- భారత్‌, ఇంగ్లాండ్‌ తొలి టీ20 నేడు
నార్తంప్టన్‌ : ఇంగ్లాండ్‌ పర్యటనలో భారత అమ్మాయిల పోరాటం చివరి అంకానికి చేరుకుంది. ఏకైక టెస్టును డ్రా చేసుకుని, వన్డే సిరీస్‌ను కోల్పోయిన అమ్మాయిలు..నేటి నుంచి ఆరంభమయ్యే టీ20 సిరీస్‌ను సొంతం చేసుకోవాలనే కసితో ఉన్నారు. కోవిడ్‌ బారిన పడి, ఉత్తమ ఫిట్‌నెస్‌ కోసం శ్రమిస్తున్న కెప్టెన్‌ హర్మన్‌ప్రీత్‌ కౌర్‌ ఇంగ్లాండ్‌ పర్యటనలో విఫలమైంది. కెప్టెన్సీ బాధ్యతలతో టీ20ల్లో హర్మన్‌ మెరుస్తుందనే అంచనాలు ఉన్నాయి. భారత్‌, ఇంగ్లాండ్‌ తొలి టీ20 నేపథ్యంలో అందరి చూపులు ఆమెపైనే ఉన్నాయి. ' రెండో వన్డేలో మేము బౌలింగ్‌, ఫీల్డింగ్‌లో మంచి ప్రదర్శన చేశాం. సుదీర్ఘ విరామం అనంతరం అంతర్జాతీయ క్రికెట్‌ అంత సులువు కాదు. మూడో వన్డేలో విజయం ఎంతో కీలకం. అదే జోరును టీ20ల్లోనూ కొనసాగిస్తామని' అని హర్మన్‌ప్రీత్‌ కౌర్‌ తెలిపింది. భారత కాలమానం ప్రకారం నేడు రాత్రి 11.30 గంటలకు టీ20 పోరు ఆరంభం కానుంది.