Authorization
Mon Jan 19, 2015 06:51 pm
- రంగనాయకమ్మ
''నోరు మూసుకో కూడదు ఎప్పుడూ ఆలోచిస్తూ అడగడమే చెయ్యాలి. ఏ సరుకు అయినా, గుండు సూది అయినా, 'సహజ పదార్థం మీద పాత శ్రమ కొంతా - కొత్త శ్రమ కొంతా' జరిగితేనే ఆ రెండు శ్రమల విలువలూ కలిసి ఆ తయారయ్యే సరుకుకి 'మారకం విలువ' అవుతుంది. అంటే, ఆ సరుకుకి అంత విలువ వుందని అర్థం. దాన్ని ఎవరన్నా తీసుకోవాలంటే, అంత విలువ గల ఇంకో సరుకుని ఇచ్చి దీన్ని తీసుకోవాలి. సరుకుల 'మారకాలు' అలా జరుగుతాయి. అది చెప్పుకున్నామా లేదా? అది మర్చిపోతే అదే మళ్ళీ చెప్పుకుందాం. మనం చెప్పుకునే సరుకు 'చొక్కా' కదా? దాని ధర 120 కాబట్టి దాన్ని అమ్మితే 120 డబ్బు వస్తుంది కదా? దానికోసం ఖర్చయిన 'పాత శ్రమ' విలువ 80 కదా? మరి 'కొత్త శ్రమ' విలువఎంత అవుతుంది?'' ' 'కొత్త శ్రమ' విలువ ఎంతంటావా? పాతదీ - కొత్తదీ కలిసి 120 కదా? అందులో పాతది 80 అయితే, అప్పుడు కొత్త శ్రమది 40 అవుద్దీ. అందుకే కదా రెండూ కలిసి చొక్కా ధర 120 అవుద్దీ. ఆ 'ధర'ని అలా పెడితే తప్పేంటీ?''
''హమ్మ! ఇప్పటికి కాస్త దారిలో కొచ్చావు. సరే ఇంకా ఆలోచించు! చొక్కా కోసం అయిన పాత శ్రమ ఖర్చుని 80 అని నీ సారు ఎలా అనుకున్నాడు? 'దుస్తుల' తయారీని ఏ నాటి నుంచో చేయిస్తున్నాడు కదా? ఏ రకం దుస్తుకి సాధనాల ఖర్చు ఎంత అవుతుందో తెలుస్తూనే వుంటుంది. మరి, 'కొత్త శ్రమ విలువ' 40 అని, అది కూడా ఎలా తెలుస్తుంది?''
''మళ్ళీ అడుగుతావేం? 'దుస్తుల్ని' ఎప్పుడూ తయారు చేయించి, ధరలు పట్టి, అమ్ముతున్నాడు కదా? నిన్న తయారైన చొక్కాని 120కి అమ్మ గలిగితే, ఇవ్వాళ తయారైన చొక్కాకి అదే ధర పెట్ట లేడా? 'పాత శ్రమ' గురించి తెలిసినట్టే, కొత్త శ్రమ గురించి మాత్రం గతం నించీ తెలవదా?''
''ఎంత బాగా ఆలోచించావు! చాలా బాగుంది. 'కొత్త శ్రమ' ఏదీ? నువ్వు 10 గంటల సేపు చేసిన కుట్టు శ్రమే కొత్త శ్రమ కదా? అది 'కుట్టు' అయినా కావచ్చు, ఇంకోటైనా కావచ్చనుకో! నీ 'కొత్త శ్రమ విలువ' ఎంతా? 40. ఆ 40 'విలువ' ఎవరిది అవుతుంది? ఆ శ్రమని ఎవరు చేశారో వాళ్ళదే అవుతుంది కదా? అంటే, నీదే. అయితే, నీకు 'జీతం'గా ఎంత ఇచ్చాడు?''
''20 చెప్పాగా?''
''చెప్పావ్ లే. నీ శ్రమ విలువ 40 అయితే, నీకు 20 మాత్రమే వస్తుందేం?''
