- ఇంగ్లాండ్‌ టెయిలెండర్లపై శార్దుల్‌
న్యూఢిల్లీ : పటౌడీ ట్రోఫీలో టెయిలెండర్లకు బౌన్సర్లు సంధించటం చర్చనీయాంశ మైంది. జేమ్స్‌ అండర్సన్‌కు జశ్‌ప్రీత్‌ బుమ్రా అదిరే బౌన్సర్‌ విసరటం సోషల్‌ మీడియాలో వైరస్‌గా మారింది. భారత పేసర్‌ శార్దుల్‌ ఠాకూర్‌ దీనిపై స్పందించాడు. 'మేము ఎందుకు బౌన్సర్లు సంధించకూడదు? ఎవరి సంతోషం కోసం మేము ఆడటం లేదు. విజయం కోసం ఆడుతున్నాం. మా టెయిలెండర్లు బౌన్సర్లు ఎదుర్కొంటున్నారు. ఆస్ట్రేలియాలో నటరాజన్‌కు మిచెల్‌ స్టార్క్‌, పాట్‌ కమిన్స్‌లు భయంకర బౌన్సర్లు విసిరారు. ఫస్ట్‌ క్లాస్‌ క్రికెట్‌లో సైతం నటరాజన్‌ పెద్దగా బ్యాటింగ్‌ చేయలేదనే విషయం తెలిసినా ఆసీస్‌ పేసర్లు బౌన్సర్లు వేశారు. ప్రత్యర్థి టెయిలెండర్లు బ్యాటింగ్‌కు వచ్చినప్పుడు మేము మాత్రం ఎందుకు బౌన్సర్లు వేయకూడదు?. బుమ్రాను అండర్సన్‌ ఏదో అన్నాడని మాతో చెప్పాడు. బహిరంగంగా చెప్పుకోలేని మాటలతో ఇంగ్లాండ్‌ బుమ్రాను దూషించింది. ఈ విషయం తెలిసి జట్టు మొత్తం ఇంగ్లాండ్‌ను వెంటాడింది' అని ఠాకూర్‌ తెలిపాడు.
