Authorization
Mon Jan 19, 2015 06:51 pm
కార్యకారణ సం బంధంలో అవ సరమైన స్వభావం ఏమిటో వివరించేది అవశ్యకత, యా దృచ్ఛికత అనే అభివర్గం. కార్యకారణ సంబంధాన్ని లోతుగా అధ్యయనం చేయ డం ద్వారా ప్రత్యేకించి దాని ఆవశ్యక స్వభావాన్ని అధ్య యనం చేయడం ద్వారా ఆవశ్యకత అనే భావన రూపొందింది. మనం చూస్తున్న కొన్ని విషయాలలో అనివార్యంగా, తప్పనిసరిగా జరుగుతాయి అనుకున్న దానిని ఆవశ్యకత అంటాము. అనుకోకుండా జరిగే విషయాలను యాదృచ్ఛికత అంటాము. మనం చూస్తున్న విషయాలు మరికొన్నింటిని నిర్ణయించడాన్ని కార్యకారణ సంబంధం సూచిస్తుంది. అంటే వర్షం పడటం అనే విషయం పంట పండటానికి కారణమవుతుంది. అయితే ఆవశ్యకత కొన్ని నిర్థిష్ట పరిస్థితులలో కొన్ని నిర్ధుష్టమైన సంబంధాలు లేదా ధర్మాలు అనివార్యంగా ఆవిర్భవించడాన్ని సూచిస్తుంది. తొమ్మిది నెలలు నిండిన తర్వాత బిడ్డ బయటికి రావడం అనేది ఆవశ్యక పరిణామం. అంటే ఒక అనివార్యమైన అవశ్యకమైన కార్యకారణ సంబంధాన్ని ఆవశ్యకత సూచిస్తుంది. ఆవశ్యకం అంటే తప్పనిసరిగా జరిగేవి అని అర్థం. ఉదాహరణకు సామ్రాజ్యవాదంలో యుద్ధం అనివార్యం. ఎందుకంటే సామ్రాజ్యవాద దశలో పెట్టుబడిదారీ దేశాలు యుద్ధం ద్వారా తమ మార్కెట్టును విస్తరింపజేసుకుంటాయి కాబట్టి సామ్రాజ్యవాదం ఉన్నంత కాలం యుద్ధాలు అనివార్యం. సామ్రాజ్యవాదానికి యుద్ధానికి ఉన్న కార్యకారణ సంబంధం అవశ్యకమైనది. అందుకని ఆవశ్యకత అంటే కారణ సంబంధం అవశ్యకం అనేది కార్యకారణ సంబంధంలో అంతర్గతమైనది. జరిగే కార్యం అంతర్గత కారణాల వల్ల జరిగితే అది ఆవశ్యకం అవుతుంది. జ్ఞానం అనేది హేతుయుక్త జ్ఞానదశకు చేరితే విషయాల పాఠం అంతర్గత సంబంధాలు అర్థమవుతాయి. అప్పుడు మనం అవశ్యత రూపాన్ని అర్థం చేసుకోగలం. ప్రకృతి, సహజ దృగ్విషయాలకు సంబంధించినదే అవశ్యకత. 'కడుపుతో ఉన్నమ్మ కనక మానదు. వండుకున్నమ్మ తినకమానదు'. 'సూర్యుడు ఉదయించక మానడు' అని అంటున్నామంటే ఇవి అనివార్యంగా వాటి అంతర్గత కారణాల వలన అవశ్యకంగా జరుగుతాయని అర్థం.