''ఇదా, చాలా కష్ట పడి నువ్వు అడిగేది? మా సారు నాకు ఉద్యోగం ఇచ్చాడు కదా? ఈ కంపెనీ పెట్టాడంటే ఎంత 'పెట్టుబడి' పెట్టాడు? నా 40ని నా కిచ్చేస్తే అతనికేం మిగులుతుంది? ఎలా బతుకుతాడు? చెప్పాను కదయ్యా?''
''నువ్వెలా బతుకుతున్నావు? ఎవడి శ్రమలో నించైనా నీకు ఒక్క రూపాయి, లేదా ఒక్క పైసా వస్తోందా? నీ శ్రమతోనే నువ్వు బ్రతుకుతున్నావు. నీ భార్య కూడా వేరే చోట పని చేసి జీతం తెచ్చుకుంటోంది. మరి, నీ సారు గానీ, ఆమె సారు గానీ ఎవరి డబ్బుతో బతుకుతున్నారు?''
''నా కొత్త శ్రమ విలువ 40 అయితే, ఆ 40 డబ్బులో నించే కొంత సారుకి వుంటదనుకో!''
'' 'కొంత' అంటే కాదు. 'కొంత' అంటే సారుకి వెళ్ళేది ఎంత?''
''40 లోనించి నాకు 20 వస్తే సారుకి కూడా 20 అవుతుంది.''
''మీ సారు దగ్గిర పని చేసేది,నువ్వు ఒక్కడివే కాదు. మీ కుట్టు సెక్షన్లో ఎంత మంది పని చేస్తున్నారు?''
''50 మంది పైనేలే.''
''నీ పని వల్ల మీ సారుకి రోజుకి మిగిలేది 20 అని తేలిందిగా? మీ సెక్షన్లో పని చేసే 50 మంది వల్ల కూడా అలాగే జరుగుతుంది కదా? మీ రందరూ ఒకే సెక్షన్ వాళ్ళు. ఒక్కొక్కరి నుంచీ 20 చొప్పున, 50 మంది నుంచి వస్తే అది ఎంతవుతుంది? 50 ×20 =1,000. అంటే 'వెయ్యి' అవదూ రోజుకి?''
''ఆ!...? అందర్నించీనా?''
''కాదా? అందరూ పనులు చేస్తున్నారుగా? ఒక్కొక్కరి నుంచీ రోజుకి 20 చొప్పున, 50 మంది నుంచి తీసుకుంటే, 'వెయ్యి' అవుతుందిగా? రోజుకి 'వెయ్యి'. నెలకి ఎంతా? 30 వేలు! కానీ ఆది వారాలు పనులు చెయ్యరు కాబట్టి 5 వేలు రాదులే. నెలకి 25 వేలే అనుకుందాం.''
''ఏం, మాట్లాడవేం?''
''సరే, చెప్పు!''
''మీ కంపెనీలో కుట్టు సెక్షనే గాక ఇంకే సెక్షన్లు వున్నాయి?''
''ఎంబ్రాయిడరీ వుందిలే. చాలా మంది ఆడవాళ్ళు చేస్తారు.''
''ఆ జీతాలూ ఆ ధరలూ తెలుసా నీకు?''
''తెలవదు గానీ, మా దగ్గిర లాగే వాళ్ళకీ అవుతుందేమో!''
''అంటే, ఆ సెక్షన్ నించి కూడా రోజూ 'వెయ్యి' అనుకోవాలా?''
''అనుకోవాలేమో గానీ, సుబ్బారావ్! రోజూ నా దగ్గిర్నించి 20 తీసుకోకుండా, పోనీ 10 తీసుకుని నాకు జీతంగా 30 ఇస్తే నాకు బాగుంటుందిగా?''
''నీకు బాగుంటుందిలే. నీ సారుకి బాగుంటుందా? అతనికి అందేది తగ్గిపోదూ? రోజూ నీ శ్రమలో నుంచి 10 మాత్రమే తీసుకుంటే, పాతిక రోజులికి తీసుకునేది ఎంతా? - 250. ఇది నీ ఒక్కడి నుంచేనా? ప్రతీ కార్మికుడి నుంచీ జరిగేది అదే కదా?''
