- ఛేదనలో జైస్వాల్‌, దూబె ధనాధన్‌
- చెన్నైపై రాజస్థాన్‌ మెరుపు విజయం
నవతెలంగాణ-అబుదాబి
రాజస్థాన్‌ లక్ష్యం 190. ఈ సీజన్‌లో యుఏఈలో ఇదే అత్యధిక స్కోరు. ఈ మ్యాచ్‌లో ఓడితే ప్లే ఆఫ్స్‌ ఆశలు ఆవిరే!. ఈ పరిస్థితుల్లో రాయల్స్‌ దుమ్మురేపింది. భారీ ఛేదనలో యువ ఓపెనర్‌ యశస్వి జైస్వాల్‌ (50, 21 బంతుల్లో 6 ఫోర్లు, 3 సిక్స్‌లు), శివం దూబె (64 నాటౌట్‌, 42 బంతుల్లో 4 ఫోర్లు, 4 సిక్స్‌లు) విధ్వంసక ఇన్నింగ్స్‌లతో చెలరేగారు. కెప్టెన్‌ సంజు శాంసన్‌ (28), ఎవిన్‌ లూయిస్‌ (27) సైతం రాణించటంతో రాయల్స్‌ ఛేదనలో దూసుకెళ్లింది. ఆరంభ ఓవర్‌ నుంచీ దూకుడుగా ఆడిన రాయల్స్‌ చెన్నైకి షాకిచ్చింది. జైస్వాల్‌ ఆరు ఫోర్లు, మూడు సిక్సర్లతో 19 బంతుల్లోనే అర్థ సెంచరీ పూర్తి చేయగా.. రెండు ఫోర్లు, నాలుగు సిక్సర్లతో దూబె 31 బంతుల్లో అర్థ శతకం సాధించాడు. ఈ ఇద్దరి విధ్వంసంతో 17.3 ఓవర్లలోనే రాజస్థాన్‌ 190 పరుగుల లక్ష్యాన్ని ఛేదించి ఏడు వికెట్ల తేడాతో ఘన విజయం సాధించింది. తొలుత, రుతురాజ్‌ గైక్వాడ్‌ (101 నాటౌట్‌, 60 బంతుల్లో 9 ఫోర్లు, 5 సిక్స్‌లు) శతక గర్జన చేశాడు. రాయల్స్‌ బౌలర్లపై విరుచుకు పడిన గైక్వాడ్‌ ఇన్నింగ్స్‌ చివరి బంతిని గ్రౌండ్‌ బయటకు సిక్సర్‌గా పంచి ఐపీఎల్‌లో తొలి శతకంతో తొలుత చెన్నై సూపర్‌కింగ్స్‌ 189/4 పరుగుల భారీ స్కోరు నమోదు చేసింది.
రుతురాజ్‌ ఊచకోత! : పవర్‌ప్లేలో చెన్నై 44 పరుగులే చేసింది. డుప్లెసిస్‌ (25), మోయిన్‌ అలీ (21) బౌలర్లపై ఆధిపత్యానికి ప్రయత్నించారు. ఇద్దరూ తెవాటియ ఓవర్లో క్రీజు వదిలి డగౌట్‌కు చేరారు. సురేశ్‌ రైనా (3), రాయుడు (2) విఫలమయ్యారు. మరో ఎండ్‌లో రుతురాజ్‌ గైక్వాడ్‌ (101 నాటౌట్‌) స్ఫూర్తిదాయక ఇన్నింగ్స్‌తో మెప్పించాడు. ఆరు ఫోర్లతో 43 బంతుల్లో అర్థ సెంచరీ సాధించాడు. ఓ దశలో సూపర్‌కింగ్స్‌ 12 ఓవర్లలో 83/2తో స్వల్ప స్కోరుకే పరిమితం అయ్యేలా కనిపించింది.
ఆఖరు ఓవర్లలో మొదలైన గైక్వాడ్‌ విధ్వంసం ఆఖరు బంతి వరకూ కొనసాగింది. రుతురాజ్‌ ఆడిన చివరి 30 బంతుల్లో ఏకంగా 71 పరుగులు పిండుకున్నాడు. సంప్రదాయ షాట్లతోనే దండెత్తిన గైక్వాడ్‌ కండ్లుచెదిరే ఇన్నింగ్స్‌ ఆడాడు. జడేజా సైతం నాలుగు ఫోర్లు, ఓ సిక్సర్‌తో కదం తొక్కగా చెన్నై ఇన్నింగ్స్‌ రాకెట్‌ స్పీడ్‌తో ముందుకెళ్లింది. గైక్వాడ్‌, జడేజా మెరుపు ఇన్నింగ్స్‌లతో చెన్నై చివరి ఎనిమిది ఓవర్లలో 106 పరుగులు పిండుకుంది.
స్కోరు వివరాలు :
చెన్నై : 189/4 (గైక్వాడ్‌ 101, జడేజా 32, తెవాటియ 3/39)
రాజస్థాన్‌ : 190/3 (దూబె 64, జైస్వాల్‌ 50, ఠాకూర్‌ 2/30)
