2016లో ప్రియాంక నాయర్‌కు క్షయవ్యాధి ఉందని, శరీరంలో 15 ట్యూమర్‌లు ఉన్నాయని నిర్ధారణ అయింది. ఆ క్షణం నుండి అనారోగ్యంతో పోరాడింది. మానసిక ఆరోగ్యంపై దృష్టి సారించే రెండు బ్లాగులు, యూట్యూబ్‌ ఛానెల్‌ని నడుపుతూ గతంలో కంటే ఇప్పుడు బలంగా తయారయింది. మిమ్మల్ని చంపనిది మిమ్మల్ని బలపరుస్తుందని అంటున్న ఆమె జీవితంలో ఊహించని మలుపులను ఎలా ఎదుర్కొందో తెలుసుకుందాం...
           ముంబైకి చెందిన 34 ఏండ్ల ప్రియాంక సంవత్సరం పాటు శోషరస కణుపు క్షయవ్యాధితో పోరాడిన తర్వాత ఇప్పుడు మానసిక ఆరోగ్య ప్రాముఖ్యం గురించి బ్లాగులో మాట్లాడుతుంది. ఆమె ఈ సంవత్సరం మేలో విడుదల చేసిన 26 డేస్‌ 26 వేస్‌ ఫర్‌ ఎ హ్యాపీయర్‌ యు అనే చిన్న స్వీయ-సహాయ పుస్తకాన్ని కూడా రాసింది. 2016లో ప్రియాంకకు శోషరస కణుపు క్షయవ్యాధి ఉన్నట్టు నిర్ధారణ అయింది. వైద్యులు ఆమె గొంతు నుండి ఉదరం వరకు దాదాపు 15 కణితులను కనుగొన్నారు. ఆ సమయంలో ఆమెకు రెండేండ్ల కూతురు ఉంది. భర్త కొత్త ఉద్యోగం కోసం ప్రయత్నిస్తుండడంతో పరిస్థితి బాగాలేదు. అనారోగ్యం కారణంగా ప్రియాంక కూడా ఉద్యోగాన్ని విడిచిపెట్టవలసి వచ్చింది. ఆమె దాచుకున్న మొత్తం వైద్య చికిత్సకు పోవడంతో భారీ ఆర్థిక సంక్షోభాన్ని ఎదుర్కోవాల్సి వచ్చింది. ఆ సమయంలో ప్రియాంక గందరగోళ పరిస్థితిని ఎదుర్కొంది.
కూతురికి దూరమయింది
           ''నా కుమార్తెకు ఇన్‌ఫెక్షన్‌ సోకుతుందనే భయంతో నేను నిద్రలేని రాత్రులు గడిపాను. ఎవరైనా నన్ను చూడటానికి వచ్చినప్పుడు వారు చాలా దూరం పాటించేవారు. నాకు ఆకలి ఉండేది కాదు. ఇంకా చాలా బరువు పెరిగాను. స్టెరాయిడ్స్‌తో సహా ప్రతిరోజూ 22 మాత్రలు తీసుకునేదాన్ని'' అంటూ ఆమె ఆ రోజులను గుర్తు చేసుకున్నారు. శోషరస కణుపు క్షయ దాదాపు చికిత్సకు తగ్గిపోయే వ్యాధి. అది అంటువ్యాధి కానప్పటికీ అందరూ ఆమెను తన కుమార్తె నుండి దూరంగా ఉంచారు. ఒకప్పుడు తన స్నేహితురాలు అటుగా వెళుతుండగా చూసి లేచి తనను, తన బిడ్డను పలకరించిందని, దగ్గరకు రావద్దని చెప్పిన సంఘటనను కూడా ఆమె గుర్తు చేసుకుంది. ''ఇది హృదయ విదారకంగా ఉంది. కానీ నాకు వివరించడానికి శక్తి లేదు'' ఆమె చెప్పింది. అనారోగ్యంతో పోరాడటం వలన ప్రియాంక తీవ్ర మానసిక ఒత్తిడిని ఎదుర్కొంది. ఆమె మనసులో అనవసరమైన గందరగోళం చోటు చేసుకుంది.