మరి యాదృచ్ఛికం అని దేన్ని అంటాం? అంతర్గత కారణాల వల్ల జరిగే దాన్ని అవశ్యకం అన్నాం. అలాకాక బాహ్యకారణాల వల్ల జరిగే వాటిని యాదృచ్ఛికం అంటాము. అంటే యాదృచ్ఛికత అవశ్యకత వలే తప్పనిసరిగా సంభవించనవసరం లేదు. దాని కారణం వస్తువులో కాక బాహ్య కారణాల్లో ఉంటుంది. ఉదాహరణకు వడగళ్ల వాన వలన ఒక నిర్ధిష్ట ప్రాంతంలో పంట నాశనమైందనుకోండి. అలా పంట నాశనం కావడం ఆ పంటకు సంబంధించి యాదృచ్ఛికత మాత్రమే కానీ ఆవశ్యకత కాదు. ఎందుకంటే అక్కడి వ్యవసాయానికి సంబంధించిన పరిస్థితుల నుండి, అంతర్గత పరిస్థితుల నుండి అంటే విత్తనాల కల్తీ వల్లగానీ, భూమి సారహీనత వల్ల గానీ జరిగింది కాదు. ప్రతి యేడూ అనివార్యంగా అక్కడ అలాగే పంట నాశనమవుతోందని అనడానికి లేదు. అందుకని వడగళ్ల వాన వలన పంట నాశనం కావడం ఆ ప్రాంతానికి సంబంధించి యాదృచ్చికతనే. కానీ ఆ ప్రాంతంలో వాతావరణ పరిస్థితులకు సంబంధించి నిర్థిష్ట నియమాలననుసరించి వడగళ్ల వాన పడటం ఆవశ్యకంగానే జరిగింది. కాబట్టి వాతావరణ శాఖ నియమాల దృష్టి నుండి అది అవశ్యకత అవుతుంది. ఎందుకంటే వడగళ్ల వాన వాతావరణ పరిస్థితులకు సంబంధించి అంతర్గత కారణాల నుండి జరిగే పరిణామం. కాగా పంటకు సంబంధించి అది బాహ్య కారణాల నుండి జరిగే పరిణామం. కాబట్టి యాదృచ్ఛికత అవుతుంది.
ఇంకో ఉదాహరణ చూద్దాం. యుద్ధంలో సైనికులు చనిపోతారనేది అవశ్యకమైన పరిణామం. చనిపోయేవారిలో ఏఏ సైనికులు ఏఏ ప్రాంతాల వారు మరణిస్తారో కచ్చితంగా చెప్పగలమా? చెప్పలేము. సైనికుల దృష్టి నుండి చూస్తే యుద్ధంలో మరణం అనేది యాదృచ్ఛికమైనది. యుద్ధం దృష్టితో చూస్తే సైనికుల మరణం అవశ్యకమైనది. ఆవశ్యకత అనేది అంతస్సారం నుండి జనించే అనివార్య పరిణామం. అలాగే పెట్టుబడి దారీ వ్యవస్థలో నిరుద్యోగం అనేది అవశ్యక పరిణామం. ఎందుకంటే ఆ వ్యవస్థ అంతర్గత వైరుధ్యం వల్ల సంభవించేదది. కానీ నిర్ధిష్టంగా ఏఏ కార్మికులు, ఉద్యోగులు పని కోల్పోతారు అనేది యాదృచ్ఛికమైనది.
సమాజంలో జరిగే యాదృచ్ఛిక విషయాలను చూసి, అవి అనివార్యతలని నమ్మేస్తుంటాం. తుమ్మితే ప్రయాణం ఆపేసి కూర్చుంటారు. పిల్లి ఎదురు పడితే శకునం బాగా లేదని ఆగిపోతారు. ఎందుకంటే చెడు ఫలితాలు వస్తాయని భావిస్తారు. ఎప్పుడో ఓ సారి చెడు సంభవించిందని, ఎప్పటికీ అదే జరుగుతుందని భావిస్తారు. ఫలానావి ఎదురు పడితే ఫలానా ఫలితం వస్తుందని చెప్పడానికి కార్యకారణ సంబంధం ఏమీ ఉండదు. ఎవరికైనా, ఎప్పుడైనా అలా జరిగుంటే అది యాదృచ్ఛికంగా జరిగిందే. ఎందుకంటే ఇవి శాస్త్రీయంగా చెప్పడానికి అంతర్గత కారణాలేమీ లేవు. ''శాస్త్రీగారు! కుక్క మనకి