- చేరువలో భారత బాక్సర్లు
బల్లారి(కర్ణాటక): భారత బాక్సర్లు ప్రపంచ ఛాంపియన్‌షిప్‌కు అర్హత సాధించేందుకు అడుగు దూరంలో నిలిచారు. సంజీత్‌(92కిలోలు), శివ థాపా(63.5కిలోలు), మహ్మద్‌ హుసాముద్దీన్‌ (57కిలోలు) మరో విజయం సాధిస్తే చాలు. కర్ణాటకలోని బల్లారి వేదికగా జరుగుతున్న పురుషుల జాతీయ బాక్సింగ్‌ ఛాంపియన్‌షిప్‌ ఫైనల్లోకి దూసుకెళ్లారు. సోమవారం జరిగిన సెమీఫైనల్లో ఆసియా క్రీడల స్వర్ణ పతక విజేత సంజీత్‌(సర్వీసెస్‌ స్పోర్ట్స్‌ కంట్రోల్‌ బోర్డు(ఎస్‌ఎస్‌సిబి) 5-0 తేడాతో హర్ష్‌ కౌషిక్‌(ఢిల్లీ)పై ఘన విజయం సాధించాడు. ఫైనల్లో సంజీత్‌ హర్యానాకు చెందిన నవీన్‌ కుమార్‌తో తలపడనున్నాడు. మరో సెమీస్‌లో నవీన్‌ పంజాబ్‌కు చెందిన రాఘవ్‌ చౌదరిని చిత్తుచేశాడు. మరో సెమీస్‌లో హుసాముద్దీన్‌(సర్వీసెస్‌) 4-1 తేడాతో రోహిత్‌ మోర్‌(ఢిల్లీ)ని, శివమ్‌ థాపా 5-0 తేడాతో అభిషేక్‌ యాదవ్‌(యుపి)ని చిత్తుచేశారు. ఇక ఎస్‌ఎస్‌సిబికి చెందిన దీపక్‌(51కిలోలు), ఆకాశ్‌(54), ముహమ్మద్‌(60), ఆకాశ్‌(67), సుమిత్‌(75), సచిన్‌ కుమార్‌(80), లక్ష్య(86), నరేంద్ర(92కిలోలు పైబడి) ఫైనల్లోకి దూసుకెళ్లారు.