంగా మాట్లాడగలరు. ''మనం ప్రజలకు దగ్గర కావాలంటే వారి భాష మాట్లాడటం, వారిని అర్థం చేసుకోవడం నేర్చుకోవాలి. ఎవరైనా అనువాదం చేస్తే చాలా విషయాలు కోల్పోవచ్చు'' అంటారు ఆమె.
అత్యంత చిన్న వయసులోనే
          ఐశ్వర్య తన మొదటి ప్రయత్నంలోనే UPSC పరీక్షలలో 196 ఆల్‌ ఇండియా ర్యాంక్‌తో ఉత్తీర్ణత సాధించారు. ఇండియన్‌ పోలీస్‌ సర్వీస్‌ (ఐపీఎస్‌) కేరళ కేడర్‌లో చేరి ఇప్పటికి ఐదేండ్లు. ముంబైలో పుట్టి పెరిగిన ఆమె సెయింట్‌ జేవియర్స్‌ కాలేజీలో ఎకనామిక్స్‌, పొలిటికల్‌ సైన్స్‌లో డబుల్‌ మేజర్‌ పూర్తిచేశారు. UPSC పరీక్షలకు సిద్ధం కావడానికి ఒక సంవత్సరం సెలవు తీసుకున్నారు. సర్వీసులో చేరినప్పుడు ఆమె వయసు కేవలం 22 ఏండ్లు. తిరువనంతపురంలో బ్రెయిన్‌ డెడ్‌ అయిన రోగి నుండి సజీవ గుండెను కొచ్చిలో మార్పిడి కోసం కేవలం 35 నిమిషాల్లో రవాణా చేసే విధానాన్ని ఆమె పర్యవేక్షించారు. అలాగే మహమ్మారి సమయంలో సహాయక చర్యలను కూడా పర్యవేక్షించారు. ప్రస్తుతం 27 ఏండ్ల ఐశ్వర్య మహిళలు, పిల్లల కోసం వివిధ భద్రతా కార్యక్రమాలు నిర్వహించడంలో, సైబర్‌ బెదిరింపులు నిరోధించడంలో ముందంజలో ఉన్నారు. శాంతిభద్రతలను నిర్వహించడం, మాదకద్రవ్యాల నిర్మూలించడంలో కూడా ప్రధాన పాత్ర పోషిస్తున్నారు.
లోతైన నీటిలో విసిరివేయబడింది
          ఆమె మొదటి పోస్టింగ్‌ 2019లో తిరువనంతపురంలోని శంఖుముఖం ప్రాంతంలో అసిస్టెంట్‌ కమీషనర్‌ ఆఫ్‌ పోలీస్‌. ఆ తర్వాత కొన్ని నెలల తర్వాత కోవిడ్‌ అలుముకుంది. అప్పుడే ఆమె లోతైన నీటిలో పడవేయబడి ఈత నేర్చుకుంది. కానీ ఒంటరిగా కాదు అని ఆమె తన అనుభవాన్ని గుర్తుచేసుకుంది. విమానాశ్రయం కూడా తన పరిధిలోకి వచ్చినందున ఐశ్వర్య ఉదయం 6 గంటల నుండి అర్ధరాత్రి వరకు వివిధ దేశాల నుండి భారతీయులను తీసుకువచ్చే వందే భారత్‌ విమానాల కార్యకలాపాలను పర్యవేక్షిస్తున్నారు.
కోవిడ్‌ అనుభవాలు సహాయం చేశాయి
          ''ప్రారంభ దశల్లో మాకు చాలా మంది వ్యక్తులు వచ్చారు. వృద్ధులు, గర్భిణీ స్త్రీలకు మొదటి ప్రాధాన్యం ఇచ్చాము. వారితో కనెక్ట్‌ అవ్వడం, పరిస్థితి తీవ్రతను వారికి అర్థమయ్యేలా చేయడం, అత్యంత ప్రతికూల పరిస్థితుల్లో, వివిధ జిల్లా యంత్రాంగాలు ఎలా కలిసి పనిచేస్తాయో చూడడానికి ఒక గొప్ప అవకాశం అది'' అని అంటున్నారు. ఐశ్వర్య కూడా ఆ ప్రాంతం మతపరంగా, రాజకీయంగా సున్నితమైనదని, ఇక్కడ ప్రజలు చాలా భయాందోళనలతో వీధుల్లోకి వచ్చారని చెప్పారు. కానీ కోవిడ్‌కు ముందు ప్రజలతో ఆమె అనుభవం ఆ తర్వాత కాలంలో కష్టమైన పరిస్థితులను ఎదుర్కొనేలా చేసింది. ఆమె తరచుగా ఆ ప్రాంతంలోని కమ్యూనిటీల మత పెద్దలతో సమయం గడిపేవారు. అందుకే అక్కడి వారికి ఆమె సుపరిచితం.
