అవగాహన లోపమో లేదంటే అంతా భర్తే చూసుకుంటారన్న అతి విశ్వాసమో.. కొంతమంది మహిళలు తమ డబ్బు నిర్వహణ బాధ్యతలు తమ భర్తల చేతుల్లో పెడుతుంటారు. అయితే మొదట్లో కొన్నాళ్లు బాగానే ఉన్నా ఆ తర్వాత మీకు తెలియకుండానే ఖాతాల్లోంచి వేలకు వేలు మాయమవడం, మిమ్మల్ని వారి గుప్పిట్లో పెట్టుకొని డబ్బు విషయంలో హింసించడం, మీ పేరిట ఉన్న ఆస్తిపాస్తుల్ని వారి అధీనంలోకి తెచ్చుకోవడం.. ఇలా 'పేరుకు మాత్రమే డబ్బు మీది.. ఎక్కడ వాడాలి? ఎలా వాడాలన్న విషయం మాత్రం అవతలి వారిదే!' అన్నట్లుగా తయారవుతుంది పరిస్థితి. దీన్నే 'ఆర్ధిక హింస' అంటున్నారు నిపుణులు. మరి దీని నుండి బయట పడాలంటే ఏం చేయాలి? అసలు మీరు ఇలాంటి సమస్యను ఎదుర్కొంటున్నారని తెలుసుకోవడం ఎలా? దీనికి నిపుణులు ఇస్తున్న సూచనలేమిటో తెలుసుకుందాం...
కేవలం భర్త మాత్రమే ఇలా చేస్తాడని కాదు.. మీ ఖాతాలన్నీ కుటుంబంలో ఎవరి చేతిలో పెట్టినా ఇలాంటి ప్రమాదం తలెత్తే అవకాశాలూ లేకపోలేదు. అందుకే ఇలా చేతులు కాలాక ఆకులు పట్టుకోవడం కంటే ముందే జాగ్రత్తపడడం మంచిదంటున్నారు నిపుణులు. అందుకే డబ్బు నిర్వహణ గురించి కనీస అవగాహన పెంచుకోమంటున్నారు. మరి ఇదివరకే ఈ ఉచ్చులో పడిపోయి పలు సవాళ్లను ఎదుర్కొంటోన్న వారూ ఎంతోమంది ఉండి ఉండచ్చు.
గుర్తించడం ఇలా...
బ్యాంకు ఖాతాలు, ఆస్తిపాస్తులు ఎదుటివారి చేతిలో పెట్టి మహిళలు తాము మోసపోయామని గుర్తించాలంటే ఎదుటివారి ప్రవర్తన ద్వారా ఇది సాధ్యమవుతుందంటున్నారు నిపుణులు. మీరు చేతి నిండా సంపాదిస్తున్నా అది చూసి ఓర్వలేక.. లేదంటే ఆర్థికంగా మీరు వారి కంటే ఓ మెట్టు పైనున్నా సహించలేక మిమ్మల్ని ఎలాగైనా ఉద్యోగం మాన్పించాలన్న ఆలోచనలో ఉంటారు వారు. ఇదే ఉద్దేశంతో మిమ్మల్ని పదే పదే హింసిస్తుంటారు. ఆఫీస్‌లోనైనా, ఇంటి నుంచైనా మిమ్మల్ని ప్రశాంతంగా పనిచేసుకోకుండా మాటలు, చేతలతో హింసించడం, మానసికంగా కుంగదీయడం వంటివి చేస్తుంటారు. అవసరానికి మీకు డబ్బులు ఇవ్వకపోవడం, మీ బ్యాంక్‌ ఖాతాలు, ఆస్తిపాస్తులు పూర్తిగా తమ అధీనంలోకి మార్చుకోవడం.. వంటివి చేస్తారు. ఒక్కోసారి మీకు అవసరమైన మొత్తం కంటే తక్కువ డబ్బిచ్చి ఇందులోనే ఖర్చులన్నీ పూర్తి చేసుకోవాలన్న నియమం పెట్టే వారూ లేకపోలేదు. ఇదీ ఓ రకంగా హింసే. వాళ్లు మాత్రం మీ డబ్బుతో జల్సాలు చేసి.. మీరు పెట్టే ఖర్చుల్ని భూతద్దంలో చూడడం, రసీదులు చూపించమనడం వంటివి చేస్తూ మిమ్మల్ని ఇబ్బంది పెడుతుంటారు. డబ్బు మీదే.. కానీ మీ ప్రమేయం లేకుండా, మీ నిర్ణయం తీసుకోకుండా ఆ డబ్బుని ఇష్టారీతిన ఖర్చు పెడుతుంటారు. మీ గుర్తింపు కార్డులను దొంగిలించడం లేదంటే మోసపూరితమైన ట్యాక్స్‌ రిటర్న్స్‌ని మీ పేరుకు అనుసంధానించడం.. వంటివి చేస్తుంటారు. మీ ప్రమేయం లేకుండానే మీకు సంబంధించిన ఆస్తిపాస్తులు అమ్మేయడం లేదంటే తన పేరు మీదకు మార్చుకోవడం.. వంటివి చేసే వారూ లేకపోలేదు. మీ పేరుతో తప్పుడు బీమా క్లెయిమ్స్‌ దాఖలు చేయడం. మీరు ఏ ఖర్చులు పెట్టాలన్నా తన దగ్గర చేయి చాచేలాంటి పరిస్థితి తీసుకురావడం. ఇష్టారీతిన రుణాలు తీసుకోమని మిమ్మల్ని బలవంతం చేయడం. ఇలాంవన్నీ ఆర్థిక హింస కిందకే వస్తాయి.
