- వైస్‌ కెప్టెన్‌గా స్టీవ్‌ స్మిత్‌ ఎంపిక
మెల్‌బోర్న్‌: ఆస్ట్రేలియా టెస్టు కెప్టెన్‌గా తొలిసారి ఓ పేస్‌ బౌలర్‌గా ఎంపికయ్యాడు. ఓ మహిళతో అసభ్యకర మెసేజ్‌ల వ్యవహారంలో టిమ్‌ పైనె టెస్టు కెప్టెన్సీకి రాజీనామా చేసిన సంగతి తెలిసిందే. రెండేండ్లుగా వైస్‌ కెప్టెన్‌గా కొనసాగుతున్న పాట్‌ కమిన్స్‌ను 47వ ఆస్ట్రేలియా టెస్టు కెప్టెన్‌గా క్రికెట్‌ ఆస్ట్రేలియా శుక్రవారం నియమించింది. 'యాషెస్‌ వేసవికి ముందు ఈ బాధ్యతను గౌరవంగా భావిస్తున్నాను. టిమ్‌ పైనె తరహా నాయకత్వాన్ని అందిస్తానని అనుకుంటున్నాను. ఇది ఊహించని గౌరవం, కెప్టెన్సీ బాధ్యతను గొప్పగా భావిస్తున్నాను. స్టీవ్‌ స్మిత్‌, ఇతర సీనియర్లతో కలిసి ఆసీస్‌ను ముందుకు నడిపిస్తాను' అని పాట్‌ కమిన్స్‌ ఓ ప్రకటనలో తెలిపాడు. 2018 కేప్‌టౌన్‌ టెస్టు బాల్‌టాంపరింగ్‌ వివాదం అనంతరం నాయకత్వ బాధ్యతలకు దూరమైన స్టీవ్‌ స్మిత్‌ను వైస్‌ కెప్టెన్‌గా ఎంచుకున్నారు. పాట్‌ కమిన్స్‌ కోరటంతోనే స్మిత్‌ను డిప్యూటీగా తీసుకున్నట్టు తెలుస్తోంది. ఇంగ్లాండ్‌తో యాషెస్‌ సిరీస్‌తో పాట్‌ కమిన్స్‌ కెప్టెన్‌గా తొలి పరీక్ష ఎదుర్కొనున్నాడు.