ఎడం వైపు నుండి వెళ్తే మంచి శకునమా? కుడివైపు నుండి వెళ్తే మంచి శకునమా..?'' అని చెళ్లపిల్ల వెంకటశాస్త్రీగారిని ఓ వృచ్ఛకుడు అడిగాడట. అప్పుడాయన ''కరవకుండా వెళితే ఎటు నుండి వెళ్లినా మంచి శకునమే'' అన్నాడట. అంతేగా మరి. పైపై పరిశీలనలో ప్రతిదీ యాదృచ్ఛికంగా కనపడతుంది. మనం కేవలం కనపడ్డ విషయానికే పరిమితమవుతాం. బాహ్య సంబంధాలను మాత్రమే పరిశీలిస్తాం. చలన నియమాలు, అంత: సంబంధాలు తెలియవు. ఇవి యాదృచ్ఛికతల్లో కూడా పని చేస్తాయి. కాబట్టి యాదృచ్ఛికత, ఆవశ్యకతలనేవి సాపేక్షమైనవని మనం అర్థం చేసుకోవాలి. మరో విషయమేమంటే ఆవశ్యకత అనేది యాదృచ్చికత ద్వారానే అమలులోకి వస్తుంది. యాదృచ్ఛిక ఘటనల ద్వారానే యాదృచ్చికతను పరిశీలించి అర్థం చేసుకోవడం ద్వారానే అవశ్యకతను గుర్తించగలుగుతాం. ఎందుకంటే ప్రతి యాదృచ్ఛిక ఘటనా ఒక అవశ్యకతను వ్యక్తం చేసేదిగా ఉంటుంది. 'కారులో ప్రయాణిస్తున్నామనుకోండి. ఎదురుగా వస్తున్న ఒక లారీ ఢకొీని యాక్సిడెంట్ అయింది. కాళ్లూ చేతులు విరిగాయి. తల పగిలింది. ఇది మనకు జరగడం యాదృచ్చికమైనదే. కానీ మన కారు, ఎదరుగా వచ్చే లారీ ఒకే కోణంలో డ్రైవ్ చేసిన కారణంగానే లేదా లారీ డ్రైవర్ ఒక్క క్షణం కనురెప్ప మూసిన కారణంగానే ఢకొీట్టింది. కాబట్టి లారీ, కారు గుద్దుకోవడం అనేది కార్యకారణ సంబంధంతో ముడిపడిన ఒక అవశ్యక పరిణామం. ఆ కారు మనది కావడం, ఆ లారీ అప్పుడే రావడం లారీ డ్రైవర్ అప్పుడే రెప్పవాల్చడం ఇవన్నీ యాదృచ్ఛికమైనవి. అయితే ఈ యాదృచ్ఛికతల మాటున దాగిన అవశ్యకతను గుర్తించి మనం జాగ్రత్త పడాలి. అంటే సీటు బెల్టు పెట్టుకోవడం, అప్రమత్తంగా ఉండటం ఎక్కువ వేగాన్ని నియంత్రించడం చేయవచ్చు.
ఇంకో ఉదాహరణ చూద్దాం. నేనొకసారి వనంలో విహరిస్తూ విహరిస్తూ ఒక పొడవాటి చెట్టుపైన యధాలాపంగా చేయి వేసాను. అది గబాలున పడిపోయింది. ఇది యాదృచ్ఛికమైన ఘటన. కానీ ఇంకో చెట్టుపై అలా చేయి వేస్తే పడలేదు ఎందుకు? ఆ చెట్టు అప్పటికే అంతర్గతంగా డొల్లగా తయారై ఉంది. ఏ రకమైన గట్టితనమూ దానిలో మిగిలి లేదు. ఏ గాలి తాకిడికో అది పడిపోయేదే. నేను చేయి వేయడం యాదృచ్ఛికతే కానీ అది పడిపోవడం దాని అంతర్గత అనివార్యత. అంటే అవశ్యకత. నాకు ఆ చెట్టు పడిపోవడం యాదృచ్ఛికమైతే, చెట్టు పరిస్థితి దృష్ట్యా అవశ్యకత. ఒక వస్తువుకు సంబంధించి ఆ వస్తువు పరిణామాన్ని శాసించేది అవశ్యతక కాగా, ఆ వస్తువుకు బాహ్యంగా ఉండే పరిస్థితుల నుండి ఉత్పన్నమయ్యే యాదృచ్చిక ఘటనలు ఆ వస్తువు పరిణామాన్ని ప్రభావితం చేస్తాయి. అయితే యాదృచ్ఛికత, ఆవశ్యకతకు అనుబంధంగానే పని చేస్తుంది.
