Authorization
Mon Jan 19, 2015 06:51 pm
వందలో నుంచి ఒకటి తీసివేస్తే మూడంకెల సంఖ్య కాస్త రెండంకెల సంఖ్యగా మారుతుంది. వంద నోటును చిల్లర చేస్తే చేతిలో రూపాయి కూడా మిగలదు. పెరుగుతున్న ధరలు, తప్పని ఖర్చులు సగటు మధ్యతరగతి వారి ఆర్థిక వ్యవస్థను చిన్నాభిన్నం చేస్తాయి. ప్రపంచవ్యాప్తంగా ఆర్థికమాంద్య ప్రభావం సగటు మనిషిపై ఎక్కువగా ఉంటుంది. దీనిని ఎదుర్కోవాలంటే చిల్లరను పోగు వేయక తప్పదు. రూపాయి రూపాయి కూడబెడితేనే పెద్ద అవసరాలు వచ్చినప్పుడు అప్పుల పాలు కాకుండా ఆదుకుంటాయి. విద్యా, వైద్యం ప్రైవేటు పరం అయిన ఈ రోజుల్లో కనీసవిద్య, వైద్యం కావాలంటే పొదుపు చేయాల్సిందే. అది రూపాయితో ప్రారంభమై.. వందలు, వేలు, లక్షలు కావచ్చు. మీ లక్ష్యం మాత్రం పొదుపు అన్నది మరవద్దు.
- ఆదాయం నుంచి ఖర్చులు పోను రేపటి కోసం కొంత మిగుల్చుకోవటమే పొదుపు. జీవించడానికి కావల్సిన వనరులన్నీ డబ్బులోనే సమకూరుతాయి. అయితే ఎంతమేరకు ఆవదాయం వస్తుంది.. రేపటి కోసం ఎంత పొదుపు చేస్తున్నాం అన్నది చాలా ముఖ్యమైనది. ప్రతి మనిషి తమ సంపాదనలో కనీసం 20 శాతం పొదుపు చేస్తే మంచిదని ఆర్థిక శాస్తవ్రేత్తల అభిప్రాయం.
- ఎంత సంపాదిస్తున్నాడనేదానికంటే ఎంత పొదుపు చేస్తున్నాడనేదే ముఖ్యం. సంపాదించినదంతా ఖర్చు చేస్తూ పోతే ఫలితం ఉండదు. పొదుపు మొత్తాన్ని పెంచాలంటే మొదటి అడుగు బడ్జెట్తోనే పడాలి. నెల జీతం తీసుకునేవారైతే జీతం చేతికి అందిన మొదటి రోజే పొదుపు చేయడం ఆరంభించాలి. దినసరి వేతనం అందుకునేవారు ప్రతిరోజూ కొంత
దాచాలి. వ్యాపారస్తులు కూడా ప్రతిరోజూ కొంతమేరకు పొదుపు చేయడం మంచిది.
బడ్జెట్ వేసుకుంటేనే..
- ప్రభుత్వాలకే కాదు ఇంటికి కూడా బడ్జెట్ అవసరమే. ముందు ఇంటికోసం బడ్జెట్ తయారుచేసుకోవాలి. అవసరాలకు సరిపడినంత ఉంచుకుని మిగులు నిధులను పెట్టుబడికి తరలించాలి. ఈ అలవాటు ప్రారంభంలో కొంత కష్టమనిపించినా తరువాత సులభమవుతుంది. అంతేకాదు, ఒకటో తేదీనాడే మనం అన్ని ప్రణాళికలు వేసుకుంటే ఉన్న నిధులతో స్వేచ్ఛగా తిరగవచ్చు.
- ఇక వ్యక్తిగత ఫైనాన్స్ విషయానికి వస్తే మీరు గుర్తుపెట్టుకోవాల్సిన విషయాలు అనేకం ఉన్నాయి. దీనిని సమర్ధవంతంగా నిర్వహించడం ప్రతి ఒక్కరికి ఒక సవాలు లాంటిది. మీకు అవసరమైన నైపుణ్యాలను నేర్పించడానికి అనేక సంస్థలు అందుబాటులో ఉన్నాయి. కానీ నిర్వహణ మాత్రం అంత సులువైనది కాదు. ఆర్థిక అవగాహన కలగడానికి చాలా సమయం పడుతుంది. కానీ మీరు దీనిపై కనీస అవగాహన కలిగి ఉండడం ఎంతైనా అవసరం.
