- విలియమ్సన్‌ మెరుపు ఇన్నింగ్స్‌
- జోశ్‌ హజిల్‌వుడ్‌ విజృంభణ
- న్యూజిలాండ్‌ 172/4
నవతెలంగాణ-దుబాయ్
కేన్‌ విలియమ్సన్‌ (85, 48 బంతుల్లో 10 ఫోర్లు, 3 సిక్స్‌లు) విశ్వరూపం చూపించాడు. నాయకుడి విధ్వంసక ఇన్నింగ్స్‌తో ఐసీసీ టీ20 ప్రపంచకప్‌లో న్యూజిలాండ్‌ రికార్డు స్కోరు సాధించింది. విలియమ్సన్‌ అర్థ శతకానికి తోడు మార్టిన్‌ గప్టిల్‌ (28, 35 బంతుల్లో 3 ఫోర్లు), గ్లెన్‌ ఫిలిప్స్‌ (18, 17 బంతుల్లో 1 ఫోర్‌, 1 సిక్స్‌) రాణించటంతో న్యూజిలాండ్‌ 172/4 పరుగులు చేసింది. ఆసీస్‌ పేసర్‌ జోశ్‌ హజిల్‌వుడ్‌ (3/16) నిప్పులు చెరిగే బంతులతో న్యూజిలాండ్‌ కట్టడి చేసినా.. మిచెల్‌ స్టార్క్‌ను (0/60)ను చితకబాదిన విలియమ్సన్‌ కివీస్‌కు భారీ స్కోరు అందించాడు. ఛేదనలో ఆస్ట్రేలియా అదరగొడుతోంది. డెవిడ్‌ వార్నర్‌ (53, 38 బంతుల్లో 4 ఫోర్లు, 3 సిక్స్‌లు) అర్థ సెంచరీతో చెలరేగాడు. మిచెల్‌ మార్ష్‌ (46) మెరుపులతో 12.2 ఓవర్లలో ఆస్ట్రేలియా 107/2తో లక్ష్యం దిశగా దూసుకెళ్తోంది. ఆస్ట్రేలియాకు 46 బంతుల్లో మరో 66 పరుగులు అవసరం.
ఖతర్నాక్‌ కేన్‌ : కీలక టాస్‌ ఆసీస్‌ నెగ్గింది. తొలుత ఆసీస్‌ పేసర్లు నిప్పులు చెరిగారు. పవర్‌ప్లేలో న్యూజిలాండ్‌ తడబడింది. పది ఓవర్లు ముగిసే సరికి ఆ జట్టు స్కోరు 57/1. ఈ పరిస్థితుల్లో న్యూజిలాండ్‌ మంచి స్కోరు సాధిస్తుందనే అంచనాలు ఎవరిలోనూ లేవు. సంప్రదాయ విధ్వంసకారుడు కేన్‌ విలియమ్సన్‌ (85, 48 బంతుల్లో 10 ఫోర్లు, 3 సిక్స్‌లు) మెరుపు ఇన్నింగ్స్‌తో మ్యాచ్‌ సమీకరణాలు పూర్తిగా మార్చివేశాడు. ఇన్నింగ్స్‌ 11వ ఓవర్లో మిచెల్‌ స్టార్క్‌ ఓవర్లో హజిల్‌వుడ్‌ క్యాచ్‌ వదిలేయటంతో బతికిపోయిన విలియమ్సన్‌ (అప్పటికి కేన్‌ స్కోరు 21) అక్కడ్నుంచి రెచ్చిపోయాడు. స్టార్క్‌పై హ్యాట్రిక్‌ ఫోర్లతో దండెత్తిన విలియమ్సన్‌.. ఆ తర్వాత మాక్స్‌వెల్‌పై వరుస సిక్సర్లతో విరుచుకు పడ్డాడు. స్టార్క్‌ వేసిన ఇన్నింగ్స్‌ 16వ ఓవర్లో వరుసగా 4, 4, 6, 0, 4, 4 బాదిన విలియమ్సన్‌ ఆ ఓవర్లో ఏకంగా 22 పరుగులు పిండుకున్నాడు. స్టార్క్‌పై 12 బంతుల్లోనే 39 పరుగులు పిండుకున్న విలియమ్సన్‌ 32 బంతుల్లోనే అర్థ సెంచరీ సాధించాడు. కేన్‌ దెబ్బకు స్టార్క్‌ నాలుగు ఓవరలో 60 పరుగులు ఇచ్చుకున్నాడు. ఆరంభంలో మార్టిన్‌ గప్టిల్‌ (28), మిడిల్‌లో గ్లెన్‌ ఫిలిప్స్‌ (18)లు కేన్‌కు చక్కటి సహకారం అందించారు. జేమ్స్‌ నీషమ్‌ (13 నాటౌట్‌), సీఫర్ట్‌ (8 నాటౌట్‌) మెరుగైన ముగింపు ఇచ్చారు. కేన్‌ విలియమ్సన్‌ దూకుడుతో చివరి పది ఓవర్లలో న్యూజిలాండ్‌ 115 పరుగులు సాధించింది. ఆసీస్‌ పేసర్లలో జోశ్‌ హజిల్‌వుడ్‌ (3/16) అద్భుతంగా రాణించాడు. స్పిన్నర్‌ ఆడం జంపా (1/26) సైతం ఆకట్టుకునే ప్రదర్శన చేశాడు. 172/4 పరుగులు చేసిన న్యూజిలాండ్‌ ఐసీసీ టీ20 ప్రపంచకప్‌ ఫైనల్‌ చరిత్రలోనే అత్యధిక స్కోరు సాధించింది.
స్కోరు వివరాలు
న్యూజిలాండ్‌ ఇన్నింగ్స్‌ : మార్టిన్‌ గప్టిల్‌ (సి) స్టోయినిస్‌ (బి) జంపా 28, డార్లీ మిచెల్‌ (సి) వేడ్‌ (బి) హజిల్‌వుడ్‌ 11, కేన్‌ విలియమ్సన్‌ (సి) స్మిత్‌ (బి) హజిల్‌వుడ్‌ 85, గ్లెన్‌ ఫిలిప్స్‌ (సి) మాక్స్‌వెల్‌ (బి) హజిల్‌వుడ్‌ 18, జేమ్స్‌ నీషమ్‌ నాటౌట్‌ 13, టిమ్‌ సీఫర్ట్‌ నాటౌట్‌ 8, ఎక్స్‌ట్రాలు : 9, మొత్తం : (20 ఓవర్లలో 4 వికెట్లకు) 172.
వికెట్ల పతనం : 1-28, 2-76, 3-144, 4-148.
బౌలింగ్‌ : మిచెల్‌ స్టార్క్‌ 4-0-60-0, జోశ్‌ హజిల్‌వుడ్‌ 4-0-16-3, గ్లెన్‌ మాక్స్‌వెల్‌ 3-0-28-0, పాట్‌ కమిన్స్‌ 4-0-27-0, ఆడం జంపా 4-0-26-1, మిచెల్‌ మార్ష్‌ 1-0-11-0.