Authorization
Mon Jan 19, 2015 06:51 pm
- నేటి నుంచి ఫ్రెంచ్ ఓపెన్
- బరిలో జకోవిచ్, సెరెనా, ముర్రే
పారిస్ : మట్టి కోర్టు మొనగాడు, స్పెయిన్ బుల్ గ్రాండ్స్లామ్ టైటిళ్ల రికార్డులో దిగ్గజం రోజర్ ఫెడరర్ రికార్డును సమం చేసేందుకు రంగంలోకి దిగుతున్నాడు. 12 సార్లు ఫ్రెంచ్ ఓపెన్ను కైవసం చేసుకున్న రఫెల్ నాదల్.. నేటి నుంచి ఆరంభం కానున్న మట్టికోర్టు గ్రాండ్స్లామ్లో టైటిల్ ఫేవరేట్గా బరిలోకి దిగుతున్నాడు. మోకాలి గాయానికి శస్త్ర చికిత్స చేయించుకున్న రోజర్ ఫెడరర్ వరుసగా రెండో గ్రాండ్స్లామ్కు దూరమ య్యాడు. వరల్డ్ నం.1 నొవాక్ జకోవిచ్తో పాటు వైల్డ్ కార్డ్ ఎంట్రీ బ్రిటన్ స్టార్ ఆండీ ముర్రే టైటిల్ రేసులో నాదల్కు సవాల్ విసరనున్నారు. యు.ఎస్ ఓపెన్ విజేత నవొమి ఒసాక, ఫ్రెంచ్ ఓపెన్ డిఫెండింగ్ చాంపియన్ ఆష్లె బార్టీ, యుఎస్ ఓపెన్ మాజీ విజేత బియాంక అండ్రిస్కూలు పారిస్లో బరిలోకి దిగటం లేదు.
నాదల్ కొడతాడా?
రోజర్ ఫెడరర్ 20 గ్రాండ్స్లామ్ టైటిళ్లలో అగ్రస్థానంలో ఉండగా, 19 గ్రాండ్స్లామ్ విజయాలతో రఫెల్ నాదల్ దిగ్గజాన్ని అనుసరిస్తున్నాడు. అచ్చొచ్చిన ఫ్రెంచ్ ఓపెన్లో మరో గ్రాండ్స్లామ్ టైటిల్తో రోజర్ సరసన నిలిచేందుకు నాదల్ జోరుమీదున్నాడు. యుఎస్ ఓపెన్కు దూరంగా ఉన్న నాదల్.. కరోనా సమయంలో ఆడుతున్న తొలి గ్రాండ్స్లామ్ టోర్నీ ఇదే. యు.ఎస్ ఓపెన్లో వివాదాస్పద రీతిలో అనర్హత వేటుకు గురైన నొవాక్ జకోవిచ్ ఇక్కడ టైటిల్తో ఊపశమనం పొందాలని చూస్తున్నాడు. ఫామ్ కోల్పోయి ఇబ్బందులు పడుతున్న ఆండీ ముర్రే మళ్లీ తన సత్తా చాటేందుకు ఎదురుచూస్తున్నాడు. యుఎస్ ఓపెన్ ఫైనలిస్ట్లు డొమినిక్ థీమ్, అలెగ్జాండర్ జ్వెరెవ్లు సైతం టైటిల్ రేసులో సై అంటున్నారు.
మహిళల సింగిల్స్ విభాగంలో సిమోన హలెప్ టాప్ సీడ్గా బరిలోకి దిగుతున్నా... సెరెనా విలియమ్స్ టైటిల్ ఫేవరేట్గా కనిపిస్తోంది. కెరీర్ 24వ గ్రాండ్స్లామ్ టైటిల్ వేటను సెరెనా పారిస్లో కొత్తగా మొదలుపెట్టాలని భావిస్తోంది. విక్టోరియా అజరెంకా, జెన్నీఫర్ బ్రాడీలు సైతం సత్తా చాటాలని అనుకుంటున్నారు. కరోనా వైరస్ మహమ్మారి కారణంగా ఫ్రెంచ్ ఓపెన్కు మునుపటి రీతిలో ప్రేక్షకులు రావటం లేదు. కరోనా నివారణ చర్యలు తీసుకుని రోజుకు కేవలం వెయ్యి మంది వీక్షించేందుకు ఫ్రాన్స్ ప్రభుత్వం అనుమతులు ఇచ్చింది. యుఎస్ ఓపెన్ కంటే కాస్త సరళమైన బబుల్లో జరుగుతున్న ఫ్రెంచ్ ఓపెన్లో పోటీపడుతున్న అథ్లెట్ల సంఖ్య సైతం పెరగటం గమనార్హం.