- దరఖాస్తులకు బీసీసీఐ ఆహ్వానం
న్యూఢిల్లీ: భారత క్రికెట్‌ పురుషుల జట్టుకు హెడ్‌ కోచ్‌ సహా పలు పోస్టుల భర్తీకి బీసీసీఐ సన్నాహాలు చేస్తున్నది. టీ20 ప్రపంచకప్‌ తర్వాత ప్రస్తుతం హెడ్‌ కోచ్‌గా ఉన్న రవిశాస్త్రితోపాటు ఇతర కోచ్‌లు, సిబ్బంది కూడా బాధ్యతల నుంచి దిగిపోనున్నారు. దీంతో హెడ్‌ కోచ్‌, బ్యాటింగ్‌, బౌలింగ్‌, ఫీల్డింగ్‌ కోచ్‌లుసహా ఇతర సిబ్బంది భర్తీకి బీసీసీఐ దరఖాస్తులను ఆహ్వానిస్తోంది. హెడ్‌ కోచ్‌ దరఖాస్తుకు చివరి తేది అక్టోబర్‌ 26గా, ఇతర పోస్టుల దరఖాస్తులకు చివరి తేదీ నవంబర్‌ 3గా పేర్కొంది. రవిశాస్త్రి పదవికాలం ముగుస్తుండటంతో అతడి స్థానంలో రాహుల్‌ ద్రావిడ్‌ను నియమించాలని బీసీసీఐ భావిస్తోంది. ఈ క్రమంలో రాహుల్‌ ద్రావిడ్‌తో బీసీసీఐ బృందం చర్చలు జరిపింది. హెడ్‌ కోచ్‌ పదవికి దరఖాస్తు చేయడానికి, ఆ బాధ్యతలు స్వీకరించడానికి ఒప్పించినట్టు తెలిసింది.అదే నిజమైతే.. ఆయన నియామకం ఖరారైనట్లే. ప్రస్తుతం బౌలింగ్‌ కోచ్‌గా భరత్‌ అరుణ్‌, బ్యాటింగ్‌ కోచ్‌గా సంజరు భంగర్‌, ఫీల్డింగ్‌ కోచ్‌గా ఆర్‌. శ్రీధర్‌ ఉన్నారు. మరి వీరి స్థానాల్లోకి ఎవరు వస్తారో వేచి చూడాలి.