- అర్థ సెంచరీతో మెరిసిన ఓపెనర్‌
- రాణించిన రోహిత్‌ శర్మ
- ముంబయి ఇండియన్స్‌ 155/6
నవతెలంగాణ-అబుదాబి
డెత్‌ ఓవర్లలో ముంబయి ఇండియన్స్‌ కష్టాలు కొనసాగుతున్నాయి. కోల్‌కత నైట్‌రైడర్స్‌తో మ్యాచ్‌లో 80/1తో పటిష్టంగా కనిపించిన ముంబయి ఇండియన్స్‌ చివరి పది ఓవర్లలో 75 పరుగులే చేసింది. ఓపెనర్లు క్వింటన్‌ డికాక్‌ (55, 42 బంతుల్లో 4 ఫోర్లు, 3 సిక్స్‌లు), రోహిత్‌ శర్మ (33, 30 బంతుల్లో 4 ఫోర్లు) రాణించినా ఆ జట్టు 155 పరుగుల స్వల్ప స్కోరుకు పరిమితమైంది. సూర్యకుమార్‌ యాదవ్‌ (5), ఇషాన్‌ కిషన్‌ (14), కీరన్‌ పొలార్డ్‌ (21), కృనాల్‌ పాండ్య (12) విఫలమయ్యారు. కోల్‌కత పేసర్లు లాకీ ఫెర్గుసన్‌ (2/27), ప్రసిద్‌ కృష్ణ (2/43)లు రాణించారు.
రాణించిన రోహిత్‌, డికాక్‌ : టాస్‌ గెల్చుకున్న కోల్‌కత తొలుత ఫీల్డింగ్‌ ఎంచుకుంది. చెన్నైతో మ్యాచ్‌లో విశ్రాంతి తీసుకున్న రోహిత్‌ శర్మ.. కోల్‌కతపై డికాక్‌తో కలిసి ఇన్నింగ్స్‌ ఆరంభించాడు. ఓపెనర్లు తొలి వికెట్‌కు 78 పరుగుల భారీ స్కోరు అందించారు. రోహిత్‌ శర్మ (33, 30 బంతుల్లో 4 ఫోర్లు), క్వింటన్‌ డికాక్‌ (55, 42 బంతుల్లో 4 ఫోర్లు, 3 సిక్స్‌లు) భారీ స్కోరుకు గట్టి పునాది వేశారు. ఆరంభంలోనే స్పిన్నర్లను ప్రయోగించిన మోర్గాన్‌.. ముంబయిని వేగంగా పరుగులు చేయనివ్వలేదు. మూడు ఫోర్లు, మూడు సిక్సర్లతో డికాక్‌ 35 బంతుల్లో అర్థ సెంచరీ నమోదు చేశాడు. ఆ తర్వాత డికాక్‌కు పెద్దగా స్ట్రయిక్‌ అవకాశం లభించలేదు. రోహిత్‌ శర్మ అవుట్‌ కాగానే.. సూర్యకుమార్‌ యాదవ్‌ (5) సైతం వికెట్‌ కోల్పోయాడు. ఇషాన్‌ కిషన్‌ (14) పేలవ ఫామ్‌ కొనసాగించాడు. కీరన్‌ పొలార్డ్‌ (21, 15 బంతుల్లో 2 ఫోర్లు, 1 సిక్స్‌)పై ముంబయి ఆశలు పెట్టుకున్నా.. ఆఖరు ఓవర్‌ తొలి బంతిని మోర్గాన్‌ అతడిని రనౌట్‌ చేశాడు. కృనాల్‌ పాండ్య (12) నిరాశ పరిచాడు. దీంతో నిర్ణీత 20 ఓవర్లలో ముంబయి ఇండియన్స్‌ 155/6 పరుగులు చేసింది. ఓపెనర్ల మెరుపులతో 9 ఓవర్లలో 78/0తో భారీ స్కోరు దిశగా సాగిన ముంబయి ఇండియన్స్‌.. మిడిల్‌, లోయర్‌ ఆర్డర్‌ బ్యాట్స్‌మెన్‌ వైఫల్యంతో 155 పరుగుల స్వల్ప స్కోరుకు పరిమితమైంది. కోల్‌కత నైట్‌రైడర్స్‌ బౌలర్లలో ప్రసిద్‌ కృష్ణ (2/43), లాకీ ఫెర్గుసన్‌ (2/27) రాణించారు. సునీల్‌ నరైన్‌ (1/20) బ్యాట్స్‌మెన్‌ ఒత్తిడి పెంచటంలో సఫలమయ్యాడు.
రోహిత్‌ వెయ్యి కొట్టాడు! : ఐపీఎల్‌లో రోహిత్‌ శర్మ అరుదైన రికార్డు సాధించాడు. ఓ జట్టుపై వెయ్యి పరుగులు సాధించిన తొలి ఆటగాడిగా రికార్డు నెలకొల్పాడు. ఐపీఎల్‌లో (2008-2021) కోల్‌కత నైట్‌రైడర్స్‌పై 29 మ్యాచులు ఆడిన రోహిత్‌ శర్మ 48.33 సగటుతో 1015 పరుగులు కొట్టాడు. ఇందులో 109 పరుగుల అజేయ శతకం సహా ఆరు అర్థ సెంచరీలు ఉన్నాయి.
స్కోరు వివరాలు
ముంబయి ఇండియన్స్‌ : రోహిత్‌ శర్మ (సి) శుభ్‌మన్‌ గిల్‌ (బి) సునీల్‌ నరైన్‌ 33, క్వింటన్‌ డికాక్‌ (సి) సునీల్‌ నరైన్‌ (బి) ప్రసిద్‌ కృష్ణ 55, సూర్యకుమార్‌ యాదవ్‌ (సి) దినేశ్‌ కార్తీక్‌ (బి) ప్రసిద్‌ కృష్ణ 5, ఇషాన్‌ కిషన్‌ (సి) రసెల్‌ (బి) ఫెర్గుసన్‌ 14, కీరన్‌ పొలార్డ్‌ (రనౌట్‌) 21, కృనాల్‌ పాండ్య (సి) వెంకటేశ్‌ అయ్యర్‌ (బి) ఫెర్గుసన్‌ 12, సౌరభ్‌ తివారి నాటౌట్‌ 5, అడం మిల్నె నాటౌట్‌ 1, ఎక్స్‌ట్రాలు : 09, మొత్తం :(20 ఓవర్లలో 6 వికెట్లకు) 155.
వికెట్ల పతనం : 1-78, 2-89, 3-106, 4-119, 5-149, 6-149.
బౌలింగ్‌ : నితీశ్‌ రానా 1-0-5-0, వరుణ్‌ చక్రవర్తి 4-0-22-0, సునీల్‌ నరైన్‌ 4-0-20-1, లాకీ ఫెర్గుసన్‌ 4-0-27-2, ప్రసిద్‌ కృష్ణ 4-0-43-2, అండ్రీ రసెల్‌ 3-0-37-0.