చదువుకు వయసుతో సంబంధముందా అంటే లేదని నిరూపించారు ఎంతోమంది మహిళలు. మరి, కెరియర్‌ను వయసుతో ముడిపెచ్చట్టా అంటే.. కూడదంటున్నారు నిపుణులు. వయసు మీరుతున్నా.. ఆసక్తిని బట్టి ఆయా రంగాల్లో స్థిరపడడానికి ప్రస్తుతం బోలెడన్ని అవకాశాలున్నాయంటున్నారు. ఈ నేపథ్యంలో 50 దాటిన మహిళలకు అందుబాటులో ఉన్న కొన్ని ఆదాయ మార్గాలేంటో తెలుసుకుందాం రండి..
టీచింగ్‌ చేయవచ్చు
             బోధన రంగమంటే చాలామంది మహిళలకు ఆసక్తి ఉంటుంది. అటు ఆదాయంతో పాటు ఇటు గౌరవప్రదమైన వృత్తి కావడమే ఇందుకు కారణం. అయితే వయసులో ఉన్న వాళ్లే కాదు.. కాస్త వయసు మీరుతున్నా టీచింగ్‌లో కొనసాగే మహిళల్ని మనం ఎక్కువగా చూస్తుంటాం. మీకూ ఈ రంగమంటే ఆసక్తి ఉందా? అయితే దీన్నే మీ ఆదాయ మార్గంగా మలచుకోవచ్చు. మీకు నచ్చిన సబ్జెక్ట్‌ను ఎంచుకొని స్కూల్లో టీచర్‌గానైనా చేరచ్చు.. లేదంటే పార్ట్‌టైమ్‌గా ట్యూషన్స్‌ అయినా చెప్పచ్చు. ఈ రెండూ వద్దనుకున్న వాళ్లు కౌన్సెలర్‌గానైనా చేరవచ్చు. తద్వారా పిల్లలకు కెరియర్‌ విషయంలో సలహాలివ్వచ్చు. అయితే వీటిలో ఏ మార్గాన్ని ఎంచుకున్నా.. ఆయా అంశాల్లో వస్తోన్న మార్పుల్ని అవగాహన చేసుకుంటూ ఎప్పటికప్పుడు అప్‌డేట్‌ అయితే మీ కెరియర్‌ బాగుంటుందని గుర్తుపెట్టుకోండి.
వ్యాపారం ఇష్టమైతే...
             కొంతమందికి వ్యాపారమంటే మక్కువ ఉంటుంది. కానీ ఉద్యోగం, పిల్లల బాధ్యత, ఇతర వ్యక్తిగత కారణాల రీత్యా అది కుదరకపోవచ్చు. అదే 50 దాటాక ఆయా విషయాల్లో కాస్త ఊరట లభించచ్చు. ఖాళీ సమయం దొరకచ్చు. మీ అభిరుచులపై దృష్టి పెట్టడానికి ఇదే సరైన సమయం అంటున్నారు నిపుణులు. ఈ కాబట్టి వంటలు, బేకింగ్‌, క్రాఫ్టింగ్‌, డే-కేర్‌ సర్వీసెస్‌, ఇంటీరియర్‌ డిజైనర్‌, పెట్‌ సిట్టర్‌.. ఇలా ఆలోచిస్తే బోలెడన్ని మార్గాలు దొరుకుతాయి. ఇవన్నీ కాకుండా.. వ్యక్తిగత అభిరుచినే వ్యాపారంగానూ మలచుకోవచ్చు. ఇలా మీరు తయారుచేసిన ఉత్పత్తుల్ని ఆన్‌లైన్‌, సోషల్‌ మీడియాలో విక్రయించడం.. లేదంటే ఆఫ్‌లైన్‌ స్టోర్‌ ఏర్పాటుచేసుకోవడం.. మీ ఉత్పత్తులకు వచ్చే ఆదరణను బట్టి ఒక్కో మెట్టూ ఎక్కుతూ వెళ్లొచ్చు.
రియల్‌ ఎస్టేట్‌ ఇష్టమా..?