బయటపడం ఎలా...
డబ్బు విషయంలో ఇంట్లో వాళ్లనే నమ్మొద్దని చెబుతుంటారు పెద్దలు. ఎందుకంటే ఎలాంటి అనుబంధాలనైనా విడదీసే మత్తు మందు ఇది. అందుకే డబ్బు నిర్వహణ బాధ్యతలన్నీ మహిళలు ఎవరికి వారే చూసుకోవడం మంచిది. ఒకవేళ ఈ హింసను ఎదుర్కొంటున్న వారు దీన్నుంచి బయటపడాలంటే ఈ చిట్కాలు పాటించడం ఉత్తమం అంటున్నారు నిపుణులు.
ఇప్పటిదాకా కోల్పోయిన డబ్బు గురించి బాధపడడం కంటే ఇక ముందు అలా జరగకుండా జాగ్రత్తపడడం మంచిది. ముందు మీ బ్యాంకును సంప్రదించి కార్డులు బ్లాక్‌ చేయించడం, పిన్‌ మార్పించడం, మీ పర్సనల్‌ కంప్యూటర్‌, మొబైల్స్‌లో లాగిన్‌ ఐడీలు, పాస్‌వర్డులు మార్చేయడం.. వంటివి వెంటనే చేసేయాలి.
మీ పేరు మీదున్న క్రెడిట్‌ కార్డు బిల్లులు, రుణాలు సమయానికి చెల్లించకుండా ఉంటే వాటిని వచ్చే నెల జీతంతో తీర్చేసి ఆయా కార్డుల్ని బ్లాక్‌ చేసుకోవచ్చు. ఆ తర్వాత కొత్త కార్డులు తీసుకున్నా ఆ వివరాలేవీ సదరు వ్యక్తికి తెలియకుండా జాగ్రత్తపడాలి.
పాన్‌, ఆధార్‌, మ్యారేజ్‌ సర్టిఫికెట్‌, మీ స్టడీ సర్టిఫికెట్స్‌.. వంటివన్నీ ఎదుటి వ్యక్తికి తెలియకుండా రహస్యంగా దాచుకోవడం మంచిది.
మీ ప్రమేయం లేకుండా సొంతం చేసుకున్న మీ ఆస్తిపాస్తులు తిరిగి ఇవ్వమని వారిని ఓ మాట అడిగి చూడండి. దీనికి అంగీకరించపోతే మాత్రం చట్టబద్ధంగా ముందుకెళ్లడానికీ వెనకాడకండి.
ఆర్థిక హింస కూడా గృహ హింస కిందకే వస్తుందని చట్టం చెబుతోంది. అందుకే ఎదుటివారిపై మీరు ఫిర్యాదు చేయాలనుకుంటే దగ్గర్లోని పోలీస్‌ స్టేషన్‌ని సంప్రదించచ్చు.
ఇంత జరిగాక మానసికంగా ఎంతగానో కుంగిపోతాం.. కాబట్టి ఈ హింసను మీలోనే దాచుకోకుండా మీ కుటుంబ సభ్యులతో పంచుకొని వారి సలహాలు తీసుకోవచ్చు.. లేదంటే మానసిక నిపుణులను సంప్రదించి కౌన్సెలింగ్‌ తీసుకున్నా ఫలితం ఉంటుంది.