అర్థం చేసుకోవడం చాలా ముఖ్యం
          ''ప్రజలు పెద్ద సంఖ్యలో బయటకు వచ్చినప్పటికీ వారు నాపై నమ్మకం ఉంచారు. అవాంఛనీయ సంఘటనలు నివారించబడ్డాయి. ఆ సమయంలో అతిథి కార్మికులు (వలసదారులు) ఆందోళనలు చేశారు. హిందీలో మాట్లాడగలను కాబట్టి కోపంగా ఉన్న వారు నా మాట విన్నారు. మాకు బలాన్ని ఉపయోగించుకునే అవకాశం ఉంది. కానీ వారి ఆందోళనకు కారణాన్ని అర్థం చేసుకోవడం చాలా ముఖ్యం'' అన్నారు ఆమె. శంకుముఖంలో తన పోస్టింగ్‌ ముగిసే సమయానికి ఐశ్వర్య ఒక మార్పిడి కోసం తిరువనంతపురం నుండి కొచ్చికి లైవ్‌ హార్ట్‌ ఎయిర్‌లిఫ్ట్‌లో పాల్గొన్నారు. సవాలుతో కూడిన ఆ పరిస్థితిని గుర్తుచేసుకుంటూ ''నేను విమానాశ్రయానికి ACP  ఇన్‌ఛార్జ్‌గా ఉన్నాను. ఆసుపత్రి నుండి విమానాశ్రయానికి వెళ్లే మార్గాన్ని ముందు గ్రీన్‌ కారిడార్‌గా మార్చాలి. తద్వారా అంబులెన్స్‌కు దారి దొరుకుతుంది. మేము వైద్య బృందంతో సమన్వయం చేసుకోవాలి. మా వద్ద కేరళ పోలీసు హెలికాప్టర్‌ ఉంది. 35 నిమిషాల్లో గుండెను రవాణా చేయడంలో అది కేవలం మాకు సహాయపడింది. నిజం చెప్పాలంటే ఇది ఎవరి హృదయమో నాకు తెలియదు. ఎందుకంటే మీరు మీ కర్తవ్యాన్ని నిర్వర్తిస్తున్నారని మీకు తెలిసినంత వరకు మీరు ఎవరి కోసం చేస్తున్నారో లేదా ఎందుకు చేస్తున్నారో పట్టింపు లేదని నేను నమ్ముతున్నాను'' అన్నారు.
ఎంత నేర్చుకుంటే అంత మంచిది
          తిరువనంతపురంలో ఏడాదిన్నర తర్వాత ఐశ్వర్య డిప్యూటీ కమీషనర్‌ ఆఫ్‌ పోలీస్‌, లా డ ఆర్డర్‌, క్రైమ్స్‌, ట్రాఫిక్‌, కొచ్చిగా పోస్ట్‌ చేయబడ్డారు. ఇక్కడ ఆమె బాధ్యతలు కోర్‌ అర్బన్‌ పోలీసింగ్‌ నుండి కోస్టల్‌ పోలీసింగ్‌ వరకు ఉన్నాయి. సైబర్‌ సెక్యూరిటీ, మహిళలకు సంబంధించిన పిటిషన్లు, సాను మోహన్‌ కేసు కూడా ఆమె పరిధిలోనే ఉంది. ''ఆ కేసు విషయంలో బృంద విచారణ అద్భుతమైన ప్రతిభకు ఉదాహరణ. ఎందుకంటే కొంతమంది జూనియర్‌ అధికారులు చేసిన కృషి అద్భుతమైనది. అనుభవజ్ఞులైన వ్యక్తుల నుండి మీరు ఎంత ఎక్కువ నేర్చుకుంటే, అది పోలీసింగ్‌కు మెరుగైన సంస్కరణగా మారుతుంది'' అని ఆమె అంటున్నారు.
కేరళ పోలీసులు అంకిత భావంతో ఉన్నారు
          ఐశ్వర్య ఈ ఏడాది జనవరిలో రూరల్‌ ఎస్పీగా త్రిసూర్‌కు వెళ్లారు. మాదకద్రవ్యాల అక్రమ రవాణాకు వ్యతిరేకంగా పోరాడుతూ ఇప్పటికి ఎనిమిది నెలలు గడిచిందని ఆమె చెప్పారు. ఇది కేంద్రీకృతమైన, కొనసాగుతున్న ప్రయత్నం. వీరి బృందం వెయ్యి కిలోగ్రాముల కంటే ఎక్కువ డ్రగ్స్‌ను స్వాధీనం చేసుకుంది. ''మాదక ద్రవ్యాలకు వ్యతిరేకంగా మా పోరాటం చాలా కీలకమైనది. అలాగే ఏదైనా సమస్యలో ఉన్న వ్యక్తి చాలా సులభమైన పద్ధతిలో పోలీసులను సంప్రదించేలా చూడాలనుకుంటున్నాము. ఎల్లప్పుడూ పోలీసు స్టేషన్‌కు వెళ్లడం ఇందులో ఉండదు. మొత్తంగా కేరళ రాష్ట్ర పోలీసులు చాలా అంకితభావంతో ఉన్నారని నేను భావిస్తున్నాను. ఉదాహరణకు మేము దీనికి సహాయం చేయడానికి నిర్భయ వంటి ూఉూ బటన్‌లను ప్రారంభించాము. మేము అన్ని పోలీసు సేవలను ఒకే మొబైల్‌ అప్లికేషన్‌-పోల్‌ యాప్‌లో ఏకీకృతం చేసాము'' అని ఆమె వివరించారు.
