Authorization
Mon Jan 19, 2015 06:51 pm
ఆమె ఆలోచన కాస్త భిన్నంగానే ఉంటుంది. మారుతున్న కాలానికి అనుగుణంగా తన శరీరాన్ని మలుచుకుంది. సాధారణంగా పుస్తకాలు చదువుతున్నప్పుడు నచ్చిన వాక్యాలను డైరీల్లో రాసుకుంటాం. కానీ తాను మాత్రం శరీరంపై టాటూగా వేయించుకుంటుంది. పైగా శరీరమే నా డైరీ అంటుంది. ఆమె 24 ఏండ్ల జెనా దేవప్రీత.
అందమే ఆనందం. ఆనందమే జీవిత మకరందం. ఆకర్షణీయంగా, సౌందర్యవంతంగా.. ఆహార్యం బాగా కనిపించేందుకు యువతులు సహా మహిళలూ ఎంతగానో తపిస్తుంటారు. అందాలకు మెరుగులు అద్దేందుకు సరికొత్త ఉపకరణాలను ఆశ్రయిస్తుంటారు. మారుతున్న కాలానికనుగుణంగా బ్రాండెడ్ మెకప్ వైపు అడుగులు వేస్తుంటారు. ఇదిగో అటువంటి ఆలోచనే చేసింది దేవప్రీత. చేయడమే కాదు ఆచరించు చూపుతుంది. తనకు నచ్చిన కవితలను శరీరంపై టాటూగా వేయించుకుంటుంది. సహజంగా పుస్తకాలు చదువుతున్నప్పుడు నచ్చిన వాక్యాలు, సందేశాలు, కవితాత్మక పంక్తులు కనిపిస్తే వాటిని వెంటనే డైరీలో రాసుకోవడం చాలామందికి అలవాటు. అయితే దేవప్రీత జెనా మాత్రం వాటిని తన శరీరంపై టాటూలుగా వేయించుకుంటుంది.
24 ఏండ్ల జెనా సోషియాలజీ స్కాలర్. ఆమె మెడ దగ్గర 'దేర్ ఈజ్ నో లవ్ ఆఫ్ లైఫ్ వితౌట్ డిస్పెయిర్ ఆఫ్ లైఫ్' అనే వాక్యం పచ్చబొట్టుగా కనిపిస్తుంది. ''అది ఫ్రెంచ్ రైటర్ ఆల్బర్ట్ కామూస్ రచనల్లోనిది'' అంటోంది జెనా. ఢిల్లీలో సోషియాలజీలో మాస్టర్స్ చేసిన ఆమెకు ప్రపంచ సాహిత్యం పట్ల మక్కువ ఎక్కువ. ఫ్రెంచ్ రచయిత కామూస్ రచనలను ఇష్టపడుతుంది. అందుకే ఆయన రచనల్లోని 'చలిలో మునిగిన తర్వాతే చివరికి నాకు తెలిసింది.. నాలో కనిపించని వేసవి ఉందని' అనే అర్థం వచ్చే మరో వాక్యాన్ని కూడా ఒంటిపై టాటూగా వేయించుకుంది.
ఇవేగాక తన మనోభావాలను కూడా ఆమె టాటూ రూపంలో వెల్లడిస్తుంది. జెనా భుజంపై కనిపించే 'హెల్ ఓవర్ ఒబ్లివీయన్', మణికట్టుపై కనిపించే 'లైవ్. రివోల్ట్' అనే వాక్యాలు ఆమె ఆలోచనాక్షరాలే. ''ఇవి జీవితం పట్ల నాకున్న నిర్దిష్ట అభిప్రాయాలను ప్రతిదినం రిమైండర్లా నాకు గుర్తుచేస్తాయి'' అంటూ వాటిని ప్రేమగా తడుముకుంటారామె. వీటితోపాటు వేళ్లకొనలపై కూడా కవితాత్మకంగా ఉండే కొన్ని టాటూలు వేసుకున్నారు. సిగ్మండ్ ఫ్రాయిడ్ నుంచి కామస్ దాకా... ప్రపంచవ్యాప్తంగా ఉండే అనేక మంది తాత్వికులు, సామాజికవేత్తల పుస్తకాలు చదివిన జెనా ఒంటిపై కనిపించే టాటూలు ఆమెలోని ప్రత్యేకతను చాటుతాయి. 'జీవిత ప్రయాణంలో ఎదురైన అనేక అనుభవాల నేపథ్యంలోనే నచ్చిన కవితాత్మక పంక్తులు, జీవితసత్యాలను టాటూలుగా వేసుకుంటున్నా' నని చెబుతున్న ఈ సోషియాలజీ స్కాలర్ ప్రయత్నం కాస్త విభిన్నంగానే ఉంది కదూ! నచ్చిన పని చేయడంలో కలిగే తృప్తి వేరు. దాంతో పొందే ఆనందం అంత ఇంత కాదు కదా..!