- ఐసీసీ వన్డే ర్యాంకింగ్స్‌
దుబాయ్ : భారత కెప్టెన్‌, సూపర్‌స్టార్‌ విరాట్‌ కోహ్లి బ్యాటింగ్‌ జాబితాలో అగ్రస్థానంలోనే కొనసాగుతున్నాడు. ఇంగ్లాండ్‌తో తొలి రెండు వన్డేల్లో వరుస అర్థ సెంచరీలు సాధించిన విరాట్‌ కోహ్లి 870 రేటింగ్‌ పాయింట్లతో వరల్డ్‌ నం.1 బ్యాట్స్‌మన్‌గా నిలిచాడు. భారత వైస్‌ కెప్టెన్‌ రోహిత్‌ శర్మ మూడో స్థానంలో నిలువగా, పాకిస్థాన్‌ ఆటగాడు బాబర్‌ ఆజామ్‌ రెండో స్థానంలో ఉన్నాడు. కెఎల్‌ రాహుల్‌ 31వ స్థానం నుంచి 27వ ర్యాంక్‌కు చేరుకున్నాడు. ఆల్‌రౌండర్‌ హార్దిక్‌ పాండ్య ఆకట్టుకునే ఇన్నింగ్స్‌లతో కెరీర్‌ అత్యుత్తమ 42వ ర్యాంక్‌కు చేరుకోగా.. యువ వికెట్‌ కీపర్‌ బ్యాట్స్‌మన్‌ రిషబ్‌ పంత్‌ వన్డే ర్యాంకింగ్స్‌లో టాప్‌-100లోకి ప్రవేశించాడు. బౌలర్ల జాబితాలో భారత స్టార్‌ పేసర్‌ జశ్‌ప్రీత్‌ బుమ్రా ఓ స్థానం కోల్పోయి నాలుగో స్థానంలో నిలిచాడు. ఇంగ్లాండ్‌తో సిరీస్‌కు దూరమైన బుమ్రా 690 రేటింగ్‌ పాయింట్లతో బౌల్ట్‌, ముజీబ్‌ రెహమాన్‌, మాట్‌ హెన్రీ తర్వాతి స్థానంలో కొనసాగుతున్నాడు. బుమ్రా మినహా మరో భారత బౌలర్‌ టాప్‌-10లో చోటు దక్కించుకోలేదు.