యవ్వనంలో ఉన్నప్పుడు ప్రేమ, డేటింగ్‌.. వంటి వాటికి త్వరగా ఆకర్షితులవుతుంటారు పిల్లలు. ఇందుకు ఆ వయసులో హార్మోన్ల ప్రభావం కావచ్చు. లేదంటే తోటి పిల్లలు, తెలిసిన వారిని చూసి తామూ అలా చేయాలనుకోవచ్చు. ఇలా కారణమేదైనా.. ఇలాంటి అనుబంధాల గురించి వారికి సరైన అవగాహన లేకపోవడం.. ఏది మంచో, ఏది చెడో తెలియకపోవడం వల్ల వాళ్లు తప్పుడు మార్గాన్ని ఎంచుకునే ప్రమాదం ఉంటుంది. అలా జరగకూడదంటే ఈ విషయాల గురించి తల్లిదండ్రులే తమ పిల్లలకు సున్నితంగా వివరించాలంటున్నారు నిపుణులు.
యుక్త వయసులో ఉన్నప్పుడు చాలామందికి తొలి ఆకర్షణ, ప్రేమ.. వంటి అనుభవాలు ఉండే ఉంటాయి. అలాగని అన్ని ప్రేమకథలు సక్సెస్‌ అవుతాయని చెప్పలేం. మరి మీకూ ఇలాంటి అనుభవాలు ఉన్నాయా? అవే మీ పిల్లలకు పాఠాలుగా చెప్పచ్చు. చెప్పడానికి మొహమాటపడడం, అనవసరంగా వారిలో లేనిపోని ఆశలు రేకెత్తించినట్లవుతుందేమోనని సందేహించాల్సిన పనిలేదు. అయితే మీరు మీ ప్రేమలో గెలిచారా? లేదంటే విఫలమయ్యారా? అందుకు కారణాలేంటి? వంటివన్నీ వారికి సునిశితంగా వివరించాలి.
గెలిచిన ప్రేమకథలు
ప్రేమలో విజయం సాధించిన వారిని చూస్తే చాలావరకు ముందు కెరీర్‌కి ప్రాధాన్యమిచ్చి.. ఆ తర్వాత ప్రేమను పెండ్లి దాకా నడిపించిన వారే ఎక్కువగా కనిపిస్తుంటారు. మీరూ ఇందుకు మినహాయింపు కాకపోతే.. ఆ విషయాన్ని కూడా మీ పిల్లలకు చెప్పడానికి వెనకాడకూడదు. దీనివల్ల జీవితంలో దేనికెంత ప్రాధాన్యమివ్వాలో వారికి అర్థమవుతుంది. ఇలా మీ అనుభవాలే వారికి ప్రేమ, ఆకర్షణ, డేటింగ్‌.. వంటి విషయాలపై కనీస అవగాహన కల్పిస్తాయి. ఇలా మీరు చెప్పకపోయినా పిల్లలు తెలుసుకోలేరని కాదు.. కాకపోతే అంతర్జాలం, ఇతర మార్గాల ద్వారా ఇలాంటి విషయాలు తెలుసుకోవాలనే ఆరాటంలో వారు తప్పుదోవ పట్టే ప్రమాదం ఉంటుంది. కాబట్టి దానికంటే ఈ విషయంలో మీరే గురువు అవడం మంచిదంటున్నారు నిపుణులు.
స్నేహం ఒక్కటే మార్గం
పెద్దవాళ్ళు తమ ప్రేమను అస్సలు పట్టించుకోరనే భావన ఇప్పుడున్న చాలామంది పిల్లల మనసుల్లో ఉంది. అందుకే తెలిసీ తెలియని వయసులో వారు ప్రేమలో పడ్డా, వేరొకరితో రిలేషన్‌షిప్‌లో ఉన్నా.. ఇంట్లో వాళ్లకు తెలియకుండా రహస్యంగా ఉంచుతుంటారు. 'చేతులు కాలాక ఆకులు పట్టుకుంటే లాభం లేద'న్నట్లుగా.. తీరా ఏదో ఒక తప్పు జరిగాక దాని గురించి తెలిసినా సరిదిద్దుకోలేం. అందుకే పిల్లలు ఇలాంటి పొరపాట్లు చేయకుండా.. వారి మనసులోని విషయాలన్నీ మీతో చెప్పాలంటే వాళ్లతో స్నేహం చేయడం ఒక్కటే మార్గం అంటున్నారు నిపుణులు. అలా కాకుండా ప్రతి విషయంలో వారితో కఠినంగా వ్యవహరించడం, వాళ్లు చెప్పేది పూర్తిగా వినకుండా మీ మాటే నెగ్గాలనుకోవడం, చీటికీ మాటికీ కసుర్లు, విసుర్లు.. ఇలాంటి ప్రవర్తన ఉన్న తల్లిదండ్రులతో ఏ విషయం పంచుకోవాలన్నా పిల్లలు భయపడుతుంటారు. కాబట్టి తెలియక తప్పు చేసినా అది మీతో చెప్పడానికి జంకుతుంటారు. అందుకే పిల్లలతో ఎంత ఫ్రెండ్లీగా మెలిగితే అంత మంచిదంటున్నారు నిపుణులు.
