- దుమ్ములేపిన భారత ప్లేయర్లు
- స్మృతి మంధన సూపర్‌ సెంచరీ.. హర్మన్‌ప్రీత్‌ మెరుపు
సిడ్నీ: ప్రస్తుతం జరుగుతున్న బిగ్‌బాష్‌ లీగ్‌లో ఇద్దరు భారత ప్లేయర్లు దుమ్మురేపారు. సిడ్నీ థండర్స్‌, మెల్‌బోర్న్‌ రెనీగేడ్స్‌ మధ్య బుధవారం జరిగిన మ్యాచ్‌లో టీమిండియా వుమెన్‌ ప్లేయర్‌ స్మృతి మంధాన సూపర్‌ సెంచరీతో అదరగొట్టింది. మరో ప్లేయర్‌ హర్మన్‌ప్రీత్‌ కౌర్‌ మొదట బ్యాటింగ్‌లో మెరుపులు మెరిపించి.. ఆ తర్వాత బౌలింగ్‌లో తన సత్తా చాటింది. అయితే స్మృతి మంధాన సూపర్‌ సెంచరీ సాధించినప్పటికి జట్టును ఓటమి నుంచి గట్టెక్కించలేకపోయింది. సిడ్నీ థండర్స్‌కు చివరి ఓవర్‌లో 12 పరుగులు అవసరం కాగా.. మెల్‌బోర్న్‌ రెనీగేడ్స్‌ బౌలర్‌ హర్మన్‌ప్రీత్‌ మ్యాజిక్‌ బౌలింగ్‌ ప్రదర్శించడంతో నాలుగు పరుగులతో ఓటమి పాలైంది. మొదట బ్యాటింగ్‌ చేసిన మెల్‌బోర్న్‌ రెనిగేడ్స్‌ నిర్ణీత 20 ఓవర్లలో 4 వికెట్ల నష్టానికి 175 పరుగులు చేసింది. హర్మన్‌ప్రీత్‌ కౌర్‌ 55 బంతుల్లో 88 పరుగులతో రాణించింది. అలాగే, ఎవెలిన్‌ జోన్స్‌ 42, జెస్‌ డఫిన్‌ 33 పరుగులతో రాణించారు. అనంతరం బ్యాటింగ్‌ దిగిన సిడ్నీ థండర్స్‌ వుమెన్‌ నిర్ణీత 20 ఓవర్లలో 2 వికెట్లు కోల్పోయి 171 పరుగులు చేసింది. స్మృతి మంధాన 64 బంతుల్లో 14 ఫోర్లు, 3 సిక్సర్లతో 114 పరుగులతో అజేయంగా నిలిచింది. కానీ ఆఖరి ఓవర్లో ఒత్తిడి తట్టుకోలేక జట్టును గెలిపించలేకపోయింది. ప్రస్తుతం స్మృతి మంధాన, హర్మన్‌ప్రీత్‌ కౌర్‌ల ఇన్నిగ్స్‌ వీడియోలో సోషల్‌ మీడియాలో వైరల్‌గా మారాయి.