బ్లాగింగ్‌ ప్రారంభించి
           ''నేను నిరాశకు లోనవడం ప్రారంభించాను. నన్ను నేను కోల్పోతానని భయపడ్డాను. శారీరక అనారోగ్యం నా మానసిక ఆరోగ్యాన్ని కూడా ప్రభావితం చేస్తుంది. అప్పుడే నేను బ్లాగింగ్‌ ప్రారంభించి సాధారణ స్థితికి రావాలని నిర్ణయించుకున్నాను. మేకప్‌ వేసుకోవడం లేదా ఆఫీస్‌కి ఎందుకు వెళ్లడం లేదని తన కుమార్తె ఒకసారి అడిగిందని, ఆ అమాయకమైన ప్రశ్న తన జీవితానికి బాధ్యత వహించాలని మరింత నిశ్చయించిందని కూడా ఆమె చెప్పింది. ఒక సంవత్సరం అనిశ్చితి తర్వాత ప్రియాంక కోలుకునే సంకేతాలను చూపించడం ప్రారంభించింది. అందరూ ఊపిరి పీల్చుకున్నారు. అయితే అకస్మాత్తుగా హై-గ్రేడ్‌ డెంగ్యూ బారిన పడింది. తొమ్మిది రోజులు ఐసియులో ఉంది. ఆమె పూర్తిగా కోలుకోవడానికి మరో మూడు నెలలు పట్టింది. ''నేను నా జీవితంలో ఒకటిన్నర సంవత్సరాలు కోల్పోయాను, ఆందోళన చెందాను, నిరాశ చెందాను, అనారోగ్యాలలో చిక్కుకున్నాను. ఈ సమయంలో నా మానసిక ఆరోగ్యం అత్యంత దారుణంగా ఉంది. కానీ నా బ్లాగును ప్రారంభించడం కోసం ఎదురు చూసేదాన్ని.
వీడియో సీరిస్‌లో కూడా
           చివరకు ఆమెకు అన్ని వైద్య చికిత్సలు చేసిన తర్వాత ఉపశమనం పొందింది. కానీ ఆమెలో కొంత భాగం నిరాశ, ఆందోళన, మానసిక ఒత్తిడికి ఎప్పటికీ కొంత ఉండేది. ఆమె ప్రతిరోజూ వాటితో పోరాడుతున్నందున తన సమయాన్ని మానసిక ఆరోగ్యం కోసం అంకితం చేయాలని నిర్ణయించుకుంది. ''నేను సలహా ఇచ్చే వ్యక్తులను వైద్య సహాయం కోరమని ఎల్లప్పుడూ సిఫార్సు చేస్తున్నాను. నా విషయంలో నేను ఇప్పటికే చాలా కష్టాలు పడుతున్నాను. నా చుట్టూ ఉన్నవారు నాకు వృత్తిపరమైన సహాయం పొందడం గురించి ఆలోచించలేదు''. 2017లో ఆమె సృష్టించిన అదే పేరుతో తన బ్లాగ్‌ వర్చువల్‌ సియాహి, యూట్యూబ్‌ ఛానెల్‌ ద్వారా ప్రియాంక శోషరస కణుపు క్షయవ్యాధితో పోరాడుతున్న తన కథను, మానసిక ఆరోగ్యం, భావాలను పంచుకుంది. ఆమె హ్యుమానిటీ కి చైన్‌ అనే వీడియో సిరీస్‌ను కూడా హోస్ట్‌ చేస్తుంది. అక్కడ మానసిక ఆరోగ్య నిపుణులను లేదా వారి అనుభవాల గురించి మాట్లాడాలనుకునే వారి గురించి చాట్‌ కోసం ఆహ్వానిస్తుంది. ఇప్పటివరకు ఆమె దాదాపు 370 బ్లాగ్‌ పోస్ట్‌లను రాసింది. సిరీస్‌ కింద ఏడు వీడియోలను అప్‌లోడ్‌ చేసింది.
