- వీడ్కోలుపై ఎం.ఎస్‌ ధోని
చెన్నై (తమిళనాడు) : చెన్నై సూపర్‌కింగ్స్‌, తలా అభిమానులకు ఎం.ఎస్‌ ధోని తీపి కబురు అందించాడు. 2019 వన్డే వరల్డ్‌కప్‌ సెమీఫైనల్స్‌తోనే అంతర్జాతీయ క్రికెట్‌కు వీడ్కోలు పలికిన భారత క్రికెట్‌ దిగ్గజం ఐపీఎల్‌లో కొనసాగుతున్నాడు. 2021 ఐపీఎల్‌ టైటిల్‌ను గెల్చుకున్న సూపర్‌కింగ్స్‌కు ఏర్పాటు చేసిన సన్మాన కార్యక్రమంలో ధోనీ ఆసక్తికర వ్యాఖ్యలు చేశాడు. ' నా చివరి టీ20 మ్యాచ్‌ను చెన్నైలోనే ఆడతానని ఆశిస్తున్నాను. అది వచ్చే ఏడాదా? మరో ఐదేండ్ల తర్వాతనా? అనేది నాకు తెలియదు' అని ధోని అన్నాడు. ఐపీఎల్‌ వీడ్కోలుపై ఎటువంటి స్పష్టత ఇవ్వని మహి.. వచ్చే ఏడాది ఐపీఎల్‌ ఏప్రిల్‌లో ఆరంభం, దానిపై ఆలోచనకు మరింత సమయం ఉందని అన్నాడు. పది జట్లతో కూడిన ఐపీఎల్‌కు ఈ డిసెంబర్‌లో ఆటగాళ్ల వేలం నిర్వహించనున్నారు.