- కివీస్‌ స్టార్‌ జేమ్స్‌ నీషమ్‌
అబుదాబి : ఐసీసీ 2021 టీ20 ప్రపంచకప్‌ సెమీఫైనల్‌. భీకర ఇంగ్లాండ్‌తో న్యూజిలాండ్‌ మహా పోరు. ఐసీసీ నాకౌట్‌ మ్యాచుల్లో ఇంగ్లాండ్‌ చేతుల్లో గత చేదు అనుభవాల దృష్య్టా న్యూజిలాండ్‌ గెలుపుపై సర్వత్రా ఉత్కంఠ. మార్క్‌వుడ్‌, లివింగ్‌స్టోన్‌ విజృంభణతో ఛేదనలో తొలి పది ఓవర్లు మోర్గాన్‌సేన ఆటే సాగింది. 2019 వన్డే వరల్డ్‌కప్‌ ఫైనల్‌ హీరో జేమ్స్‌ నీషమ్‌ అసమాన ఇన్నింగ్స్‌తో న్యూజిలాండ్‌ మ్యాచ్‌పై పట్టు సాధించింది. నీషమ్‌ నిష్క్రమించినా ఓపెనర్‌ డార్లీ మిచెల్‌ అజేయ అర్థ శతక విన్యాసంతో న్యూజిలాండ్‌ అపూర్వ విజయం నమోదు చేసింది. తొలిసారి టీ20 ప్రపంచకప్‌ ఫైనల్లోకి చేరుకుంది. డార్లీ మిచెల్‌ విన్నింగ్‌ షాట్‌ కొట్టగానే న్యూజిలాండ్‌ డగౌట్‌లో ఆటగాళ్లు, సహాయక సిబ్బంది లేచి నిల్చొని కరతాళ ధ్వనులతో సంతోషం వ్యక్తపరుస్తున్నారు. ఈ ఫోటోలో కెప్టెన్‌ కేన్‌ విలియమ్సన్‌తో పాటు జేమ్స్‌ నీషమ్‌ ఎటువంటి హావభావాలు లేకుండా కూర్చొని ఉన్నాడు. ఈ ఫోటోను ఓ క్రికెట్‌ వెబ్‌సైట్‌ ట్విట్టర్‌లో ఉంచింది, ఆ ఫోటోకు నీషమ్‌ ఇలా బదులిచ్చాడు.. ' అప్పుడే పని ముగిసిపోయిందా? నేను అలా అనుకోవటం లేదు' అని ట్వీట్‌ చేశాడు. దీంతో సెమీస్‌ విజయంతో కివీస్‌ సంతృప్తి పడబోదని.. ఆదివారం నాడు మెగా ఫైనల్లో విజయంతోనే అసలు సంబురాలు మొదలవుతాయని నీషమ్‌ పరోక్షంగా సంకేతాలు ఇచ్చాడు!.