- టీ20 ప్రపంచకప్‌లో అశ్విన్‌పై గవాస్కర్‌
ముంబయి : ట్రంప్‌కార్డ్‌ ఆఫ్‌ స్పిన్నర్‌ రవిచంద్రన్‌ అశ్విన్‌ టీ20 ప్రపంచకప్‌ భారత జట్టుకు ఎంపికయ్యాడు. జాతీయ జట్టులో వైట్‌బాల్‌ ఫార్మాట్‌లో అశ్విన్‌ పాత్ర ముగిసి పోయిందనుకున్న తరుణంలో.. ఏకంగా టీ20 ప్రపంచకప్‌ జట్టులోకే వచ్చాడు. వరల్డ్‌కప్‌ జట్టులో అశ్విన్‌ చోటుపై సునీల్‌ గవాస్కర్‌ తనదైన శైలిలో స్పందించాడు. ' టీ20 ప్రపంచకప్‌కు భారత జట్టులో అశ్విన్‌ నిలువటం సంతోషం. తుది జట్టులో అతడు చోటు దక్కించుకుంటాడా? లేదా అనే అంశంపై వేచి చూడాలి. ఇంగ్లాండ్‌ పర్యటనలోనూ అశ్విన్‌ను ఎంపిక చేసినా.. తుది జట్టులోకి తీసుకోలేదు. టీ20 ప్రపంచకప్‌కు ఎంపిక చేసి అశ్విన్‌కు ఊరట కల్పించారు. టీ20 ప్రపంచకప్‌ తుది జట్టులో అశ్విన్‌ నిలుస్తాడా? లేదా అనేది కాలమే తేల్చాలి' అని లిటిల్‌ మాస్టర్‌ సునీల్‌ గవాస్కర్‌ అన్నారు. యుఏఈ పిచ్‌లు స్పిన్‌కు సహకరిస్తాయి, దీంతో అశ్విన్‌ తుది జట్టులో చోటు సాధిస్తాడనే అంచనాలు పెరుగుతున్నాయి.