వలకు చిక్కకుండా
ప్రస్తుతం వందలు, వేల సంఖ్యలో డేటింగ్‌ యాప్‌లు, వెబ్‌సైట్లు పుట్టుకొస్తున్నాయి. వీటిలో నకిలీ సైట్లు కూడా ఉంటున్నాయి. యువత ఒకరిని చూసి మరొకరు వీటికి ఎక్కువగా ఆకర్షితులవుతున్నారని అధ్యయనాలు చెబుతున్నాయి. కాబట్టి మోసపూరిత డేటింగ్‌ సైట్లతో వ్యక్తిగత సమాచారం పంచుకోవడం వల్ల లేని పోని అనర్ధాలు తలెత్తే ప్రమాదం ఉంది. ఇదే విషయాన్ని తల్లిదండ్రులు తమ పిల్లలకు వివరించాలి. ఫొటోలు మార్ఫింగ్‌ చేసి, వీడియోలు మార్చేసి సోషల్‌ మీడియాలో పెట్టడం, తద్వారా డబ్బు గుంజడం.. వంటి మోసాలకూ ఇలాంటి యాప్‌లు వేదికలవుతున్నాయని వారికి విడమరిచి చెప్పాలి. ఒకవేళ మీ పిల్లలు ఇదివరకే డేటింగ్‌ యాప్‌లను ఆశ్రయిస్తే.. సున్నితంగా వాటి గురించి అడిగి తెలుసుకోవాలి. మొబైల్‌, ల్యాప్‌టాప్‌లలో వాళ్లేం చూస్తున్నారో తెలుసుకునేందుకు నిరంతరం వారిపై నిఘా ఉంచడంలో తప్పు లేదు. తద్వారా వారు నష్టపోకుండా, మీ కుటుంబానికి ఎలాంటి సమస్యలు రాకుండా జాగ్రత్తపడచ్చు.
అండగా నిలవండి
టీనేజ్‌లో ప్రేమకు, ఆకర్షణకు సరైన అర్థం తెలియక చాలామంది మోసపోతుంటారు. మరికొందరి విషయంలో భేదాభిప్రాయాలు వచ్చి పరిస్థితులు బ్రేకప్‌కి దారితీయచ్చు. ఇక ఇలాంటి విషయాల్ని తట్టుకునే శక్తి, మానసిక పరిణతి చాలామంది టీనేజర్లకు ఉండదంటున్నారు నిపుణులు. ఇలాంటి పరిస్థితుల్లో ఆత్మహత్యలకు పాల్పడడం, డిప్రెషన్‌లోకి వెళ్లిపోవడం.. వంటివి ఎక్కువమంది విషయంలో జరుగుతుంటాయి. అయితే అంత చిన్న విషయానికి ఇంత పెద్ద నిర్ణయం తీసుకోవడమంటే జీవితాన్ని చేజేతులా నాశనం చేసుకున్నట్టే. మరి పిల్లలు ఇలా చేయకుండా తల్లిదండ్రులే వారికి అండగా నిలవాలి. జరిగిన నష్టం గురించి పదే పదే అడుగుతూ వారిని మాటలతో హింసించకుండా వారి భావోద్వేగాల్ని అర్థం చేసుకోవాలి. బ్రేకప్‌ అనేది జీవితంలో ఒక భాగం మాత్రమేనని, దాన్నుంచి త్వరగా బయటపడి కెరీర్‌పై దృష్టి పెట్టాలని వారికి నచ్చజెప్పాలి. అప్పుడు కోల్పోయిన దానికంటే అత్యుత్తమమైనది మన సొంతమయ్యే అవకాశాలుంటాయన్న విషయం వారికి అర్థం చేయించాలి. నిజానికి ఇలా అండగా నిలిచే తల్లిదండ్రులున్న పిల్లలు ఏ విషయంలోనూ తప్పుడు నిర్ణయం తీసుకోరని నిపుణులు చెబుతున్నారు.
