- నేడు కీలక సెమీఫైనల్‌ సమరం
- బ్యాడ్మింటన్‌ ప్రపంచ టూర్‌ ఫైనల్స్‌
బాలి (ఇండోనేషియా) : ప్రపంచ టూర్‌ ఫైనల్స్‌ గ్రూప్‌ దశను భారత అగ్ర బ్యాడ్మింటన్‌ క్రీడాకారిణి పి.వి సింధు ఓటమితో ముగించింది. గ్రూప్‌ దశలో వరుసగా రెండు విజయాలతో సెమీఫైనల్‌ బెర్త్‌ ఖాయం చేసుకున్న సింధు, మూడో మ్యాచ్‌లో టాప్‌ సీడ్‌ ముందు తలొంచింది. థారులాండ్‌ షట్లర్‌ పొర్నపవీ చొచువాంగ్‌ 21-12, 19-21, 21-14తో తెలుగు తేజంపై మూడు గేముల మ్యాచ్‌లో పైచేయి సాధించింది. ఉత్కంఠగా సాగిన రెండో గేమ్‌లో గెలుపొందిన సింధు.. తొలి, చివరి గేముల్లో నిరుత్సాహపరిచింది. ఈ ఓటమితో సింధు గ్రూప్‌-ఏలో రెండో స్థానంలో నిలిచి నాకౌట్‌కు చేరుకుంది. జపాన్‌ స్టార్‌ షట్లర అకానె యమగూచితో నేడు సెమీఫైనల్లో తలపడనుంది. మహిళల డబుల్స్‌ జంట అశ్విని పొన్నప్ప, సిక్కి రెడ్డి విజయంతో వరల్డ్‌ టూర్‌ ఫైనల్స్‌ను ముగించారు. గ్రూప్‌ దశలో చివరి మ్యాచ్‌లో 21-19, 9-21, 21-14తో ఇంగ్లాండ్‌ జోడీ చోలె, లారెన్‌లపై గెలుపొందారు. పురుషుల సింగిల్స్‌లో కిదాంబి శ్రీకాంత్‌ మరో ఓటమి చవిచూశాడు. 19-21, 14-21తో రెండో సీడ్‌ లీ జి చేతిలో ఖంగుతిన్నాడు. రెండు వాకోవర్‌ విజయాలతో మెన్స్‌ సింగిల్స్‌ గ్రూప్‌-ఏ నుంచి యువ షట్లర్‌ లక్ష్యసేన్‌ సెమీఫైనల్స్‌కు చేరుకున్నాడు. గాయంతో సాత్విక్‌సాయిరాజ్‌, చిరాగ్‌ శెట్టిలు పురుషుల డబుల్స్‌లో గ్రూప్‌ దశ చివరి మ్యాచ్‌లో బరిలోకి దిగలేదు. మహిళల సింగిల్స్‌లో సింధు, పురుషుల సింగిల్స్‌లో లక్ష్యసేన్‌ నేడు టైటిల్‌ పోరుకు చేరుకునేందుకు స్మాష్‌ కొట్టనున్నారు.