- రూ. 2 కోట్లకు తీసుకున్న సన్‌రైజర్స్‌
హైదరాబాద్ : ఇంగ్లాండ్‌ ఓపెనర్‌, డ్యాషింగ్‌ బ్యాట్స్‌మన్‌ జేసన్‌ రాయ్ సన్‌రైజర్స్‌ హైదరాబాద్ శిబిరంలో చేరనున్నాడు. ఆటగాళ్ల వేలంలో అమ్ముడుపోని జేసన్‌ రాయ్ ని హైదరాబాద్ రూ. 2 కోట్ల కనీస ధరకు సొంతం చేసుకుంది. గత సీజన్‌లో హైదరాబాద్ తొలి మ్యాచ్‌లోనే గాయపడి సీజన్‌ మొత్తానికి దూరమైన ఆస్ట్రేలియా స్టార్‌ ఆల్‌రౌండర్‌ మిచెల్‌ మార్ష్‌.. వ్యక్తిగత కారణాలతో ఐపీఎల్‌ 2021కు సైతం దూరమయ్యాడు. మిచెల్‌ మార్ష్‌ స్థానంలో జేసన్‌ రాయ్ ని సన్‌రైజర్స్‌ హైదరాబాద్‌కు తీసుకుంది. 'మిచెల్‌ మార్ష్‌ స్థానంలో ఇంగ్లాండ్‌ బ్యాట్స్‌మన్‌ జేసన్‌ రాయ్ తో సన్‌రైజర్స్‌ హైదరాబాద్ ఒప్పందం చేసుకుంది. వ్యక్తిగత కారణాలతో మిచెల్‌ ఐపీఎల్‌కు దూరంగా ఉంటున్నాడు' అని సన్‌రైజర్స్‌ హైదరాబాద్ ట్వీట్‌ చేసింది. 2017లో గుజరాత్‌ లయన్స్‌ తరఫున ఐపీఎల్‌ అరంగ్రేటం చేసిన రాయ్, రెండు సీజన్ల పాటు ఢిల్లీ క్యాపిటల్స్‌కు ఆడాడు. గాయం కారణంగా జేసన్‌ రాయ్ గత సీజన్‌లో ఆడలేదు. ఐపీఎల్‌లో ఎనిమిది మ్యాచులు ఆడిన జేసన్‌ రాయ్ 179 పరుగులు సహా ఓ అర్థ సెంచరీ సాధించాడు. ఇటీవల భారత్‌ తో వైట్‌బాల్‌ సిరీస్‌లో రాణించినా, భారీ స్కోర్లు చేయలేకపోయాడు. సన్‌రైజర్స్‌ హైదరాబాద్ తుది జట్టు కూర్పులో విదేశీ ఆటగాళ్ల బెర్త్‌లు ముందే ఖాయం కావటంతో జేసన్‌ రాయ్ కు అవకాశం రావటం కష్టమే!.
