Authorization
Mon Jan 19, 2015 06:51 pm
ప్రేమలో పడడం సులభమే... కానీ దాన్ని నిలబెట్టుకోవడానికే ఎన్నో పాట్లు పడాలి. ఆ పాట్లు మీ లవ్ను ప్రపోజ్ చేయడం దగ్గర నుండే మొదలవుతాయి. తరచుగా మనం మనసులో చేసే కొన్ని ఆలోచనలు నిజ జీవితంలో అస్సలు పని చేయవు. అదేలా అంటే మీరు మీ ప్రేమ కోసం మంచి డిన్నర్ పార్టీ ఏర్పాటు చేసి ఉంటే, ఆ సమయం వారికి అనువుగా ఉండకపోవచ్చు. ఇలాంటి చిన్న చిన్నవి పెద్ద విషయాలు కాకపోయినప్పటికీ కొన్ని మాత్రం జీవితాన్ని శాసించేవిలా మారుతాయి. ప్రేమించే వ్యక్తిని జీవిత భాగస్వామిగా పొందడం అతి కొద్దిమందికి మాత్రమే దక్కే అద్భుతమైన వరం.
హడావుడి వీధుల్లో, జనాల మధ్య ప్రపోజ్ చేయాలని భావిస్తున్నారా? లేక అదేదో సినిమాలో షారూఖ్ ఖాన్ స్టైల్లో మోకాళ్ళ మీద నిలబడి, ఏదైనా కవిత చెప్తూ, రోజా పువ్వు ఇస్తూ ప్రపోజ్ చేయాలని ఆలోచిస్తున్నారా? కానీ, ఇదివరకే అలా చాలామందే ప్రపోజ్ చేశారు కదా! మరి మీ స్పెషాలిటీ ఏముందిక్కడ. ఎవరో రాసిన కవితలు చదివి, ఎవరో ఫాలో అయిన విధానం మీరూ పాటిస్తే అందులో అందమైన ఫీలింగ్ వెతకాలంటే కొంచం కష్టమే. కచ్చితంగా మీ ఆలోచన అందంగానే ఉండొచ్చు. కానీ అవతలి వ్యక్తి కూడా అలాగే భావిస్తారని లేదు కదా. అందుకే మీరు ఇష్టపడే వ్యక్తికి ప్రపోజ్ చేసేటప్పుడు అస్సలు చేయకూడని తప్పులు ఏంటో తెలుసుకుందాం.
ఆశ్చర్యంగా ఉంటే మంచిది : ఆశ్చర్యం అనేది కొంతమందికి అత్యంత అపురూపమైన విషయం. మీ ప్రపోజింగ్ వాళ్లకు ఆశ్చర్యాన్నిస్తే, దాన్ని జీవితాంతం గుర్తుంచు కుంటారు. అయితే ప్రపోజింగ్ అనేది మనసుకి సంబంధించిన విషయం. అది సమయాన్ని దాటేసేలా ఉండకూడదు. అంతేకాకుండా మీ ప్రపోజల్ వాళ్లకు ఆశ్చర్యాన్ని, అనుభూతిని ఇవ్వనప్పుడు మీ ప్రేమను స్వాగతించకపోవచ్చు. కానీ ఇక్కడ ఒక విషయం గుర్తుంచుకోవాలి. అవతలి వ్యక్తి గురించి మీకు పూర్తిస్థాయిలో అవగాహన ఉన్నప్పుడే వాళ్ళ అభిరుచులకు తగినట్లుగా వాళ్ళ ఇష్టాలకు విలువిచ్చేలా మీ ప్రపోజల్ ఉండేలా చూసుకోగలరు. మీరు ఆశ్చర్యాన్ని వ్వాలన్న ఆలోచనతో మనసుని బాధపెట్టేలా మీ చర్యలు ఉండకూడదని గుర్తుంచుకోండి. మీరు మాట్లాడే విషయాలు, వాళ్ళ జీవితానికి దగ్గరగా ఉన్నప్పుడు, మనసు నొచ్చుకునే అవకాశాలు కూడా ఉన్నాయి.