ప్రతి యాదృచ్ఛిక ఘటనా ఒక ఆవశ్యకతను వ్యక్తం చేసేదిగా ఉంటుంది. యాదృచ్ఛిక ఘటనల మాటున దాగిన అవశ్యకతను గుర్తించడం ద్వారానే మనం సామాజిక పరిణామాన్ని వేగిరపరచగలుగుతాం. నేడు మన సమాజంలో మౌలిక వైరుధ్యాలు తీవ్రతరం కావడం వల్లనే విప్లవం పరిస్థితి అవశ్యకంగా పెంపొందుతున్నది. అయితే ఈ విప్లవ పరిస్థితి భిన్నప్రాంతాలలో, భిన్న సమస్యలపై భిన్న రూపాలలో విడివిడిగా పెల్లుబుకుతున్న యాదృచ్ఛిక పోరాటాల రూపంలో వ్యక్తమవుతున్నది. వాల్స్ట్రీట్ ఉద్యమం యాదృచ్ఛికమైనదే కావచ్చు. కానీ వ్యవస్థలోని వైరుధ్యంలోని అవశ్యక పరిణామం అది. నేడు 'షహీన్బాగ్'లో జరుగుతున్న ఘటనలు, ఎన్నార్సీకి వ్యతిరేకంగా ఉవ్వెత్తున ఎగసిపడుతున్న నిరసనలు యాదృచ్ఛికంగా కనపడినా, పాలకుల విధానాల కారణంగా ప్రజలు పడుతున్న ఇబ్బందులకు అదొక ప్రతిఘటనా రూపం. అంటే ఇది అంతర్గత వైరుధ్యాల వలన ఏర్పడే ఘర్షణకు ప్రతీక. దీన్ని వేగిర పరచడం ద్వారా ఆవశ్యక ఉద్యమాన్ని నిర్మించవచ్చు. విప్లవ పార్టీలు, విప్లవ నాయకులు ఈ యాదృచ్ఛిక ఘటనలను పరిశీలించి, అవశ్యక విప్లవ పోరాటాన్ని కొనసాగించడానికి పూనుకోవాల్సి ఉంటుంది.
అవశ్యకత యాదృచ్ఛికతలు గతితార్కిక ఐక్యతను కలిగి ఉంటాయని గుర్తుంచుకోవాలి. లేనిపక్షంలో అది, అంతా విధికృతమనే ధోరణిగానే ప్రపంచంలోని ఘటనలన్నీ నియమరహితంగా జరుగుతాయనీ వాటికి కారణాలను తెలుసుకోలేమనే ధోరణికి దారి తీస్తుంది. ఈ రెండు ధోరణులూ చైతన్యయుత కార్యాచరణ ప్రాముఖ్యతను తిరస్కరిస్తాయి. పుట్టుక యాదృచ్ఛికం, మరణం ఆవశ్యకత. మనకు సంబంధించి పుట్టుక యాదృచ్ఛికం. కానీ తల్లికి అది అవశ్యక పరిణామం. మరణం అంటే వీటి దగ్గరే విధి, దేవుడు కారణాలనే విశ్వాసాలు మొదలయ్యాయి. అన్నీ కార్యకారణ సంబంధం కలవే.
ఆవశ్యతకను గుర్తించడం కేవలం గుర్తించడం కోసం కాదు. చైతన్యయుత కార్యాచరణ ద్వారా ఆ భౌతిక వాస్తవికతను మార్చడానికి కృషి చేయడం కోసం పెట్టుబడిదారీ వ్యవస్థలోని వైరుధ్యాలు అవశ్యకంగా వ్యక్తిగత ఆస్తిని అభావం చెందిస్తాయి. అయితే ఇది గుర్తించడం వలన దానికదే కమ్యూనిజాన్ని తెచ్చిపెట్టదు. ఆ మార్పు కోసం కార్మిక వర్గం చైతన్యయుత కృషి చేయవలసి ఉంటుంది. దీన్ని గుర్తించడమే కార్మిక వర్గ పార్టీ చేయవలసింది.
- కె.ఆనందాచారి
సెల్ : 9948787660