- టెస్టు సిరీస్‌లో 1-0 ఆధిక్యం
గాలె (శ్రీలంక) : స్పిన్‌ మ్యాజిక్‌తో కరీబియన్లను లంకేయులు చిత్తుగా ఓడించారు. యువ స్పిన్నర్లు లసిత్‌ (5/46), రమేశ్‌ మెండిస్‌ (4/64) వికెట్ల జాతర చేయటంతో 348 పరుగుల రికార్డు ఛేదనలో వెస్టిండీస్‌ 160 పరుగులకే కుప్పకూలింది. 187 పరుగుల భారీ తేడాతో తొలి టెస్టులో శ్రీలంక విజయం సాధించింది. తొలి ఇన్నింగ్స్‌లో సెంచరీ, రెండో ఇన్నింగ్స్‌లో అర్థ సెంచరీ సాధించిన శ్రీలంక బ్యాటర్‌ దిమిత్‌ కరుణరత్నె (147, 83) 'మ్యాన్‌ ఆఫ్‌ ది మ్యాచ్‌'గా నిలిచాడు. శ్రీలంక వరుసగా 386, 191/4 డిక్లేర్డ్‌ పరుగులు చేయగా.. తొలి ఇన్నింగ్స్‌లో వెస్టిండీస్‌ 230 పరుగులే చేసింది. బొనర్‌ (68, 220 బంతుల్లో 7 ఫోర్లు), సిల్వ (54, 129 బంతుల్లో 5 ఫోర్లు) అర్థ సెంచరీలతో పోరాడినా బ్రాత్‌వేట్‌ (0), బ్లాక్‌వుడ్‌ (9), హోప్‌ (3), ఛేజ్‌ (1), హోల్డర్‌ (0) చేతులెత్తేశారు. రెండో టెస్టు సోమవారం నుంచి గాలెలోనే జరుగనుంది.