తొందరపాటు వద్దు : మనం ప్రపోజ్ చేసేదే ఎక్కువ, ఇంకా లాగ్ అవసరమా? అన్న ఆలోచన చాలామందిలో ఉంటుంది. వీళ్ళు కట్టె, కొట్టె, తెచ్చే అన్నట్లుగా ఎటువంటి విషయాలనైనా తేల్చేస్తుంటారు. ఎదుటి వ్యక్తి భావాలతో ఎలాంటి అవసరం లేదన్నట్లుగా. ఇది కచ్చితంగా ఆలోచించాల్సిన విషయం. ప్రేమ అనేది ఓ జీవితకాల అనుబంధానికి పునాది. మీ ప్రేమ చిరకాలం సంతోషంగా కొనసాగాలి అంటే కొంత ఓపిక, సహనం అవసరం. ప్రపోజ్ చేయడంలోనే మీకు ఓపిక, సహనం లేకపోతే ఇక జీవితకాలం మీరు అదే ప్రేమను కొనసాగిస్తారన్న నమ్మకం వారికి ఎలా ఉంటుంది చెప్పండి.
ఆలస్యం కూడా వద్దు : కొందరు నిదానమే ప్రదానం అంటే.. మరి కొందరు ఆలస్యం అమృతం విషం అంటారు. ఏది ఏమైనా పరిస్థితులను అను సరించి నిర్ణయాలను తెలివిగా తీసుకోవడం మంచిది. కొన్ని సార్లు మీ ఆలస్యం కొత్త కష్టాలను తీసుకుని రావొచ్చు. మీరు ఆలస్యం చేసే కొద్దీ మీకు వారిమీద ఆసక్తి లేదేమో అన్న ఆలోచన వారికి కలగవచ్చు. క్రమంగా మీ మీద ఆసక్తి తగ్గే అవకాశాలు కూడా ఉన్నాయి. మీరు నిజం గా ఆ వ్యక్తిని మనస్పూర్తిగా ప్రేమిస్తుంటే అంత ఆలస్యమైతే చేయరు.
బహిరంగ ప్రదేశంల్లో : కొందరు సినిమాల ప్రభావంతో హాలీవుడ్ బాలీవుడ్ స్టైల్లో హీరోయిన్ వెంట పరిగెత్తి డైమండ్ రింగులు ఇచ్చి ప్రపోజ్ చేద్దాం అని అనుకుంటారు. ఇవన్నీ సినిమాల్లోనే బావుంటాయి. కానీ నిజ జీవితంలో కాదు. మీరు బహిరంగ ప్రదేశాలలో ఇలా ప్రపోజింగ్ చేస్తే మీరు చేసినదానికి ఆశ్చర్యం, భయం రెండూ కలిసిపోయి ఎదుటివారు మీకు ''నో'' చెప్పే అవకాశాలు ఎక్కువగా ఉంటాయి. అంతేకాకుండా చుట్టుపక్కల ప్రజలు ఈ చర్యల పట్ల ఆసక్తిని చూపకపోవచ్చు. కాబట్టి చుట్టూ ఉన్నవారికి కొద్దిగా గౌరవం ఉండాలని చూసుకోండి..
భావాలను వ్యక్తపరిచే క్షణం : ప్రపోజింగ్ అనేది, మీరు ఇష్టపడే వ్యక్తికి మీ లోతైన భావోద్వేగాలను, భావాలను వ్యక్తపరిచే క్షణం. మీ ఆలోచనలో ముద్దు అనేది మీ ప్రేమను వ్యక్తపరచడానికే అయ్యుండొచ్చు. కానీ అవతలి వారికి మీ చర్య శారీరిక సంబంధాన్ని కోరుకుంటున్నట్లుగా అనిపించే అవకాశాలు ఉన్నాయి. మీ గురించి ఒక అవగాహన పూర్తిగా ఉన్నా కూడా బెడిసి కొట్టే అవకాశాలే అధికం. కాబట్టి ముద్దు, లేదా కౌగిలింత వంటి ఆలోచనలు ఉంటే ఆచితూచి వ్యవహరించడం మేలు.