జెండర్‌ అర్థం చేసుకోవడం చాలా కీలకం
          ఐశ్వర్య ఓపెన్‌ లెన్స్‌ నుండి లింగ వివక్షను అర్థం చేసుకోవడం, వారు చేసే పనిలో లింగ సున్నితత్వం ప్రధానమని నొక్కి చెబుతున్నారు. ''ఎప్పటి నుంచో మనకు లింగ వివక్ష ఆధారంగా నేరాలు ఉన్నాయి. ఇప్పుడు ట్రాన్స్‌జెండర్లపై కూడా నేరాలు జరుగుతున్నాయి. కాబట్టి చాలా ఓపెన్‌ లెన్స్‌ నుండి జెండర్‌ను అర్థం చేసుకోవడం చాలా కీలకం. మీరు మహిళల భద్రత గురించి మాట్లాడినప్పుడల్లా మహిళా పోలీసు సిబ్బంది మాత్రమే ఉండాలని చాలా మంది నమ్ముతారు. ఏ రకమైన సమస్యకైనా పోలీసులు ఒకే విధంగా స్పందిస్తారు కాబట్టి ఇది చాలా పెద్ద సమస్య అని నేను భావిస్తున్నాను.''
పాఠశాలల్లో అవగాహన
          పిల్లలపై నేరాలు పెరుగుతున్నాయని, చాలావరకు కుటుంబ సభ్యులచే నేరాలు జరుగుతున్నాయని ఆమె అంటున్నారు. చైల్డ్‌ వెల్ఫేర్‌ కమిషన్‌, క్రియాశీల చైల్డ్‌లైన్‌ వంటి కార్యక్రమాలు, నెలవారీ సమావేశాలు త్వరిత చర్యకు సహాయపడ్డాయి. పిల్లలు మాట్లాడటం అభినందనీయమని, విద్యాశాఖ, పోలీసులతో పాటు పాఠశాలల్లో అనేక అవగాహన కార్యక్రమాలు, కౌన్సెలింగ్‌లు నిర్వహించడం వల్లనే ఇలా జరుగుతోందని ఐశ్వర్య చెప్పారు. 350 పాఠశాలల్లో స్కూల్‌ ప్రొటెక్షన్‌ గ్రూపులు ఉన్నాయి. ఇందులో పోలీసు లైజన్‌ ఆఫీసర్‌ దుర్వినియోగ కేసులను గుర్తించి అవగాహన కల్పించేందుకు పాఠశాల అధికారులతో టచ్‌లో ఉంటారు. సైబర్‌ బెదిరింపులను అరికట్టేందుకు పాఠశాలల్లో సైబర్‌ సెక్యూరిటీ క్లబ్‌లు ఏర్పాటు చేశారు. ఇందులో విద్యార్థి ప్రతినిధులు సమావేశమవుతారు. సైబర్‌ సెల్‌, కొచ్చిలో, ఐశ్వర్య సైబర్‌ సిమ్యులేషన్‌ రూమ్‌ను సృష్టించారు.

ఎవరితోనూ పంచుకోలేకపోతున్నారు
          ఈ రోజుల్లో చాలా మంది మహిళలు సేవలోకి రావాలని కోరుకోవడం నేను చూస్తున్నాను ఎందుకంటే మీకు ఏదైనా సమస్యకు సమతుల్య కోణం అవసరం. కేరళ పోలీసుల జనమైత్రి ప్రాజెక్ట్‌లో భాగంగా నేను అనేక గిరిజన కుగ్రామాలను సందర్శించాను. వారు ఒక మహిళా పోలీసు అధికారిని చూసినప్పుడు నాతో మాట్లాడాలని కోరుకుంటున్నారు. చాలా మంది అమ్మాయిలు తమ అనుభవాలను ఎవరితోనూ పంచుకోలేకపోతున్నారు. ప్రజలు స్త్రీలను సానుభూతి, కరుణతో అనుబంధించడమే దీనికి కారణమని నేను భావిస్తున్నాను. కాబట్టి ఈ ఆలోచనలో మార్పు రావాలి.
- ఐశ్వర్య డోంగ్రే, ఐపీఎస్‌