- రాయల్‌ చాలెంజర్స్‌ బెంగళూర్‌ 138/7
- రాణించిన విరాట్‌ కోహ్లి, పడిక్కల్‌
నవతెలంగాణ-షార్జా
స్పిన్నర్‌ సునీల్‌ నరైన్‌ (4/21) మాయజాలానికి రాయల్‌ చాలెంజర్స్‌ బెంగళూర్‌ కుదేలైంది. కెప్టెన్‌ విరాట్‌ కోహ్లి (39, 33 బంతుల్లో 5 ఫోర్లు), దేవదత్‌ పడిక్కల్‌ (21, 18 బంతుల్లో 2 ఫోర్లు) రాణించటంతో 88/2తో భారీ స్కోరు దిశగా దూసుకెళ్లిన బెంగళూర్‌కు సునీల్‌ నరైన్‌ బ్రేక్‌ వేశాడు. రాయల్‌ చాలెంజర్స్‌ బెంగళూర్‌ ప్రధాన బ్యాట్స్‌మెన్‌ అందరినీ డగౌట్‌కు చేర్చిన నరైన్‌ ఆ జట్టును స్వల్ప స్కోరుకు పరిమితం చేశాడు. ఏబీ డివిలియర్స్‌ (11), గ్లెన్‌ మాక్స్‌వెల్‌ (15), శ్రీకర్‌ భరత్‌ (9), విరాట్‌ కోహ్లి వికెట్లతో బెంగళూర్‌ను కోలుకోలేని దెబ్బ తీశాడు నరైన్‌. పేసర్‌ లాకీ ఫెర్గుసన్‌ (2/30) సైతం రాణించటంతో తొలుత బ్యాటింగ్‌ చేసిన రాయల్‌ చాలెంజర్స్‌ బెంగళూర్‌ 138/7 పరుగులు చేసింది. ఛేదనలో కోల్‌కత నైట్‌రైడర్స్‌ 11 ఓవర్లలో 79/3తో పోరాడుతోంది. బెంగళూర్‌, కోల్‌కత ఎలిమినేటర్‌లో విజేత ఢిల్లీ క్యాపిటల్స్‌తో రెండో క్వాలిఫయర్‌లో ఆడనుండగా.. ఓడిన జట్టు ప్లే ఆఫ్స్‌ నుంచి నిష్క్రమించనుంది.
ఓపెనర్లు మెరిసినా.. : స్వల్ప స్కోర్లు నమోదవుతున్న షార్జాలో టాస్‌ నెగ్గిన విరాట్‌ కోహ్లి తొలుత బ్యాటింగ్‌ ఎంచుకున్నాడు. టాస్‌ నెగ్గితే బౌలింగ్‌ ఎంచుకునేవాడినని కోల్‌కత కెప్టెన్‌ మోర్గాన్‌ వ్యాఖ్యానించటంతో పిచ్‌పై చర్చ అప్పుడే మొదలైంది!. దేవదత్‌ పడక్కిల్‌ (21, 18 బంతుల్లో 2 ఫోర్లు), విరాట్‌ కోహ్లి (39, 33 బంతుల్లో 5 ఫోర్లు) పవర్‌ప్లేలో బెంగళూర్‌కు అదిరే ఆరంభం అందించారు. కోహ్లి, పడిక్కల్‌ బౌండరీలతో కదం తొక్కారు. పవర్‌ప్లేలో పడిక్కల్‌ను కోల్పోయినా, బెంగళూర్‌ 53/1తో పటిష్ట స్థితిలో నిలిచింది.
మాయజాలం : ఫీల్డింగ్‌ నిబంధనలతో పాటు బెంగళూర్‌ ఆటలోనూ మార్పు వచ్చింది. పవర్‌ప్లేలో గొప్పగా రాణించిన బెంగళూర్‌ ఆ తర్వాత పరుగుల కోసం చెమటోడ్చింది. ఫామ్‌లో ఉన్న తెలుగు తేజం శ్రీకర్‌ భరత్‌ (9, 16 బంతుల్లో) అంచనాలు అందుకోలేదు. మిస్టరీ స్పిన్నర్‌ సునీల్‌ నరైన్‌ బెంగళూర్‌ ఇన్నింగ్స్‌ను కుదేల్‌ చేశాడు. తొలుత భరత్‌ను వెనక్కి పంపిన నరైన్‌.. కీలక బ్యాటర్లు ఏబీ డివిలియర్స్‌ (11), గ్లెన్‌ మాక్స్‌వెల్‌ (15)తో పాటు విరాట్‌ కోహ్లి (39) ఇన్నింగ్స్‌నూ ముగించాడు. నలుగురు కీలక బ్యాట్స్‌మెన్‌ను అవుట్‌ చేసిన సునీల్‌ నరైన్‌ మ్యాచ్‌ను మలుపు తిప్పాడు. పేసర్‌ లాకీ ఫెర్గుసన్‌ (2/30) సైతం నరైన్‌కు తోడవటంతో బెంగళూర్‌ విలవిల్లాడింది. చివర్లో విలువైన పరుగులు జోడించిన షాబాజ్‌ అహ్మద్‌ (13) సహా ఓపెనర్‌ పడిక్కల్‌ వికెట్లను ఫెర్గుసన్‌ తన ఖాతాలో వేసుకున్నాడు. 20 ఓవర్లలో ఏడు వికెట్లు కోల్పోయిన బెంగళూర్‌ 138 పరుగులు చేసింది. షార్జా పిచ్‌పై కీలక పాత్ర పోషిస్తాడనుకున్న స్పిన్నర్‌ వరుణ్‌ చక్రవర్తి (0/20)కి వికెట్లు దక్కలేదు.
స్కోరు వివరాలు :
బెంగళూర్‌ ఇన్నింగ్స్‌ : పడిక్కల్‌ (బి) ఫెర్గుసన్‌ 21, కోహ్లి (బి) నరైన్‌ 39, భరత్‌ (సి) అయ్యర్‌ (బి) నరైన్‌ 9, మాక్స్‌వెల్‌ (సి) ఫెర్గుసన్‌ (బి) నరైన్‌ 15, డివిలియర్స్‌ (బి) నరైన్‌ 11, షాబాజ్‌ (సి) మావి (బి) ఫెర్గుసన్‌ 13, క్రిస్టియన్‌ రనౌట్‌ 9, హర్షల్‌ నాటౌట్‌ 8, గార్టన్‌ నాటౌట్‌ 0, ఎక్స్‌ట్రాలు :13, మొత్తం : (20 ఓవర్లలో 7 వికెట్లకు) 138.
వికెట్ల పతనం : 1-49, 2-69, 3-88, 4-102, 5-112, 6-126, 7-134.
బౌలింగ్‌ : షకిబ్‌ 4-0-24-0, శివం 4-0-36-0, వరుణ్‌ 4-0-20-0, ఫెర్గుసన్‌ 4-0-30-2, నరైన్‌ 4-0-21-4.