             కొంతమంది లేటు వయసులోనూ విభిన్న రంగాల్లో దూసుకుపోదామనుకుంటారు. అలాంటి వారు స్థిరాస్తి రంగాన్ని ఎంచుకోవచ్చంటున్నారు నిపుణులు. ఈ రంగంలో పూర్తి స్థాయి లేదా పార్ట్‌టైమ్‌గా కొనసాగే మహిళల సంఖ్య 60 శాతానికి పైమాటే అని గణాంకాలు చెబుతున్నాయి. కాబట్టి ఈ మార్గాన్ని ఎంచుకోవాలనుకునే వారు కమ్యూనికేషన్‌, నెట్‌వర్కింగ్‌, మార్కెటింగ్‌.. వంటి నైపుణ్యాల్ని పెంపొందించుకోవాలి. వీటితో పాటు స్థిరాస్తి రంగానికి సంబంధించిన కోర్సులు పూర్తి చేయడం, సంబంధిత అధీకృత సంస్థల్లో పేరు నమోదు చేసుకోవడం, ప్రొఫెషనల్‌ లైసెన్స్‌ పొందడం మంచిది.
వర్క్‌ ఫ్రం హౌమ్‌
             సాధారణంగా వయసు 50 దాటిన మహిళల్లో ఎక్కువమంది ఇంటి నుంచి పనిచేసే ఉద్యోగావకాశాలకే అధిక ప్రాధాన్యమిస్తుంటారు. అలాంటి వారికోసం ప్రస్తుతం బోలెడన్ని ఫ్రీలాన్సింగ్‌ జాబ్స్‌ అందుబాటులో ఉన్నాయంటున్నారు నిపుణులు. కాబట్టి మీకున్న నైపుణ్యాల్ని బట్టి కంటెంట్‌ రైటర్‌, డేటా ఎంట్రీ ఆపరేటర్‌, సోషల్‌ మీడియా మేనేజర్‌, వీడియో ఎడిటర్‌, ఈ-మెయిల్‌ మార్కెటర్‌, మొబైల్‌ యాప్‌ డెవలపర్‌, గ్రాఫిక్‌ డిజైనర్‌.. ఇలా చాలా ఆప్షన్లే ఉన్నాయి. కాబట్టి ఆయా కంపెనీలు అందించే ఈ అవకాశాల్ని అందిపుచ్చుకుంటే తిరుగు లేకుండా ముందుకు దూసుకెళ్లచ్చు. అయితే మీరు ఎంచుకున్న ఆప్షన్‌ని బట్టి అందులో నైపుణ్యాల్ని మెరుగుపరచుకోవడం, కొత్త టెక్నాలజీ విషయంలో ఎప్పటికప్పుడు అప్‌డేట్‌ అవడం.. వంటివీ కీలకం.
ఒకరి మనసు అర్థం చేసుకోగలరా..?
             మనసులో బాధ ఇతరులతో పంచుకుంటే తగ్గుతుందంటారు. మరి ఆ బాధ వినేవారెవరు? సమస్యకు తగ్గ పరిష్కారం ఇచ్చే వారెవరు? అది మీరే ఎందుకు కాకూడదు? అదెలా అంటారా? మెంటల్‌ హెల్త్‌ కౌన్సెలర్‌గా మారితే సరి. అవును.. 50 దాటిన వారికి ఇది చక్కటి ఆదాయ మార్గమంటున్నారు నిపుణులు. ఒత్తిడి, ఆందోళనలు పెరిగిపోతోన్న ఈ కాలంలో.. ఇలాంటి కెరియర్‌ ఆప్షన్‌ని ఎంచుకుంటే ఇటు మీకు ప్లస్‌ అవుతుంది.. అటు చాలామందికి ఈ మానసిక సమస్యల నుంచి ఉపశమనమూ కలుగుతుంది. అయితే ఇందుకు మీరు చేయాల్సిందల్లా.. దీనికి సంబంధించిన కోర్సులు పూర్తి చేయడం, లైసెన్స్‌ పొందడం వంటివి చేస్తే చాలు.