- ఎఫ్‌ఐహెచ్‌ ప్రపంచకప్‌ జూనియర్‌ హాకీ
భువనేశ్వర్‌: ఎఫ్‌ఐహెచ్‌ ప్రపంచకప్‌ జూనియర్‌ హాకీ క్వార్టర్‌ఫైనల్‌ పోటీలు మంగళవారం నుంచి ప్రారంభం కానున్నాయి. ఆదివారంతో ముగిసిన లీగ్‌ పోటీల అనంతరం 8జట్లు నిష్క్రమించగా.. మరో 8జట్లు క్వార్టర్‌ఫైనల్లోకి దూసుకెళ్లాయి. మంగళవారం జరిగే క్వార్టర్‌ఫైనల్లో భారత కుర్రాళ్లు సమిష్టిగా రాణించాల్సిన అవసరం ఎంతైనా ఉంది. గ్రూప్‌-డినుంచి క్వార్టర్‌ బెర్త్‌ కోసం పాకిస్తాన్‌-అర్జెంటీనా జట్ల మధ్య జరిగిన ఉత్కంఠభరిత పోటీలో అర్జెంటీనా 4-3 గోల్స్‌ తేడాతో పాక్‌ను చిత్తుచేసింది. ఆఖరి లీగ్‌ పోటీలో జర్మనీ జట్టు 11-0తో ఈజిప్ట్‌ను ఓడించింది. దీంతో గ్రూప్‌-ఏ నుంచి బెల్జియం, మలేషియా, గ్రూప్‌-బి నుంచి ఫ్రాన్స్‌, ఇండియా, గ్రూప్‌-సి నుంచి నెదర్లాండ్స్‌, స్పెయిన్‌, గ్రూప్‌-డి నుంచి జర్మనీ, అర్జెంటీనా జట్లు క్వార్టర్‌ఫైనల్స్‌కు అర్హత సాధించాయి. 30న జరిగే స్థానాల ఎంపిక పోటీలకు దక్షిణాఫ్రికా-కెనడా, పాకిస్తాన్‌-అమెరికా, పోలెండ్‌-చిలీ, దక్షిణ కొరియా-ఈజిప్ట్‌ జట్లు తలపడనున్నాయి.