బెంగళూరు: రాయల్‌ ఛాలెంజర్స్‌ బెంగళూరు(ఆర్సీబీ) ఫ్రాంచైజీ ఆటగాళ్ల జెర్సీలను మార్చింది. ఎందుకంటే.. దేశంలో కోవిడ్‌ మహమ్మారితో పోరాడుతూ ఫ్రంట్‌లైన్‌ వారియర్స్‌కు మద్దతుగా నిలిచేందుకు ప్రత్యేకంగా బ్లూ జెర్సీలో బరిలోకి దిగనున్నట్లు ఆర్సీబీ ఆదివారం ట్విట్టర్‌ ద్వారా తెలిపింది. అలాగే తమవంతుగా సాయంగా విరాళాల సేకరణకు కృషి చేస్తామని హామీ ఇచ్చింది. దీనికి కొత్తగా తయారు చేసిన బ్లూ కలర్‌ జెర్సీని రానున్న మ్యాచ్‌ల్లో ధరిస్తామని, వాటిని వేలం వేయగా వచ్చిన నిధులను దేశంలోని ఆస్పత్రుల్లో ఆక్సిజన్‌ సరఫరా కోసం ఇవ్వనున్నట్లు వెల్లడించింది. 'గతేడాది కోవిడ్‌ నియంత్రణలో భాగంగా ముందుండి పోరాడిన ఉద్యోగుల గౌరవార్థం ఈ జెర్సీలను ధరించనున్నాం. వీటిని వేలం వేయగా వచ్చిన నిధులను దేశంలోని ఆక్సిజన్‌ సరఫరా కోసం ఇవ్వనున్నాం' అని ఆర్సీబీ షేర్‌ చేసిన వీడియోలో కెప్టెన్‌ విరాట్‌ కోహ్లి పేర్కొన్నాడు.
