- భారత్‌, ఇంగ్లాండ్‌ మూడో టీ20 నేడు
ఛెమ్స్‌ఫర్డ్‌ : ఇంగ్లాండ్‌ పర్యటన నుంచి చిన్న ట్రోఫీతోనైనా స్వదేశానికి చేరుకునేందుకు భారత అమ్మాయిలు రంగం సిద్ధం చేసుకుంటున్నారు. వన్డే సిరీస్‌ను 1-2తో ఓడిన భారత మహిళల జట్టు.. టీ20 సిరీస్‌లో 1-1తో సమవుజ్జీగా నిలిచింది. బౌలింగ్‌, ఫీల్డింగ్‌లో మెరుపు ప్రదర్శన చేసి రెండో టీ20లో గెలుపొందిన హర్మన్‌ప్రీత్‌ సేన.. నేడు నిర్ణయాత్మక పోరులో అదే స్ఫూర్తి ప్రదర్శించేందుకు ఎదురుచూస్తోంది. భీకర ఫామ్‌లో ఉన్న ఇంగ్లాంద్‌ బ్యాటింగ్‌ లైనప్‌, బౌలింగ్‌ లైనప్‌ను నిలువరించటం అంత సులువు కాదు. కానీ హర్మన్‌ప్రీత్‌ కౌర్‌ ఫామ్‌లోకి రావటంతో భారత జట్టు బ్యాటింగ్‌కు అదనపు బలం చేకూరింది. మంధాన, ఫెఫాలీ, కౌర్‌లు మెరిస్తే ఇంగ్లాండ్‌ పుంజుకోవటం కష్టమే. భారత కాలమానం ప్రకారం నేడు రాత్రి 11 గంటలకు భారత్‌, ఇంగ్లాండ్‌ మూడో టీ20 ఆరంభం కానుంది. సోనీ నెట్‌వర్క్‌లో మ్యాచ్‌ ప్రసారం.