లక్ష్యం ముఖ్యం..
- భవిష్యత్తులో మీరు ఏమి సాధించాలనుకుంటున్నారో అలాగే మీరు సంపాదించిన డబ్బుతో ఏమి చేయాలనుకుంటున్నారో ప్రణాళిక వేసుకోవాలి. ఫైనాన్స్ అనేది మీ జీవితంపై అలాగే ఇతర అవసరాలపై సులభంగా ప్రభావం చూపగలదని తెలుసుకోవాలి. పిల్లల ఉన్నతవిద్య, స్వంత ఇల్లు కట్టుకోవాలని భావిస్తే దానికి తగ్గట్టుగా ప్రణాళికను రూపొందించుకోవాలి. ముందస్తు పదవీ విరమణ కోసం వీలైనంత త్వరగా మీరు నిధులను నిర్వహించడం మొదలుపెట్టాలి.
- ఆర్ధిక అవసరాలకు అనుగుణంగా మీరు ఆదాయం నుంచి పొదుపు చేయడం మొదలు పెట్టాలి. అంతేకాదు మీ కెరీర్కు అనుగుణంగా వస్తున్న మార్పులను గమనించాలి. కొన్నిసార్లు ఉద్యోగంలో హైక్ రావచ్చు. మరికొన్నిసార్లు అర్ధాంతరంగా ఉద్యోగం, ఉపాధి కోల్పోవచ్చు. అలాంటి విషయాలు మీ ఆర్ధిక అవసరాలపై ప్రభావం చూపుతాయి. ఆదాయం పెరిగితే దానిని మరింత ముందుచూపుతో పొదుపు చేయాలి. ఒకవేళ ఆదాయం తగ్గితే ఖర్చులను తగ్గించుకోవాలి తప్ప పొదుపు చేసే మొత్తంలో తేడా రాకుండా చూసుకోవాలి.
ఖర్చు తగ్గించడం
- ప్రతి సంవత్సరం మీరు సంపాదిస్తున్న మొత్తాన్ని ఖర్చు చేసినట్లయితే, మీ జీవితంలో అనుకోకుండా సంభవించే అత్యవసర పరిస్థితుల్లో అనేక ఇబ్బందులను ఎదుర్కోవలసి ఉంటుంది. అదే మీరు సంపాదించిన దాని కన్నా తక్కువ ఖర్చు చేసినట్లయితే, మిగిలిన మొత్తాన్ని పొదుపు చేసుకునే ఆకాశం ఉంటుంది. దీని వల్ల అత్యవసర పరిస్థితుల్లో మీరు ఎలాంటి ఇబ్బందులకు గురి కాకుండా ఉంటారు. మీరు గనక మీ ఆదాయం, ఖర్చుల మధ్య సమతూకం చేయగలిగితే పొదుపు విషయంలో విజయం సాధించినట్లే.
- మంచి క్రెడిట్ స్కోరును నిర్వహించడం అనేది చాలా ముఖ్యమైన విషయం. మీరు తీసుకున్న అప్పులను, నెలసరి వాయిదాలను, క్రెడిట్ కార్డు బిల్లులను సరైన సమయంలో చెల్లించడం ద్వారా మంచి క్రెడిట్ స్కోరును కలిగి ఉంటారు. సాధారణంగా క్రెడిట్ స్కోర్ అనేది ఒక నివేదిక. ఇప్పటివరకు మీరు ఎలాంటి రుణాలను తీసుకున్నారు, తీసుకున్న రుణాన్ని సరైన సమయానికి చెల్లించారో లేదో అనే సమాచారాన్ని ఇది అందిస్తుంది. మీరు ఎంత మొత్తాన్ని, ఎంత వడ్డీ రేటుకు అప్పుగా తీసుకున్నారో, అలాగే ఎన్ని రకాల అప్పులను (క్రెడిట్ కార్డులు, కారు రుణాలు, తనఖాలు వంటివి) తీసుకున్నారో తెలుసుకోవడానికి బ్యాంక్లు, ఆర్థిక సంస్థలు ఈ స్కోర్ను పరిశీలిస్తున్నాయి.
సరైన విధంగా..
