- మెరిసిన నొవాక్‌ జకోవిచ్‌
- ఫ్రెంచ్‌ ఓపెన్‌ గ్రాండ్‌స్లామ్‌
పారిస్‌ (ఫ్రాన్స్‌)
జర్మనీ స్టార్‌, ఆరోసీడ్‌ ఆటగాడు అలెగ్జాండర్‌ జ్వెరెవ్‌ ఫ్రెంచ్‌ ఓపెన్‌ మూడో రౌండ్లోకి అడుగుపెట్టాడు. రష్యన్‌ క్వాలిఫయర్‌ రోమన్‌ సఫీలున్‌పై 7-6(6-4), 6-3, 7-6(6-1)తో జ్వెరెవ్‌ రెండో రౌండ్‌ మ్యాచ్‌లో విజయం సాధించాడు. క్వాలిఫయర్‌పై 15 ఏస్‌లు సంధించిన అలెగ్జాండర్‌.. పది డబుల్‌ ఫాల్ట్స్‌కు పాల్పడినా ప్రత్యర్థికి ఎటువంటి అవకాశం ఇవ్వలేదు. తొలి సెట్‌ను టైబ్రేకర్‌లో గెల్చుకున్న జ్వెరెవ్‌.. మూడో సెట్‌ను సైతం టైబ్రేకర్‌లోనే సాధించాడు. మూడు బ్రేక్‌ పాయింట్లు సాధించిన జ్వెరెవ్‌.. పాయింట్ల పరంగా 115-97తో పైచేయి సాధించాడు. వరల్డ్‌ నం.1, టాప్‌ సీడ్‌ నొవాక్‌ జకోవిచ్‌ 6-2, 6-4, 6-2తో అమెరికా ఆటగాడు టెన్నిస్‌ శాండ్‌గ్రామ్‌పై గెలుపొందాడు. కాస్పర్‌ రుడ్‌ 6-3, 6-2, 6-4తో కామిల్‌పై రెండో రౌండ్లో విజయం సాధించాడు. 11వ సీడ్‌ రాబర్టో బటిస్టా ఆగట్‌ క్వాలిఫయర్‌ చేతిలో మట్టికరిచాడు. నాలుగు సెట్ల పోరులో హెన్రీ లాక్సోనెన్‌ 6-3, 2-6, 6-3, 6-2తో విజయం సాధించాడు. లాస్లో డెరె 4-6, 4-6, 6-3, 6-2, 6-3తో మియోమిర్‌పై గెలుపొందాడు. ఫబియో ఫోగ్నిని 7-6(8-6), 6-1, 6-2తో మార్టన్‌పై వరుస సెట్లలో విజయం సాధించాడు. జాన్‌ ఇస్నర్‌ 7-6(8-6), 6-1, 7-6(7-5)తో ఫిలిప్‌ క్రజోవిచ్‌పై పైచేయి సాధించాడు.
మహిళల సింగిల్స్‌లో డానిలీ రోస్‌ 6-0, 6-2తో కాలినినాపై, డరియ 6-2, 6-2తో బెలిందాపై వరుస సెట్లలో విజయం సాధించారు. సోరానా సిర్సెస్టా 6-4, 3-6, 6-3తో మార్టెనా ట్రెవిసన్‌ను మూడు సెట్ల మ్యాచ్‌లో ఓడించింది. సియానికోవ 7-6(9-7), 5-7, 7-5తో వెరోనికాపై విజయం సాధించింది.
