హరారే: జింబాబ్వేతో జరుగుతున్న రెండోటెస్ట్‌లో పాకిస్తాన్‌ భారీస్కోర్‌ను నమోదు చేసింది. ఓవర్‌నైట్‌ స్కోర్‌ 4 వికెట్ల నష్టానికి 268 పరుగులతో శనివారం ఆటను కొనసాగించిన పాకిస్తాన్‌ 8వికెట్ల నష్టానికి 510 పరుగుల స్కోర్‌వద్ద తొలి ఇన్నింగ్స్‌ను డిక్లేర్డ్‌ చేసింది. అబిద్‌ అలీ(215) డబుల్‌ సెంచరీతో కదం తొక్కగా.. నౌమన్‌ అలీ(97) తృటిలో సెంచరీని చేజార్చుకున్నాడు. ఛిసోరోకు రెండు, నరవ, జొంగ్వే, తిరిపానోకు ఒక్కో వికెట్‌ దక్కాయి. అనంతరం తొలి ఇన్నింగ్స్‌ ప్రారంభించిన జింబాబ్వే 52 పరుగులకే 4 వికెట్లు కోల్పోయి కష్టాల్లో పడింది. రెండోరోజు ఆట ముగిసే సమయానికి వికెట్‌ కీపర్‌ రేగిస్‌(28), ఛిసోరో(1) క్రీజ్‌లో ఉన్నారు. అఫ్రిది, తబిష్‌, హసన్‌ అలీ, సాజిద్‌ ఖాన్‌లకు ఒక్కో వికెట్‌ దక్కాయి.