భారత్‌తో సిరీస్‌ షెడ్యూల్‌పై ఈసీబీ
లండన్‌ : కోవిడ్‌ కలకలంతో వాయిదా పడిన ఇండియన్‌ ప్రీమియర్‌ లీగ్‌ (ఐపీఎల్‌) 2021 సీజన్‌లో మిగిలిన 31 మ్యాచులను నిర్వహించేందుకు భారత క్రికెట్‌ నియంత్రణ మండలి (బీసీసీఐ) క్యాలెండర్‌లో అన్ని అవకాశాలను పరిశీలిస్తోన్న సంగతి తెలిసిందే. ఐపీఎల్‌ కోసం భారత్‌, ఇంగ్లాండ్‌ టెస్టు సిరీస్‌ను ఓ వారం ముందుగా ఆరంభించటం లేదా ఐదో టెస్టును తీసేయటం వంటి ప్రతిపాదనలను ఇంగ్లాండ్‌ అండ్‌ వేల్స్‌ క్రికెట్‌ బోర్డు (ఈసీబీ)కు బీసీసీఐ పంపినట్టు ఇటీవల వార్తలు వచ్చాయి. అయితే బీసీసీఐ నుంచి ఎటువంటి ప్రతిపాదనలు రాలేదని ఈసీబీ వర్గాలు వెల్లడించాయి. క్రికెట్‌ క్యాలెండర్‌ ద్వైపాక్షిక సిరీస్‌లతో నిండిపోవటంతో.. ఐపీఎల్‌ విండో కోసం బీసీసీఐ గట్టి ప్రయత్నాలు చేస్తోంది. బీసీసీఐ నుంచి ఇటువంటి ప్రతిపాదనలను ప్రస్తుతం ఈసీబీ సంతోషంగా స్వీకరించే అవకాశం కనిపిస్తోంది. ఈసీబీ గ్లోబల్‌ లీగ్‌ ' ది హండ్రెడ్‌'లో భారత క్రికెటర్లకు అనుమతి లేదా ఈ ఏడాది ఐపీఎల్‌ మిగతా సీజన్‌ను ఇంగ్లాండ్‌లో నిర్వహించాలనే షరతులను ఈసీబీ విధించే అవకాశం ఉంది.
