సోషల్‌ ఫోబియాగా సాధారణంగా యుక్త వయసులో మొదలవుతుంది. శుభకార్యాలు, కాలేజీ కార్యక్రమాలకు హాజరు కావడానికి ఆసక్తి లేనట్టు అనిపించడం... పదిమంది మధ్యలో ఉన్నప్పుడూ ఒంటరిగా, దిగులుగా ఎవరితోనూ కలవకుండా ఉండటం దీని లక్షణాలే. దీన్నుంచి బయటపడలేకపోతే జీవితాంతం ప్రభావితం చేస్తూనే ఉంటుంది.
ఈ లక్షణం చాలా నష్టాలను తెచ్చిపెడుతుంది. మానవ సంబంధాలు ఏర్పడవు. నలుగురితో కలిసి జీవించడమనే నైపుణ్యం రాదు. ఉద్యోగ బాధ్యతల్లో బృందంతో కలిసి పని చేయలేరు. ఫలితంగా కెరియర్‌లో పురోభివృద్ధి ఉండదు. ఇలాకాకుండా ఉండాలంటే, న్యూనతగా అనిపిస్తున్నా, ప్రతికూల ఆలోచనలు వస్తున్నా ఒంటరిగా ఉండొద్దు. నలుగురిలోకి వెళ్లండి. మాట్లాడలేకపోయినా, వారు చెప్పేది వింటూ ఉండాలి. స్నేహితులకు మీ సమస్యను చెప్పి, వారి సహాయం తీసుకోవాలి. కాలేజీ కార్యక్రమాలకు హాజరు కావాలి. వేదికపై ప్రసంగాలను వినడానికి ఆసక్తి తెచ్చుకోవాలి. ప్రతి అంశంపైనా అవగాహన పెంచుకోవాలి. దీంతో నాకేమీ తెలియదు అనే భావన నుంచి కొంతైనా తెలుసనే ఆలోచన కలిగి ధైర్యమొస్తుంది. రోజూ వ్యాయామాలతోపాటు యోగా, ధ్యానం అలవరుచుకోవాలి. ఇవి శారీరక, మానసికస్థైర్యాన్నిస్తాయి. అవసరమైతే నిపుణులను సంప్రదించాలి. అప్పుడే ఈ ఫోబియాను జయించి జీవితంలో, కెరియర్‌లో రాణించొచ్చు.
