- ఐసిసి టెస్ట్‌ ర్యాంకింగ్స్‌ విడుదల
దుబారు: ఐసిసి టెస్ట్‌ బ్యాట్స్‌మన్ల ర్యాంకింగ్స్‌లో విరాట్‌ కోహ్లి నాల్గో స్థానానికి ఎగబాకాడు. అంతర్జాతీయ క్రికెట్‌మండలి(ఐసిసి) టెస్ట్‌ బ్యాట్స్‌మన్ల జాబితాలో టీమిండియా కెప్టెన్‌ విరాట్‌ కోహ్లీ 814 రేటింగ్‌ పాయింట్లతో ఓ స్థానాన్ని మెరుగుపరచుకుని నాల్గో ర్యాంక్‌కు ఎగబాకాడు. త్వరలో ప్రపంచ టెస్ట్‌ ఛాంపియనిషిప్‌(డబ్ల్యూసి) ఫైనల్‌, ఇంగ్లండ్‌తో 5 టెస్ట్‌ల సిరీస్‌ ఆడాల్సిన నేపథ్యంలో టెస్ట్‌ ర్యాంకింగ్స్‌లో విరాట్‌ మళ్లీ అగ్రస్థానానికి ఎగబాకే అవకాశాలు మెండుగా కనిపిస్తున్నాయి. ఇక తాజా ర్యాంకింగ్స్‌లో ఆస్ట్రేలియా మాజీ సారథి స్టీవ్‌ స్మిత్‌(891 పాయింట్లు) న్యూజిలాండ్‌ కెప్టెన్‌ కేన్‌ విలియమ్సన్‌ను వెనక్కి నెట్టి తిరిగి అగ్రస్థానానికి చేరుకోగా.. ఆసీస్‌ ఆటగాడు మార్నస్‌ లబూషేన్‌ మూడో ర్యాంకులో, ఇంగ్లండ్‌ సారథి జో రూట్‌ ఐదో స్థానంలో కొనసాగుతున్నారు. రిషబ్‌ పంత్‌(797), రోహిత్‌ శర్మ(797) సంయుక్తంగా ఆరో స్థానంలో నిలిచారు. ఇంగ్లండ్‌తో జరిగిన టెస్ట్‌ సిరీస్‌లో కివీస్‌ కెప్టెన్‌ విలియమ్సన్‌(886) విఫలం కావడంతో అతడి రేటింగ్‌ పాయింట్లలో కోత పడింది. టెస్ట్‌ బౌలర్ల జాబితాలో ఆస్ట్రేలియా పేసర్‌ ప్యాట్‌ కమిన్స్‌(908 పాయింట్లు), భారత స్పిన్నర్‌ రవిచంద్రన్‌ అశ్విన్‌(850), న్యూజిలాండ్‌ పేసర్‌ టిమ్‌ సౌథీ (830) టాప్‌-3 కొనసాగుతున్నారు. ఆల్‌రౌండర్ల జాబితాలో అశ్విన్‌ 2, జడేజా 4స్థానాల్లో కొనసాగుతున్నారు.