ఎవరు పారేసుకున్నారో?
ఎంతో పోగొట్టుకున్నట్లే పాపం.
గుప్పెడు మల్లెలు కావివి
గంపెడు కలల్ని పిలిచే నేస్తాలు...

కోసేటప్పుడు సంతోషంలో
ఏ రాగంతో పిలిచారో
పొంగే వాసనతో
ఎంత మత్తుగా మైమరిచారో

విరియని బుగ్గలో
వాడని మొగ్గ మోమును
గుప్పెట గూడున చేర్చి
నీటి జల్లుతో నిద్రలేపి
సిగ్గుపడుతున్న చెక్కిలి నిమిరి
సువాసనను తడిమి

నవనవలాడే అందాన్ని
దారపు ముడితో ఒద్దిక చేర్చి
మాలను చూపుతో చక్కపరచి

ముద్దుగా ప్రేయసి వద్దకు చేరాలని
హద్దులు సన్నగా చెరపాలని
తేనెలో ముంచిన కలకు
తీపిగా మెడలో వేయాలన్న

గుసగుసలును విని
గుండె చప్పుడు కని
మల్లె మనసు చెదిరి
తునకలై వాసనతో

నేలను చేరి
చేదు రాత్రి ఒడిలో కనుమూసాయే!
ఎవరు పారేసుకున్నారో
ఎంతో పోగొట్టుకున్నట్లే పాపం.
- శ్రీ సాహితి, 8309463567