- అక్టోబర్‌ 7 నుంచి జాతీయ స్థాయి టోర్నీ
నవతెలంగాణ, హైదరాబాద్‌ : జాతీయ జూనియర్‌ బాలుర సబ్‌ జూనియర్‌ హ్యాండ్‌బాల్‌ పోటీల పోస్టర్‌ను రాష్ట్ర క్రీడాశాఖ మంత్రి వి. శ్రీనివాస్‌ గౌడ్‌, క్రీడా శాఖ కార్యదర్శి శ్రీనివాస రాజులతో కలిసి జాతీయ హ్యాండ్‌బాల్‌ సమాఖ్య అధ్యక్షుడు అరిశనపల్లి జగన్‌మోహన్‌ రావు ఆవిష్కరించారు. అక్టోబర్‌ 7 నుంచి హైదరాబాద్‌ వేదికగా జాతీయ సబ్‌జూనియర్‌ హ్యాండ్‌బాల్‌ టోర్నమెంట్‌ జరుగనుంది. ' హైదరాబాద్‌లో జాతీయ స్థాయి టోర్నమెంట్‌ నిర్వహణ రాష్ట్రానికే గర్వకారణం. గతంలో చేసిన విజ్ఞప్తి మేరకు హైదరాబాద్‌కు జాతీయ స్థాయి చాంపియన్‌షిప్‌ను తీసుకురావటం అభినందనీయం. ఇతర క్రీడా సంఘాలు సైతం హైదరాబాద్‌ వేదికగా జాతీయ స్థాయి టోర్నీల నిర్వహణకు కృషి చేయాలని' అని మంత్రి శ్రీనివాస్‌ గౌడ్‌ అన్నారు. ' అక్టోబర్‌ 7-11 వరకు సరూర్‌నగర్‌ స్టేడియం, అక్షర ఇంటర్నేషనల్‌ స్కూల్‌లో ఈ పోటీలు జరుగుతాయి. ఈ పోటీలకు 29 రాష్ట్రాల నుంచి జట్లు రానున్నాయి. ఆరంభ వేడుకలకు మంత్రి శ్రీనివాస్‌ గౌడ్‌, ముగింపు వేడుకలకు ఎమ్మెల్సీ కె. కవిత ముఖ్య అతిథులుగా రానున్నారని' జగన్‌మోహన్‌ రావు తెలిపారు. ఈ కార్యక్రమంలో రాష్ట్ర హ్యాండ్‌బాల్‌ సంఘం కార్యదర్శి పవన్‌, కోచ్‌లు తదితరులు పాల్గొన్నారు.