- డబ్బును ఒకచోట స్థిరంగా ఉంచితే ఎలాంటి ప్రయోజనం ఉండదు. ప్రస్తుతం బ్యాంక్ వడ్డీ రేట్లు కూడా అంత ఆశాజనంగా లేవు. అయితే మీరు డబ్బును సరైన పద్ధతుల్లో పెట్టుబడిగా పెడితే, కాలక్రమేణా అది మరింత డబ్బుని సంపాదించిపెడుతుంది. మీ డబ్బును తక్కువ వడ్డీ వచ్చే పొదుపు ఖాతాలో పెట్టుబడిగా పెట్టొద్దు. పెద్ద మొత్తంలో డబ్బు వచ్చే పెట్టుబడి మార్గాల్లో పెట్టుబడి పెట్టండి. అయితే మొత్తం పొదుపు చేసిన డబ్బును ఒకే దాంట్లో పెట్టుబడి పెట్టకుండా పొదుపు మొత్తాన్ని విభజించండి.
- కొంత మొత్తాన్ని భూములపై పెట్టండి. భవిష్యత్ అవసరాలకు తగ్గట్టుగా లాండ్పై ఇన్వెస్ట్ చేయడం సరైనదే. అయితే నమ్మకమైన వెంచర్లోనే కొనండి.
- మొదట చిన్న పెట్టుబడి పెట్టి మీ సామర్ధ్యాన్ని తెలుసుకోండి. మీ ఆర్థిక అవసరాల కోసం ఇతరులపై ఆధారపడకూడదు. మీ అవసరాలకు అనుగుణంగా పరిశోధన చేసి పెట్టుబడి పెట్టండి.
ఆర్థిక విపత్తుల నుంచి
- కుటుంబంలో సంపాదించే వ్యక్తి అకస్మాత్తుగా మరణించినా లేదా అశక్తతకు గురైన, ఆర్థిక విపత్తుల నుంచి కుటుంబాన్ని రక్షించుకునేందుకు పొదుపు చేసిన మొత్తం ఎంతో ఉపయోగపడుతుంది. అత్యవసరపరిస్థితులను ఎదుర్కోవడానికి పొదుపు సూత్రం పాటించాల్సి ఉంటుంది.
- కుటుంబంలో సంపాదించే వ్యక్తి పేరుపై ఒక టర్మ్ పాలసీ తీసుకోండి. హామీ మొత్తం వార్షిక ఆదాయానికి 15 నుంచి 20 రెట్లు ఉండాలి. 60 సంవత్సరాలు వచ్చే వరకు పాలసీని కొనసాగించండి. పాలసీ గురించి కుటుంబ సభ్యలకు తెలియజేయండి. 5 సంవత్సరాలకు ఒకసారి పాలసీని సమీక్షించి, అవసరమైతే అదనపు పాలసీని తీసుకోవాలి. క్లెయిమ్ మొత్తం కొంత భాగం ఏకమొత్తంగానూ, మిగిలినది 5 సంవత్సరాల పాటు నెలవారీగా తీసుకొనెలా ఏర్పాటు చేసుకోవడం మంచిది.
- అత్యవసర నిధి కోసం 6 నెలల పాటు నెలవారీ ఖర్చులకు సరిపోయే మొత్తాన్ని ఫిక్స్డ్ డిపాజిట్ చేసుకోవాలి. ఆకస్మికంగా ఉద్యోగం కోల్పోయిన లేదా ఉద్యోగం మారిన ఈ నిధి ఉపయోగపడుతుంది.
- వైద్యఖర్చులు బాగా పెరిగిపోయిన ఈ రోజుల్లో ఫ్యామిలీ ఆరోగ్య బీమా పాలసీ తీసుకోవడం చాలా అవసరం. ముఖ్యంగా ముప్పై ఏండ్లు దాటిన వారంతా తప్పనిసరిగా ఫ్యామిలీ ఆరోగ్య బీమా పాలసీని తీసుకోవడం ఉత్తమం.
- రూపాయిని మిగిలిస్తే, రూపాయిని సంపాదించినట్టే. డబ్బు విషయంలోనే కాదు విద్యుత్, ఆహారం, నీరు తదితర విషయాలలో పాటించే పొదుపు డబ్బును ఆదా చేస్తుంది అన్న విషయం గుర్తుంచుకోవాలి.