బిహేవియరల్‌ థెరపీలో కోర్సు
           మూడు నెలల కిందట ప్రారంభించిన శానిటీ డైలీలో ప్రియాంక ఒత్తిడి నిర్వహణ గురించి సలహాలను పోస్ట్‌ చేసింది. వివాహంలో ప్రజలు ఎదుర్కొనే సమస్యలపై ఎక్కువ దృష్టి పెడుతుంది. మానసిక అనారోగ్యాలు, మానసిక ఆరోగ్య ప్రథమ చికిత్స గురించి ఆమె తీసుకున్న సర్టిఫికేషన్‌ కోర్సుల నుండి అంతర్దృష్టులను కూడా పంచుకుంటుంది. ఆమె ప్రస్తుతం కాగ్నిటివ్‌ బిహేవియరల్‌ థెరపీలో కోర్సును అభ్యసిస్తుంది. వర్చువల్‌ సియాహి, శానిటీ డైలీ రెండూ మానిటైజ్‌ చేయబడిన బ్లాగ్‌లు అని ఆమె జతచేస్తుంది. మొదటి బ్లాగ్‌లో ఆమె ధృవీకరించబడిన అమెజాన్‌ ఇన్‌ఫ్లుయెన్సర్‌గా ప్రాయోజిత పోస్ట్‌లు, చెల్లింపు పుస్తకం, ఉత్పత్తి సమీక్షల ద్వారా ఆదాయాన్ని సంపాదిస్తుంది. రెండవది ఆమె ప్రధానంగా ప్రకటనలు, అనుబంధ మార్కెటింగ్‌ ద్వారా సంపాదిస్తుంది. ప్రియాంక ఈ సంవత్సరం ప్రారంభంలో తన స్వీయ-సహాయ ఈబుక్‌, 26 డేస్‌ 26 వేస్‌ ఫర్‌ ఎ హ్యాపీయర్‌ యుని విడుదల చేసింది. అద్భుతమైన సమీక్షలను అందుకుంది. వాటిలో చాలా ఇతర బ్లాగర్ల నుండి వచ్చాయి. కొలరాడోలో ఉన్న ఒక ఎన్‌జీఓతో అంతర్జాతీయ సహకారంతో ఉమెన్‌ ఆర్‌ రోజెస్‌ అనే మరొక పుస్తకానికి కూడా ఆమె సహకరించింది. ''మానసిక ఆరోగ్య విభాగంలో ఉత్తమ తొలి రచయితగా చెన్నైలోని ఆథర్‌ మ్యాగజైన్స్‌ నుండి నా ఈబుక్‌కి ట్రోఫీ, సర్టిఫికేట్‌ కూడా అందుకున్నాను. అదే కేటగిరీలో చీజు8శ అఫీషియల్‌ ద్వారా ఈ పుస్తకం కూడా నామినేట్‌ చేయబడింది'' అని ఆమె జతచేస్తుంది.
ముందుకు సాగుతోంది
           రాబోయే రెండేండ్లలో ప్రియాంక తన సొంత స్టార్టప్‌తో వ్యవస్థాపకతలోకి ప్రవేశించాలని లక్ష్యంగా పెట్టుకుంది. ఈ కలని నిజం చేయడానికి ఆమె తీవ్రంగా కృషి చేస్తోంది. మానసిక ఆరోగ్యం, శ్రేయస్సుతో పోరాడుతున్న వారికి ప్రియాంక కొన్ని సలహాలను అందిస్తుంది. ''మీరు ఒంటరిగా లేరు. దయచేసి బయటి ప్రపంచాన్ని చూడటానికి ప్రయత్నించండి. మీకు సౌకర్యవంతంగా ఉన్న వారితో మాట్లాడటానికి ప్రయత్నించండి. మీలో ఉన్న భయాన్ని వదలండి. ఇది అంత సులభం కాదని నాకు తెలుసు. కానీ ఈ అదృశ్య గాయాలు, నిశ్శబ్ద నొప్పి మీ తల లోపల ఖాళీని సృష్టించిన తర్వాత జీవితంలో ముఖ్యమైన విషయాలపై దృష్టి పెట్టడం చాలా కష్టంగా మారుతుంది. ఇది ప్రతిరోజూ మీ నుండి కొంచెం దూరం చేస్తుంది. దయచేసి వైద్య సహాయం తీసుకోండి, వెళ్లి డాక్టర్‌ని కలవండి. మీపై కాస్త ప్రేమ చూపించండి. మీ శరీరం మీ దేవాలయం. దయచేసి దానిని గౌరవించండి. అవసరమైన ప్రేమ, శ్రద్ధతో దానిని పెంచుకోండి'' అని ప్రియాంక చెప్పింది.