''10 కాదు గానీ, పోనీ నా దగ్గిర్నించి రెండో మూడో తీసుకుంటే?''
''రోజుకి రెండో, మూడో మాత్రం ఎందుకు తీసుకోవాలయ్యా, 50 మంది నుంచీ? అది కూడా యజమానికి రోజుకి వందో, నూట యాభయ్యో అవదూ? నెలకి వేల కొద్దీ అవుతుంది. ఒక కార్మికుడి నుంచి రోజుకి ఒక్క రూపాయే యజమానికి పోతే, 50 మంది నుంచి ఎంత? 50 రూపాయలు. నెలకి ఎంత? అలా లెక్క పెట్టూ!''
''అదీ ఎక్కువే అవుతుందిలే.''
''అయితే విను! మీ సెక్షన్ నుంచి నెలకి 25 వేలు. రెండో సెక్షన్ నుంచి కూడా నెలకి ఇంకో 25 వేలు. ఇప్పటికి నెలకి 50 వేలు! అసలు మీది అతి చిన్న కంపెనీ. 6 నెల్ల కింద పెట్టిందనుకుంటా. దీన్ని బట్టి నీకేం తెలుస్తోంది?''
''................''
''ఇంకో మాట విను! నువ్వు రోజుకి 10 గంటలు పని చేస్తావు. నీ శ్రమ విలువ 40 రూపాయలు. నీకు జీతం 20 మాత్రమే. అంటే నీ జీతం, 10 గంటలదా, 5 గంటలదా?''
''...............''
''మార్క్సు ఏం చెప్పాడో తెలుసా? నీ ఉదాహరణ తోటే చెప్పుకుందాం. నువ్వు రోజుకి 10 గంటలు పని చేస్తే, నీకు వచ్చే జీతం 5 గంటలదే! నీ 10 గంటల శ్రమ విలువ 40 అయితే, నీకు వచ్చేది 20 మాత్రమే. నువ్వు పొద్దున్నే 9 గంటలకు వచ్చి పనిలోకి దిగుతావు. 5 గంటల సేపు చేస్తే చాలు! అప్పటికి 20 విలువ గల పని చేసేసినట్టే! నీ జీతం 20 య్యే కాబట్టి 5 గంటల పని పూర్తి అవగానే లేచి జీతం తీసుకుని వెళ్ళి పోవచ్చు.''
''అమ్మో అప్పుడే జీతం ఇచ్చేస్తారా?''
''ఇవ్వర్లే. నీ ఉదాహరణలో 5 గంటలు జరిగే వరకూ అయితే నువ్వు తప్పని సరిగా పని చెయ్యాలి. 20 జీతం కోసం నువ్వు పని చెయ్య వలిసిన కాలం 'అవసర కాలం'. అది 20 కోసం తప్పకుండా చెయ్యవలిసిన 'అవసర శ్రమ'. ఆ శ్రమ చెయ్యడం నీ బతుకు దెరువు కోసం. ఆ పైన, ఇంకో 5 గంటలు కూడా చెయ్య వలిసిన అవసరం లేదు. అయినా అలా చేస్తే అది 'అదనపు శ్రమ' అవుతుంది. దేని కన్నా 'అదనం'? నువ్వు చెయ్యవలిసిన 5 గంటల అవసర శ్రమ కన్నా ఒక్క నిమిషం ఎక్కువ సేపు చేసినా అది 'అదనం'గా చేసేదే. 'డబ్బు' లెక్కతో చెప్పుకుంటే నీ శ్రమలో నుంచి నీకు వచ్చే 'జీతం 20' కన్నా నీకు రాకుండా పోయే రెండో 20 యజమానికే పోతుంది. అందులో నించే కదా 'వడ్డీ' అనీ, 'లాభం' అనీ, 'కౌలు' అనీ, తనకు కూడా 'జీతం' అనీ, ఇంకా చాలా పేర్లున్నాయిలే అవన్నీ కూడా వెళ్తాయి.'' (ఇంకా వుంది)